ଓଡ଼ିଶା ତାଜା ନ୍ୟୁଜ (୨୪ ଅକ୍ଟୋବର ଶନିବାର) କଳାହାଣ୍ଡି :- କଳାହାଣ୍ଡିର ଅଧିଷ୍ଠାତ୍ରୀ ଦେବୀ ମା’ ମାଣିକେଶ୍ଵରୀଙ୍କ ଛତର ଯାତ୍ରା ନିରାଡମ୍ବର ଭାବେ ଶେଷ ହୋଇଛି।କରୋନା କଟକଣା ଭିତରେ ବିନା ଭକ୍ତରେ ଛତର ଯାତ୍ରା ଅନୁଷ୍ଠିତ ହୋଇଥିଲା। ଜେନାଖାଲରୁ ଗୁପ୍ତ ପୂଜା ପରେ ମନ୍ଦିରକୁ ପ୍ରତ୍ୟାବର୍ତ୍ତନ କଲା ମା’ଙ୍କ ଛତର। ପ୍ରତିବର୍ଷ ମା’ଙ୍କ ଛତରକୁ ଦର୍ଶନ କରିବା ପାଇଁ ରାଜ୍ୟ ଓ ରାଜ୍ୟ ବାହାରୁ ଲକ୍ଷାଧିକ ଲୋକଙ୍କ ସମାବେଶ ହୋଇଥାଏ । କିନ୍ତୁ ଚଳିତ ବର୍ଷ ବିନା ଭକ୍ତରେ ଛତର ଯାତ୍ରା ହେବା ଇତିହାସ ସୃଷ୍ଟି କରିଛି।ଗତ ୨୩ ତାରିଖ ରାତି ୧୨ଟାରୁ ୨୫ ତାରିଖ ପର୍ଯ୍ୟନ୍ତ ୧୪୪ଧାରା ଜାରି କରାଯାଇଛି ।
କେବଳ ମେଡିକାଲକୁ ଯିବା ପାଇଁ ସହରକୁ ପ୍ରବେଶ ଅନୁମତି ରହିଛି । ଗୋଟିଏ ସ୍ଥାନରେ ୪ ଜଣରୁ ଅଧିକ ଲୋକ ଏକତ୍ରିତ ହୋଇପାରିବେ ନାହିଁ। ଭକ୍ତଙ୍କ ପାଇଁ ଦୂରଦର୍ଶନ ପ୍ରସାର ମାଧ୍ୟମରେ ଛତର ଦର୍ଶନ ବ୍ୟବସ୍ଥା କରାଯାଇଥିଲା। କଳାହାଣ୍ଡି ଜିଲ୍ଲାପାଳ ଡ଼ ଗାଭାଲି ପରାଗ ହର୍ଷଦ, ଏସପି ବାତୁଲା ଗଙ୍ଗାଧର ଯାତ୍ରା ପୂର୍ବରୁ ଜନସାଧାରଣଙ୍କୁ ମହାମାରୀ କରୋନା ଯୋଗୁଁ ଚଳିତବର୍ଷ ମା’ଙ୍କ ଛତର ନିରାଡମ୍ବରରେ ପାଳନ ହେବା ସହ ଗାଇଡଲାଇନ ଜାରି କରିଥିଲେ। ଭବାନୀପାଟଣା ସହରର ୪୦ଟି ସ୍ଥାନରେ ବ୍ୟାରିକେଡ଼ ବ୍ୟବସ୍ଥା ହେବା ସହ ୧୦ ପ୍ଲାଟୁନ ପୋଲିସ ଫୋର୍ସ ମୁତୟନ କରାଯାଇଥିଲା।ମୋଟାମୋଟି ଭାବରେ ମା ମାଣିକେଶ୍ଵରୀ ପୂଜାର୍ଚ୍ଚନା ରୀତିନୀତି ଓ ଶାନ୍ତିଶୃଙ୍ଖଳାର ସହିତ ଶେଷ ହୋଇଛି। (ରିପୋର୍ଟ ପ୍ରଦୀପ କୁମାର ଗଉଡ)
