ତ୍ରୁଟିପୂର୍ଣ୍ଣ ଅସ୍ତ୍ରୋପ୍ରଚାର ପାଇଁ ମହିଳାଙ୍କ ମୃତ୍ୟୁ ଘଟଣା । କ୍ଷତିପୂରଣ ପ୍ରତିଶ୍ରୁତି ମିଳିବା ପରେ ଧାରଣା ପ୍ରତ୍ୟାହୃତ ।

ଓଡ଼ିଶା ତାଜା ନ୍ୟୁଜ (୧୩ ଡିସେମ୍ବର,ରବିବାର )  ଏରସମା :- ଜଗତସିଂହପୁର ଜିଲ୍ଲା ଅନ୍ତର୍ଗତ ଏରସମା ଗୋଷ୍ଠୀ ସ୍ବାସ୍ଥ୍ୟ ସେବା କେନ୍ଦ୍ର ରେ ତ୍ରୁଟିପୂର୍ଣ୍ଣ ପରିବାର ନିୟୋଜନ ଅସ୍ତ୍ରୋପ୍ରଚାର ଯୋଗୁଁ ବାଲେଇପୁର ପଞ୍ଚାୟତ ନଳ କଣୀ ଗ୍ରାମର ତ୍ରିଲୋଚନ ରାଉତଙ୍କ ପତ୍ନୀ ବିନ୍ଦୁଲତା ରାଉତଙ୍କ ମୃତ୍ୟୁ ହୋଇଥିଲା । ଏହାର ପ୍ରତିବାଦରେ ମେଡିକାଲ ଫାଟକ ଏବଂ ୫୫ନଂ ଜାତୀୟ ରାଜପଥକୁ ଉତ୍ତ୍ୟକ୍ତ ଲୋକେ ଅବରୋଧ କରିବା ସହ ମୃତକଙ୍କ ପରିବାରକୁ କ୍ଷତିପୂରଣ ଓ ଡାକ୍ତରଙ୍କୁ ଗିରଫ କରିବା ପାଇଁ ଦାବୀ କରିଥିଲେ । ଘଟଣା ସ୍ଥଳରେ ଏରସମା ତହସିଲଦାର, ବିଡ଼ିଓ, ଥାନାଧିକାରୀ, ତିର୍ତ୍ତୋଲ ଏସଡି ପି ଓ, ଜିଲ୍ଲା ଅତିରିକ୍ତ ସ୍ୱାସ୍ଥ୍ୟ ଅଧିକାରୀ ପହଞ୍ଚି ବୁଝାବୁଝି କରିଥିଲେ ମଧ୍ୟ ଲୋକମାନେ ନିଜ ଜିଦିରେ ଅଟଳ ରହିଥିଲେ ।

ଶେଷରେ ସ୍ଥାନୀୟ ବିଧାୟକ ତଥା ମନ୍ତ୍ରୀ ଶ୍ରୀ ରଘୁନନ୍ଦନ ଦାସଙ୍କ ହସ୍ତକ୍ଷେପ ଫଳରେ ପ୍ରଶାସନ, ଜନପ୍ରତିନିଧି ପୀତବାସ ଗଛାୟାତ, ଜିଲ୍ଲାପରିଷଦ ପ୍ରତିନିଧି ଅଦୈତ୍ୟ କୁମାର ଭୂୟାଁ, ବିଜୟ କୁମାର ସ୍ବାଇଁ ଅଧ୍ୟକ୍ଷ ସୁଧୀର କୁମାର ସ୍ୱାଇଁ, ସାରଦା ପ୍ରସନ୍ନ ଜେନା ପ୍ରମୁଖ କ୍ଷତିଗ୍ରସ୍ତ ପରିବାର ସହ ଆଲୋଚନା କରି କ୍ଷତିପୂରଣ ବାବଦକୁ ମନ୍ତ୍ରୀଙ୍କ ତରଫରୁ ନିଜ ପାଣ୍ଠିରୁ ଏକଲକ୍ଷ ଟଙ୍କା, ପ୍ରଶାସନ ତରଫରୁ ଚାରି ଲକ୍ଷ ଟଙ୍କା, ଜିଲ୍ଲା ପ୍ରଶାସନ ପକ୍ଷରୁ ତିରିଶ ହଜାର ଟଙ୍କା, ବ୍ଲକ ତରଫରୁ ଆବାସ ଯୋଜନାରେ ଘର ଯୋଗାଇ ଦେବା ପାଇଁ ପ୍ରତିଶୃତି ଦେବାପରେ ଧାରଣା ପ୍ରତ୍ୟାହୃତ ହୋଇଥିଲା । (ରିପୋର୍ଟ୍ : ରଶ୍ମୀ ରଞ୍ଜନ ଖୁଣ୍ଟିଆ)