ଗଜପତି ଜିଲ୍ଲା ପ୍ରଶାସନ ଓ ପୋଲିସର ପ୍ରତିଶୃତି ପରେ ପାରଳଖେମୁଣ୍ଡି ରାଜପ୍ରସାଦ ସମ୍ମୁଖରୁ ବୃଦ୍ଧଙ୍କ ଅନଶନ ପ୍ରତ୍ୟାହାର – ପାରଳାଖେମୁଣ୍ଡି

ଓଡ଼ିଶା ତାଜା ନ୍ୟୁଜ୍ (୧୧ ନଭେମ୍ବର ବୁଧବାର ) ଗଜପତି  :– ୮୭ବର୍ଷ ବୟସ୍କ ଜଣେ ବୃଦ୍ଧଙ୍କୁ ତାଙ୍କ ପୁଅ ବହୁ ଅଣଦେଖା କରିବା ପ୍ରତିବାଦରେ ଗଜପତି ଜିଲ୍ଲା ସଦର ମହକୁମା ପାରଳାଖେମୁଣ୍ଡି ସ୍ଥିତ ରାଜନହର ସମ୍ମୁଖରେ ଗତକାଲି ଠାରୁ ଅନଶନ ଧର୍ମଘଟ କରିଥିଲେ । ଗଜପତି ଜିଲ୍ଲାପାଳ ଏହା ଜାଣିବା ପରେ ପାରଳା ତହସିଲଦାର ଅଚ୍ୟୁତାନନ୍ଦ ଜାନୀ ଏବଂ ପାରଳା ଥାନା ଅଧିକାରୀ ବିବେକାନନ୍ଦ ସ୍ୱାଇଁଙ୍କୁ ତୁରନ୍ତ ଏହାର ପ୍ରତିକାର ପାଇଁ ନିର୍ଦ୍ଦେଶ ଦେଇଥିଲେ । ଏଥିରେ ତହସିଲଦାର ଓ ଥାନା ଅଧିକାରୀ ବୃଦ୍ଧଙ୍କ ସହ ଆଲୋଚନା କରିବା ସହ ଆଇନ ଅନୁଯାଇ ତୁରନ୍ତ ପଦକ୍ଷେପ ନିଆଯିବ ବୋଲି ବୃଦ୍ଧଙ୍କୁ ପ୍ରତିଶ୍ରୃତି ଦେବାପରେ ସେ ଅନଶନ ପ୍ରତ୍ୟାହାର କରିଥିବା ଜଣାଯାଇଛି ।

ଘଟଣାରୁ ପ୍ରକାଶ, ରାମ ମୋହନ ପଟ୍ଟନାୟକ (୮୭) ନାମକ ଜଣେ ବ୍ୟକ୍ତି ପୁଅ ବୋହୁଙ୍କ ଅଣଦେଖା ନେଇ ଗତ କାଲି ପାରଳା ରାଜପ୍ରାସାଦ ସମ୍ମୁଖରେ ଅନଶନରେ ବସିଥିଲେ । ଏଠାରେ ସେ କହିଥିଲେ ଯେ ଗତ ୧୪.୧୦.୨୦୨୦ରେ ସେ ଜିଲ୍ଲାପାଳ କାର୍ଯ୍ୟାଳୟ ସମ୍ମୁଖରେ ଅନଶନରେ ବସିବାପରେ ତାଙ୍କୁ ପ୍ରଶାସନ ପକ୍ଷରୁ ଥଇଥାନ କରିବାର ପ୍ରତିଶ୍ରୁତି ଦିଆଯାଇଥିଲା । ଏହି ଅନଶନର କାରଣ ସମ୍ପର୍କରେ ପଚାରିବାରୁ ସେ କହିଛନ୍ତି ଯେ ତାଙ୍କର ୪ଗୋଟି ପୁଅ ଏବଂ ଜଣେ ଝିଅ ରହିଛନ୍ତି । ମାତ୍ର ସେ ବର୍ତ୍ତମାନ ପାରଳାଖେମୁଣ୍ଡି ସ୍ଥିତ ଏର୍ଦଲା ସାହି ସ୍ଥିତ ତାଙ୍କର ବାସ ଭବନରେ ଏକାକୀ ଜୀବନ ବିତାଉଛନ୍ତି । ୪ଗୋଟି ପୁଅ ମଧ୍ୟରୁ ୩ଜଣ ବାହାରେଥିବାବେଳେ ଜଣେ ପୁଅ ପାଡାଲା ସାହି ଠାରେ ବସବାସ କରୁଥିଲେ ମଧ୍ୟ ସେ ଏହି ବୃଦ୍ଧ ପିତାଙ୍କ କୌଣସି ଯତ୍ନ ନେଉନାହାନ୍ତି । ତେବେ ସେ କୌଣସି ଦିନ ନିଜେ ରୋଷେଇ କରି ଖାଉଥିଲେ ତ ଆଉ କେଉଁ ଦିନ ପାରଳା ଜଗନ୍ନାଥ ମନ୍ଦିର ଯାଇ ଭୋଜନ କରୁଥିଲେ । ହେଲେ ନିଜର ଏର୍ଦଲା ସାହି ବାସଭବନ ଜଗନ୍ନାଥ ମନ୍ଦିର ଠାରୁ ଦୂରରେ ରହିଥିବାରୁ ଯିବା ଆସିବା ତାଙ୍କ ପକ୍ଷେ କଷ୍ଟକର ହୋଇପଡୁଛି ।

ଅନ୍ୟପକ୍ଷରେ ତାଙ୍କର ବାର୍ଦ୍ଧକ୍ୟ ଅବସ୍ଥା ଯୋଗୁଁ ସେ ନିଜେ ରୋଷେଇ କରି ଖାଦ୍ୟ ପାନୀୟ କରିବା କଷ୍ଟକର ହୋଇପଡିଛି । ତେଣୁ ସେ ବଡପୁଅ ରହୁଥିବା ପାଡଲା ସାହି ଘରଟିକୁ ନିଜ ଅକ୍ତିଆରକୁ ନେଲେ ତାଙ୍କ ପକ୍ଷେ ଜଗନ୍ନାଥ ମନ୍ଦିର ଯାତାୟତ କରିବା ସୁବିଧା ହୁଅନ୍ତା ବୋଲି ସେ କହିଛନ୍ତି, ଯାହାକି ବର୍ତ୍ତମାନ ସୁଦ୍ଧା ସମ୍ଭବ ହୋଇପାରିନାହିଁ । ତେଣୁ ଏହି ସମସ୍ୟାର ସମାଧାନ ପାଇଁ ପ୍ରଶାସନ ହସ୍ତକ୍ଷେପ କରି ତାଙ୍କୁ ନ୍ୟାୟ ଦେଲେ ସେ ଉପକୃତ ହେବେ ବୋଲି ସେ ପ୍ରକାଶ କରି ସେ ଅନଶନ ଆରମ୍ଭ କରିଥିଲେ । ଗତକାଲି ଅପରାହ୍ନରେ ପ୍ରଶାସନ ଓ ପୋଲିସ ତରଫରୁ ତାଙ୍କୁ ଉଚିତ ପ୍ରତିଶ୍ରୃତି ଦିଆଯିବା ପରେ ସେ ଅନଶନ ଭଙ୍ଗ କରିଛନ୍ତି ।(ପାରଳଖେମୁଣ୍ଡି /ଗରୁଡ଼ ଧ୍ଵଜ ଚୌଧୁରୀ )