ଗଜପତି ଜିଲ୍ଲା କାଶୀନଗର ବିଜ୍ଞାପିତ ଅଞ୍ଚଳ ପରିଷଦ ଅନ୍ତର୍ଗତ କାଶୀନଗର ଗ୍ରାମର ନିଜ ଘର ପାଖରୁ ଅପହରଣ ହେବାର ୨ ଦିନ ପରେ କଇଥ ପଦର ଗ୍ରାମରୁ ଉଦ୍ଧାର ହୋଇଛି ଶିଶୁ 

ଓଡ଼ିଶା ତାଜା ନ୍ୟୁଜ (୧୮ ଡିସେମ୍ବର ଶୁକ୍ରବାର ) ପାରଳାଖେମୁଣ୍ଡି  :-  ଗଜପତି ଜିଲ୍ଲା  କାଶୀନଗର ରେ ଘର ନିକଟରେ ଖେଳୁଥିବା ବେଳେ ଗତ ୧୬ ତାରିଖରୁ ନିଖୋଜ ହୋଇ ଯାଇଥିବା ଶିଶୁପୁତ୍ର ଆଜି ସୁରକ୍ଷିତ ଭାବେ ଉଦ୍ଧାର ହୋଇଛି । ଘର ଠାରୁ ୩ କିମି ଦୂର କଇଥପଦର ଗାଁରେ ଥିବା ଏକ ନିର୍ମାଣାଧିନ ଘରୁ ସଂପର୍କୀୟ ମାନେ ପିଲାଟିକୁ ଉଦ୍ଧାର କରିଥିବା ଜଣାଯାଇଛି । ତେବେ ତାକୁ କିଏ ଓ କାହିଁକି ଅପହରଣ କରିଥିଲା ତାହା ଏବେ ବି ସନ୍ଦେହ ଘେରରେ ରହିଛି । ପିଲାଟି ଦୁଇଦିନ ଭୋକିଲା ଥିବା ଜଣା ପଡ଼ିଛି ଓ ଭୟଭୀତ ହୋଇ ପଡ଼ିଛି । ସୂଚନାଯୋଗ୍ୟ, ଗତ ୧୬ ତାରିଖ ସନ୍ଧ୍ୟାରେ ଗଜପତି ଜିଲ୍ଲା କାଶୀନଗର କୁମୁଟିସାହିସ୍ଥିତ କୁମୁଟି ସାହିର ଯାମ୍ମି ମନ୍ମଧାଙ୍କ ପୁଅ ଯାମ୍ମି ହାର୍ଦ୍ଦିକ ଘର ନିକଟରେ ଖେଳୁ ଥିଲା । ମାତ୍ର ୨ ଜଣ ଅଜଣା ବ୍ୟକ୍ତି ଆସି ବାଇକ୍‌ରେ ଛୁଆଟିକୁ ନେଇ ଯାଇଥିବା ପିଲାର ସାଙ୍ଗ ତାଙ୍କ ପରିବାର ଲୋକଙ୍କୁ ଜଣାଇଥିଲେ ।

ଖବର ପାଇ କାଶୀନଗର ଥାନା ପୁଲିସ୍‌ ସମେତ ଗଜପତି ଏସ୍‌ପି ପହଞ୍ଚି ଛାନଭିନ କରିଥିଲେ ମଧ୍ୟ ନିଖୋଜ ଛୁଆର ସନ୍ଧାନ ମିଳି ପାରି ନ ଥିଲା । ଆଜି ହାର୍ଦ୍ଧିକଙ୍କ ମଉସା ବିଭିନ୍ନ ସ୍ଥାନରେ ଖୋଜାଖୋଜି ପରେ କାଠପଦର ରେ ନିର୍ମାଣାଧିନ କୋଠା ଘରେ ପହଞ୍ଚି ଖୋଜିଥିଲେ । ସେଠାରେ ଥିବା ଗୋଦାମ ଘର ଖୋଲି ଦେଖିବାରୁ ହାର୍ଦ୍ଧିକ ସେଠାରେ ଶୋଇଥିବା ଦେଖିବାକୁ ପାଇଥିଲେ । ଏହା ପରେ ସେଠାରୁ ଉଦ୍ଧାର କରି ଘରକୁ ଆଣି ଥିଲେ । ହାର୍ଦ୍ଧିକଙ୍କୁ ପାଇବା ପରେ ପରିବାର ରେ ଆନନ୍ଦ ର ଲହରୀ ଖେଳି ଯାଇଛି । ଖବର ପାଇ ପୁଲିସ୍‌ ପହଞ୍ଚି ପିଲାଟିର ଡାକ୍ତରୀ ପରୀକ୍ଷା କରାଇ ଅଧିକ ତଦନ୍ତ ଚଳାଇଛି । ଚାଇଲ୍ଡ ଲାଇନ୍ ଟିମ୍ ମଧ୍ୟ ପହଞ୍ଚି ତଦନ୍ତ କରିଛି । ଯାମ୍ମି ମନ୍ମଧା ଜଣେ କାଜୁ ବ୍ୟବସାୟୀ ହୋଇଥିବାରୁ ପୁଅ ନିଖୋଜ ପଛରେ ଅପହରଣ ନା ଆଉ କିଛି କାରଣ ଅଛି , ତାକୁ ନେଇ ପୁଲିସ୍‌ ଖୋଳତାଡ଼ ଆରମ୍ଭ କରିଛି  l ( ଗଜପତି /ଗରୁଡ଼ ଧ୍ଵଜ ଚୌଧୁରୀ )