ନୟାଗଡ (ଓଡିଶା ତାଜା ନିଉଜ୍) ରଣପୁର ତା.7.1.2020 : ରଣପୁର ଐତିହ୍ୟ, ସଂସ୍କୃତି ଓ ପରମ୍ପରାକୁ ନେଇ ସ୍ଥାନୀୟ ମିନି ଷ୍ଟାଡିୟମରେ ଅନୁଷ୍ଠିତ ହେଉଥିବା ରଣପୁର ମହୋତ୍ସବ ଆଜି ତୃତୀୟ ସଂନ୍ଧ୍ୟା ଅନୁଷ୍ଠିତ ହୋଇ ଯାଇଛି । କବି ଭକ୍ତ ଚରଣଙ୍କ ନାମରେ ନାମିତ ହୋଇଥିବା ତୃତୀୟ ଦିବସଟି ଏକ ସ୍ମରଣୀୟ ଦିବସ ରୂପେ ପାଳିତ ହୋଇଯାଇଛି ।
ମହୋତ୍ସବର ଅଧ୍ୟକ୍ଷ ତଥା ସ୍ଥାନୀୟ ବିଧାୟକ ସତ୍ୟ ନାରାୟଣ ପ୍ରଧାନଙ୍କ ସଭାପତିତ୍ୱରେ ତୃତୀୟ ସଂନ୍ଧ୍ୟାରେ ଏକ ସଭା ଅନୁଷ୍ଠିତ ହୋଇଥିଲା ।
ଏହି ସଭାରେ ମୂଖ୍ୟ ଅତିଥି ଭାବେ କୃଷି, ମତ୍ସ୍ୟ, ପଶୁପାଳନ ଓ ଉଚ୍ଚ ଶିକ୍ଷା ବିଭାଗର ମନ୍ତ୍ରୀ ଅରୁଣ କୁମାର ସାହୁ, ମୂଖ୍ୟ ବକ୍ତା ଭାବେ ଅଧ୍ୟାପିକା ପ୍ରତିଭା ମହାରଥି, ସମ୍ମାନୀତି ଅତିଥି ଭାବେ ନୟାଗଡ ଅତିରିକ୍ତ ଜିଲ୍ଲପାଳ ବିଧାନ ଚନ୍ଦ୍ର ରାୟ, ଦଶପଲ୍ଲା ବିଧାୟକ ରମେଶ ଚନ୍ଦ୍ରବେହେରା, ପୂର୍ବତନ ସାଂସଦ ଓ ବିଧାୟକ ବିଧାନ ଚନ୍ଦ୍ର ରାୟ, ଜିଲ୍ଲା ପରିଷଦ ସଭ୍ୟା ଲୁନାଡେକା ଛୋଟରାୟ , ସମାଜସେବୀ ଜୋସ୍ନା ପରିଡା, ମହୋତ୍ସବ କମିଟିର ସଂଯୋଜକ ଦେବାଶିଷ ପଟ୍ଟନାୟକ, ସମ୍ପାଦକ ସୁରେଶ ମିଶ୍ର, ଆବାହକ ପୂର୍ଣ୍ଣଚନ୍ଦ୍ର ରାୟ ପ୍ରମୂଖ ଯୋଗ ଦେଇ ରଣପୁରର ଇତିହାସ ସମ୍ବନ୍ଧରେ ଅଭିଭାଷଣ ପ୍ରଦାନ କରିଥିଲେ ।
ଅଧ୍ୟାପିକା ପ୍ରତିଭା ମହାରଥିଙ୍କ ରଣପୁର ଇତିହାସ ଉପରେ ସାରଗର୍ଭକ ଅଭିଭାଷଣ ଦର୍ଶକଙ୍କୁ ଆକର୍ଷିତ କରିଥିଲା । ସେହିଭଳି ବୀର ରଘୁଦିବାକର ଓ ଅର୍ଜୁନ ରାଉତ ଦେଶ ପାଇଁ କରି ଯାଇଥିବା କଥାକୁ ସେ ଦୋହରାଇ ଥିଲେ । କବି ଭକ୍ତ ଚରଣ ମନୋବଧ ଚଉତିଶା ରଚନା କରି ଓଡିଶାର ଘରେ ଘରେ ପରିଚିତ ହୋଇଥିବା ବେଳେ ଅଚ୍ୟୁତ ନନ୍ଦ ଏହି ରଣପୁରରେ ହରିବଂଶ ରଚନା କରିଥିଲେ ।
ପ୍ରତିଭାଙ୍କର ଦୀର୍ଘ ସମୟ ଧରି ଅଭିଭାଷଣ ହଜାର ହଜାର ଦର୍ଶକଙ୍କୁ ସ୍ୱବ୍ଧ କରି ଦେଇଥିଲା । ପରେ ସିନେ ଅଭିନେତ୍ରୀ ଅର୍ଚ୍ଚିତାଙ୍କ ସଂଳାପ ଓ ଗୀତରେ ବିଳମ୍ବିତ ରାତି ପର୍ଯ୍ୟନ୍ତ ଦର୍ଶକଙ୍କୁ ବାନ୍ଧି ରଖି ପାରିଥିଲା । ପରେ ଭୁବନେଶ୍ୱରରୁ ଆସିଥିବା ସୁର ଭାଇବ୍ରେସନର ଗାୟିକା ଜୟଶ୍ରୀ ଧଳ ଓ ତାଙ୍କ ଟିମ୍ର ରଙ୍ଗା ରଙ୍ଗ କାର୍ଯ୍ୟକ୍ରମ ବିଳମ୍ବିତ ରାତି ପର୍ଯ୍ୟନ୍ତ ଚାଲିଥିଲା ।
ଆଜିର ସଭାରେ ପୂର୍ବତନ ବ୍ଲକ ଅଧ୍ୟକ୍ଷ ପ୍ରଭାତ ଦଳବେହେରା ଅତିଥି ପରିଚୟ ପ୍ରଦାନ କରିଥିଲେ । ସଙ୍ଗୀତ କଳା ବିଦ୍ୟା ନିକେତନର ଅଧ୍ୟକ୍ଷ ସତ୍ୟ ନାରାୟଣ ମହାପାତ୍ରଙ୍କ ନିର୍ଦ୍ଦେଶନାରେ ଛାତ୍ରଛାତ୍ରୀମାନେ ସ୍ୱାଗତ ସଙ୍ଗୀତ ଗାନ କରିଥିଲେ । ଆଜି ସକାଳ ୧୧ ଘଟିକା ସମୟରେ ଏକ କବି ସମ୍ମିଳନୀ ଅନୁଷ୍ଠିତ ହୋଇଥିଲା ।
ଏଥିରେ ବିଭିନ୍ନ ଅଞ୍ଚଳର ଖ୍ୟାତାନାମା କବିମାନେ ଆସି ଯୋଗ ଦେଇ ରଣପୁରର ଐତିହ୍ୟ ସମ୍ବନ୍ଧରେ କବିତା ପାଠ କରିଥିଲେ । ଏହା ପରେ ସ୍କୁଲ ଓ କଲେଜ ଛାତ୍ରଛାତ୍ରୀମାନଙ୍କୁ ନେଇ କୁଇଜ ପ୍ରତିଯୋଗିତା କରାଯାଇଥିଲା । ରିପୋର୍ଟ – ସୋନାଲି
