ଜିଲ୍ଲା ସ୍ତରୀୟ ସଡ଼କ ସୁରକ୍ଷା ଉପଦେଷ୍ଟା କମିଟି ବୈଠକ ଅନୁଷ୍ଠିତ , ଢେଙ୍କାନାଳ

ଓଡ଼ିଶା ତାଜା ନ୍ୟୁଜ୍ ( ୬ ଜାନୁଆରୀ ବୁଧବାର ) ଢେଙ୍କାନାଳ :- ଆଜି ଅପରାହ୍ନରେ ଜିଲ୍ଲାପାଳଙ୍କ କାର୍ଯ୍ୟାଳୟ ସଦଭାବନା ସଭାଗୃହରେ ଆଞ୍ଚଳିକ ପରିବହନ ବିଭାଗ ପକ୍ଷରୁ ଜିଲ୍ଲା ସ୍ତରୀୟ ସଡ଼କ ସୁରକ୍ଷା ଉପଦେଷ୍ଟା କମିଟି ବୈଠକ ଅନୁଷ୍ଠିତ ହୋଇଯାଇଛି । ଏଥିରେ ଜିଲ୍ଲାପାଳ ଶ୍ରୀ ଭୁମେଶ ଚନ୍ଦ୍ର ବେହେରା ଅଧ୍ୟକ୍ଷତା କରି ରାସ୍ତା ଦୁର୍ଘଟଣାରେ ଲୋକମାନେ ଅକାଳ ମୃତ୍ୟୁବରଣ କରୁଥିବାରୁ ଦୃତ ବେଗରେ ଗାଡ଼ି ଚଳାଇବା, ମଦ୍ୟପାନ କରି ଚଳାଇବା, ମୋବାଇଲ ବ୍ୟବହାର କରୁଥିବା ଗାଡ଼ି ଚାଳକ ଉପରେ କଡା ନଜର ରଖିବା ସହ କିଭଳି ଗାଡ଼ି ଚାଳକ ମାନେ ହେଲମେଟ ଓ ସିଟ୍ ବେଲ୍ଟ୍ ପିନ୍ଧି ଗାଡ଼ି ଚଳାଇବେ, ସେଥିପ୍ରତି ଗୁରୁତ୍ୱ ଦେବାକୁ ବିଭାଗୀୟ ପୋଲିସ ଏବଂ ଆଞ୍ଚଳିକ ପରିବହନ ଅଧିକାରୀଙ୍କୁ ପରାମର୍ଶ ଦେଇଛନ୍ତି । ନଷ୍ଟ ହୋଇଥିବା ରାସ୍ତା ଗୁଡ଼ିକର ମରାମତି ନିମନ୍ତେ ଅଗ୍ରାଧିକାର ଦେଇ କାର୍ଯ୍ୟ କରିବାକୁ ଅତିରିକ୍ତ ଜିଲ୍ଲାପାଳ ଶଶାଙ୍କ ଶେଖର ଦାଶ ବିଭାଗୀୟ ଅଧିକାରୀଙ୍କୁ ପରାମର୍ଶ ଦେଇଛନ୍ତି । ରାସ୍ତା ଉପରେ ବାଲି,ଚିପସ୍ ରଖି ରାସ୍ତା ଅବରୋଧ ଯୋଗୁଁ ଛୋଟ ଛୋଟ ଦୁର୍ଘଟଣା ଘଟୁଛି । ଏହାର ପ୍ରତିକାର ନିମନ୍ତେ ବିହିତ ବ୍ୟବସ୍ଥା କରିବା, ମୁଖ୍ୟ ରାସ୍ତା ନିର୍ମାଣ ସମୟରେ କରାଯାଉଥିବା ବିକଳ୍ପ ରାସ୍ତା ଗୁଡ଼ିକର ରକ୍ଷଣାବେକ୍ଷଣ, ଜିଲ୍ଲା ମୁଖ୍ୟ ଚିକିତ୍ସାଳୟ ସୁଲଗ୍ନ ରାସ୍ତାର ପ୍ରଶସ୍ତିକରଣ, ମହାବୀର ବଜାର ଛକର ଉନ୍ନତିକରଣ ସମ୍ପର୍କରେ ବୈଠକରେ ଆଲୋଚନା ହୋଇଥିଲା ।

ସଡ଼କ ସୁରକ୍ଷା କମିଟିର ସଦସ୍ୟ ଶ୍ରୀ ପ୍ରଦ୍ୟୁମ୍ନ ରଥ ଏବଂ ଜିଲ୍ଲା ରେଡ଼କ୍ରସ ଶାଖାର ଉପସଭାପତି ଶ୍ରୀ ବିରଞ୍ଚି ନାରାୟଣ ପାଣି ରାସ୍ତାଘାଟର ଉନ୍ନତି, ମରାମତି ଓ ସ୍ଫିଡ୍ ଲିମିଟ୍ ସାଇନ୍ ବୋର୍ଡ ଲଗାଯିବା ନିମନ୍ତେ ଏବଂ ଜନ ସଚେତନତା ଉପରେ ଗୁରୁତ୍ବ ଦେବାକୁ ବୈଠକରେ ଦୃଷ୍ଟି ଆକର୍ଷଣ କରିଥିଲେ । ଗତ ଜୁନ ୨୦୧୯ ରୁ ନଭେମ୍ବର ମାସ ୨୦୨୦ ମଧ୍ୟରେ ଜିଲ୍ଲାରେ ବିନା ହେଲମେଟ ରେ ଗାଡ଼ି ଚଳାଉଥିବା ୧୨୯୨ ଜଣଙ୍କୁ,ସିଟ୍ ବେଲ୍ଟ୍ ପିନ୍ଧି ନଥିବା ୧୬୨୯ ଜଣଙ୍କୁ, ମଦ୍ୟପାନ କରି ଚଳାଉଥିବା ୧୨୨ ଜଣ,ଦୃତ ଗତିରେ ଗାଡି ଚାଳନ କରୁଥିବା ୧୩୦ ଜଣ, ଅଧିକ ଭାର ନେଇ ଯାଉଥିବା ୫୭୭ ଟି ଗାଡ଼ିକୁ, ମୋବାଇଲ ବ୍ୟବହାର କରି ଗାଡ଼ି ଚଳାଉଥିବା ୬୫ ଜଣ ବ୍ୟକ୍ତିଙ୍କୁ ଜୋରିମାନା କରାଯାଇଥିବା ବେଳେ ୨୦୨୦ ରେ ସମୁଦାୟ ୩୯୫ ଜଣଙ୍କର ଡ୍ରାଇଭିଂ ଲାଇସେନ୍ସ ରଦ୍ଦ କରାଯାଇଛି ବୋଲି ଆଞ୍ଚଳିକ ପରିବହନ ଅଧିକାରୀ ବସନ୍ତ କୁମାର ମାଝୀ ପ୍ରକାଶ କରିଥିଲେ । ସଡ଼କ ଦୁର୍ଘଟଣାରେ ୨୦୧୯ ମସିହାରେ ଜିଲ୍ଲାରେ ୧୫୭ ଜଣ ବ୍ୟକ୍ତି ମୃତ୍ୟୁବରଣ କରିଥିଲା ବେଳେ ୨୦୨୦ ମସିହାରେ ୧୨୩ ଜଣଙ୍କର ମୃତ୍ୟୁ ଘଟିଥିବା ଜଣାଯାଇଛି । ଏହି ବୈଠକରେ ଏନ୍ ଏଚ୍ ଏ ଆଇ ର ମ୍ୟାନେଜର ଜେ କେ ଦାସ, ନିର୍ବାହୀ ଯନ୍ତ୍ରୀ ପୂର୍ତ୍ତ ମନୋରଞ୍ଜନ ବିଶ୍ବାଳ ,ଏସ୍ ଡି ପି ଓ ଶ୍ରୀହର୍ଷ ମିଶ୍ର, ଟାଉନ୍ ଥାନା ଅଧିକାରୀ ନମିତା ନାୟକ ,ଏ ଆର୍ ଟି ଓ ଦେବାଶିଷ ସ୍ଵାଇଁ, ଜିଲ୍ଲା ମୁଖ୍ୟ ଚିକିତ୍ସାଳୟ ଡା ଏସ୍ ଏନ୍ ମହାପାତ୍ର , ଜିଲ୍ଲା ସୂଚନା ଓ ଲୋକସମ୍ପର୍କ ଅଧିକାରୀ ସୁଶାନ୍ତ କୁମାର ମିଶ୍ର , ବିଭିନ୍ନ ବିଭାଗୀୟ ଅଧିକାରୀଙ୍କ ସମେତ ଆଞ୍ଚଳିକ ପରିବହନ କାର୍ଯ୍ୟାଳୟ କର୍ମକର୍ତ୍ତା ମାନେ ଉପସ୍ଥିତ ଥିଲେ । (ରିପୋର୍ଟ – ଅମର ରଞ୍ଜନ ଦାସ )