ମାତୃ ଜାତିର ଉତ୍‍ଥାନ ଦ୍ୱାରା ସମାଜ ଓ ଦେଶର ବିକାଶ ସମ୍ଭବପର : ବିଶ୍ୱଭୂଷଣ ହରିଚନ୍ଦନ

ଓଡ଼ିଶା ତାଜା ନ୍ୟୁଜ (୧୩ ଡିସେମ୍ବର ରବିବାର) କଟକ/ଭୁବନେଶ୍ୱର/ବିଜୟୱାଡ଼ା/ କାଲିଫର୍ଣ୍ଣିଆ/ଲଣ୍ଡନ, :- କାଲିଫସମାଜ ଓ ସଭ୍ୟତାର ସୃଷ୍ଟି କର୍ତ୍ତା ମାତୃ ଜାତିର ଉତ୍‍ଥାନ ଦ୍ୱାରା ଦେଶର ବିକାଶ ସମ୍ଭବପର ହେବ ବୋଲି ଆନ୍ଧ୍ରପ୍ରଦେଶର ରାଜ୍ୟପାଳ ବିଶ୍ୱଭୂଷଣ ହରିଚନ୍ଦ ମତ ପ୍ରକାଶ କରିଛନ୍ତି । ଆଜି ଆନ୍ତର୍ଜାତିକ ଅଶୋଭନୀୟତା ନିରୋଧ ଆନ୍ଦୋଳନ ତରଫରୁ ଆୟୋଜିତ ଶୋଭନୀୟ ବିଶ୍ୱ ୱେବ୍‍ ମହିଳା ସମ୍ମିଳନୀ-୨୦୨୦କୁ ଭିଡିଓ କନ୍‍ଫରେନ୍ସିଂ ଜରିଆରେ ପାରମ୍ପରିକ ପ୍ରଦୀପ ପ୍ରଜ୍ୱଳନ କରି ଉଦ୍‍ଘାଟନ କରି ଶ୍ରୀ ହରିଚନ୍ଦନ ନାରି ଜାତିକୁ ଅବହେଳା ଓ ଅବମାନନା କଲେ ସମାଜର ବିନାଶ ସୁନିଶ୍ଚିତ ବୋଲି ଚେତାବନୀ ଦେଇଥିଲେ । ବିଶେଷ କରି କ୍ଷମତାରେ ମଦମସ୍ତ ବକ୍ତିମାନେ ଶାଳୀନତାର ସୀମା ସରହଦ ନ ମାନି ସମାଜରେ ଅଶୋଭନୀୟତା ପ୍ରସାରଣ କରୁଥିବା ନେଇ ରାଜ୍ୟପାଳ କ୍ଷୋଭ ପ୍ରକାଶ କରିଥିଲେ ।

କୁମାର ଭାଇଙ୍କର ଆଦର୍ଶ ଓ ଦିଗ୍‍ଦର୍ଶନ ତଥା ଡଃ.ଅରୁନ୍ଧତି ଦେବୀଙ୍କର ପ୍ରେରଣାରେ ଶୋଭନୀୟ ଆନ୍ଦୋଳନ ନିଶା ନିବାରଣ, ସ୍ୱଚ୍ଛତା ଓ ପରିମଳର ରକ୍ଷଣାବେକ୍ଷଣ, ବାତାବରଣର ପ୍ରଦୂଷଣକୁ ରୋକିବା, ବ୍ୟପକଭାବେ ଚାରାରୋପଣ କରାଯିବା ଏବଂ ନିସ୍ୱ, ଅସହାୟ ଜନସାଧାରଣଙ୍କୁ ସାହାଯ୍ୟ, ସମର୍ଥନ ଓ ଅନାଥ ଶିଶୁଙ୍କର ଲାଳନ, ପାଳନ ନେଇ କରୁଥିବା ସେବା କାର୍ଯ୍ୟଗୁଡ଼ିକର ରାଜ୍ୟପାଳ ଭୂୟସୀ ପ୍ରଶଂସା କରିଥିଲେ । ଆଜିର ଯୁବପୀଢ଼ି ମଧ୍ୟରେ ମା’, ମାଟି ଓ ମାତୃଭାଷା ପ୍ରତି ମମତା ଓ ସମ୍ମାନ ଜାଗ୍ରତ କରିବା ପାଇଁ ଶ୍ରୀ ହରଚନ୍ଦନ ଆହ୍ୱାନ ଜଣାଇଥିଲେ । ଅନ୍‍ଲାଇନ୍‍ ସମ୍ମିଳନୀରେ ସ୍ୱାଗତ ଭାଷଣ ପ୍ରଦାନ କରି ଶୋଭନୀୟ ଆନ୍ଦୋଳନର ନିର୍ଦେଶକ ତଥା ସମ୍ମିଳନୀର ଅଧ୍ୟକ୍ଷ ଡଃ. ଅରୁନ୍ଧତୀ ଦେବୀ ସାମ୍ପ୍ରତିକ ସମାଜରେ ମହିଳାମାନଙ୍କ ପ୍ରତି ରୁଗ୍‍ଣ ମାନସିକତାର ପରିବର୍ତ୍ତନର ନିତ୍ୟାନ୍ତ ଆବଶ୍ୟକତା ରହିଥିବା ସୂଚାଇଥିଲେ ।

ନାରୀ ଜାତିକୁ ସଠିକ୍‍ ନ୍ୟାୟ, ସମ୍ମାନ ଓ ସୁଯୋଗ ଦିଆଯିବାକୁ ସେ ନିବେଦନ କରିଥିଲେ । ଅଧୁନା କୋଭିଡ୍‍ ମହାମାରୀ କାଳରେ ମହିଳାମାନେ ଯେଭଳି ଅଗ୍ରଣୀ ଭୂମିକା ନିଭାଇଛନ୍ତି ତାହା ଅଭୂତପୂର୍ବ ବୋଲି ଡ. ଦେବୀ ବର୍ଣ୍ଣନା କରିଥିଲେ । ମୁଖ୍ୟ ବକ୍ତା ଭାବ ରେ ଯୋଗ ଦେଇ ଆର୍ଯ୍ୟ ମହିଳା ସମାଜର ସଭାପତି ଶନ୍ନୋ ଦେବୀ ସମାଜରେ ବର୍ତ୍ତମାନ ନାରୀ ଜାତି ପ୍ରତି ହେଉଥିବା ଭେଦଭାବ, ଅସମ୍ମାନ, ଅସଦାଚାରକୁ ଘୋର ନାପସନ୍ଦ କରିଥିଲେ । ବେଦର ଉଦାହରଣ ଦେଇ ମହିଳା ବର୍ଗର ମହିମା, ମହନୀୟତା ଓ ମହାନତା ଅନନ୍ୟ ଓ ଅସାମାନ୍ୟ ବୋଲି ସେ ଦର୍ଶାଇଥଲେ । ଡିଜିଟାଲ ମଞ୍ଚରେ ସମ୍ମାନନୀୟ ବକ୍ତା ଭାବରେ ସାମିଲ ହୋଇ ଓଡ଼ିଶା ସୋସାଇଟି ଅଫ୍‍ ଆମେରିକାରେ ସଭାପତି କୁକୁ ଦାସ କନ୍ୟା ସନ୍ତାନର ନିରାପତ୍ତା, ସୁରକ୍ଷା ଏବଂ ପ୍ରୋତ୍ସାହନ ପ୍ରତି ଅଗ୍ରାଧିକାର ଦିଆଯିବା ସହିତ ସେମାନଙ୍କର ବୌଦ୍ଧିକ ଓ ଶାରୀରିକ ବିକାଶ ତଥା ସେମାନଙ୍କୁ ଆତ୍ମନୀର୍ଭର ଓ ଚରିତ୍ରବାନ କରାଯିବା ଦିଗରେ ଜୋର୍‍ ଦେଇଥିଲେ ।

ବରିଷ୍ଠ ସାମ୍ବାଦିକ କିଶୋର ଦ୍ୱିବେଦୀ ଅତିଥି , ଆୟୋଜକ, ଉପସ୍ଥାପକ ଓ ସଂଯୋଜକ ମାନଙ୍କର ପରିଚୟ ପ୍ରଦାନ କରିଥିଲେ । ଶୋଭନୀୟ ଆନ୍ଦୋଳନର ସଦସ୍ୟ ମୀନତି ଦେବୀ ଧନ୍ୟବାଦ ଅର୍ପଣ କରିଥିଲେ । ଲଣ୍ଡନରୁ ୟୁ.କେ. ଓଡ଼ିଶା ସମାଜର ସାଂସ୍କୃତିକ ସମ୍ପାଦକ ଡଃ. ଭାଗ୍ୟଶ୍ରୀ ସିଂହ ଉଦ୍‍ଘାଟନୀ ଅଧୀବେଶନକୁ ସୁସଂଯୋଜନା କରିଥିଲେ । ଇଣ୍ଟରନେଟ୍‍ ସମାବେଶରେ ଉପସ୍ଥିତ ମାନ୍ୟଗଣ୍ୟ ବ୍ୟକ୍ତିଙ୍କ ମଧ୍ୟରେ ଅଲମ୍ପିକ୍‍ ତାରକା ଦୂତୀ ଚାନ୍ଦ , ଜାପାନ୍‍ରୁ କୁନ୍ନା ଦାଶ, ବାହାରିନ୍‍ରୁ ଅରୁଣ କୁମାର ପ୍ରହରାଜ, ଦୁବାଇରୁ ପ୍ରିତିଶ୍‍ରଞ୍ଜନ ଦାଶ, ମୁମ୍ବାଇରୁ ଆଶିଷ୍‍ ମିଶ୍ର ଓ ରାୟଗଡ଼ରୁ ପ୍ରତୀଶ ଗୋଏଲ୍‍ ପ୍ରମୁଖ ଅନ୍ତର୍ଭୁକ୍ତ ଥିଲେ ।