ଓଡ଼ିଶା ତାଜା ନ୍ୟୁଜ (୨୦ ଅକ୍ଟୋବର ମଙ୍ଗଳବାର) ନୟାଗଡ :- ନୟାଗଡରେ ହୁ ହୁ ହୋଇ ମାତି ଚାଲିଥିଲା ଜାଲି ନୋଟ । ଜାଲି ନୋଟ କାରଖାନା ଜବତ କଲା ନୟାଗଡ ଟାଉନ ଥାନା ପୋଲିସ । 1 ଲକ୍ଷ 30 ହଜାର ନୋଟରୁ ବାହାରିଲା 1 ଲକ୍ଷ 25 ହଜାର ଜାଲି ମାତ୍ର 5 ହଜାର ଅସଲି । ଜଣେ ବାଇକ କିଣିବା ପାଇଁ ଯାଇ ଫସିଥିଲେ ଏହି ଜାଲରେ । ଆଳୁ ଖୋଳୁ ଖୋଳୁ ମହାଦେବ ବାହାରିବା ପରି ଅବସ୍ଥା ଗୁରୁତର ହୋଇଥିଲା । ଜନୈକ ଯୁବକ ଏକ ସୋରୁମ ଯାଇ ବାଇକ କିଣି ସାରିବା ପରେ 1 ଲକ୍ଷ 30 ହଜାର ଟଙ୍କା ପ୍ରଦାନ କରିଥିଲେ ।
ମାତ୍ର ଏଥିରୁ 5 ହଜାର ଅସଲି ନୋଟ ଥିଲା ବେଳେ ଆଉସବୁ 1 ଲକ୍ଷ 25 ହଜାର ଟଙ୍କା ଜାଲି ଟଙ୍କା ବାହାରି ଥିଲା । ସେହି ସବୁ 500 ଟଙ୍କିଆ ନୋଟ୍ ଥିଲା । ଯାହା ଅନୁସନ୍ଧାନ କରୁ କରୁ ନୟାଗଡ ଟାଉନ ଥାନା ପୁଲିସ ଏସ.ଆଇ ଶ୍ରୀ ସ୍ମୃତି ରଞ୍ଜନ ମହାନ୍ତି ଓ ଏ.ଏସଆଇ ଅଶୋକ ମହାନ୍ତି ମିଳିତ ଭାବେ ଚଢ଼ାଉ କରି ନୟାଗଡ ଟାଉନ ଥାନା ଅନ୍ତର୍ଗତ ରାଜାବଗିଚା ଅଂଚଳରୁ ଏକ ଭଡାଘରୁ ଜାଲି ନୋଟ ସହିତ ନକଲି ନୋଟ ତିଆରି କରିବା ମେସିନ ଜବତ କରିବା ସହିତ ଦୁଇ ଜଣ ଅଭିଯୁକ୍ତଙ୍କୁ ଗିରଫ କରିଥିଲେ ।
ଜଣେ ଅଭିଯୁକ୍ତ ଜଣକ କୋସକା ଫାଣ୍ଡି ଅନ୍ତର୍ଗତ ଶରଧାପୁର ଗାଁର ଦିବ୍ୟ ରଂଜନ ହୋତା ହୋଇଥିଲା ବେଳେ ଆଉ ଜଣେ ଫତେଗଡ ଥାନା ବଳିଆପଟାର ଅରୁଣ ନାୟକ । ଏପରି ସ୍ଥିତିରେ ନୟାଗଡ ଟାଉନ ଥାନା ଆଇଆଇସି ଜୟଦୀପ ମହାନ୍ତି କହିଛନ୍ତି କାହା ପାଖରେ ନକଲି ନୋଟ୍ ର ସୂଚନା ଥିଲେ ପୋଲିସକୁ ଜଣାଇଦେବା ପାଇଁ । (ରିପୋର୍ଟ -ରାମ କୃଷ୍ଣ ରଥ)
