ଓଡ଼ିଶା ତାଜା ନ୍ୟୁଜ (୦୭ ଅକ୍ଟୋବର ବୁଧବାର ) ବ୍ରହ୍ମପୁର :- ବ୍ରହ୍ମପୁର, ଯୁବାବସ୍ଥା ରେ ଦୁଇ ଭାଇଙ୍କୁ ଆଟାସ୍କିଆ ରୋଗ | ରୋଗ ଛଡେଇ ନେଲା ଦୁଇ ଭାଇଙ୍କ ଯୁବାବସ୍ଥା | ଦଶ ବର୍ଷ ହେଲା ସର୍ବଦା ଦୁଇ ଭାଇ ଶଯ୍ୟାଶାୟୀ | ପୂର୍ବରୁ ମୂଲ ଲାଗୁଥିବା ବାପାଙ୍କର ବି ସମାନ ଅବସ୍ଥା | ମାଆ ଧନୁ ମୁଦୁଲି ମୁଲ ଲାଗିଲେ ଯେତିକି ମିଳୁଛି ସେଥିରେ ଚାଲିଛି ସଂସାର | ଦିନକୁ ୧୦୦ ରୁ ୧୫୦ଟଙ୍କା ରୋଜଗାର |ପିଲାଙ୍କ ଏହି ଅବସ୍ଥାରେ ମାଆ ମଧ୍ୟ ଘର ଛାଡି ମୂଲ ଲାଗିବାକୁ ଯାଇ ପାରୁନାହାନ୍ତି |ଏମିତି ଏକ ଅସହାୟ ପରିବାର ସହିତ ଭେଟିଥିଲେ ଆମ ପ୍ରତିନିଧି ଦେବାଶିଷ ମହାରଣା | ବେଗୁନିଆପଡା ବ୍ଲକ ଅନ୍ତର୍ଗତ ଷଣ୍ଢମୂଳ ପଞ୍ଚାୟତର ଢ଼େପ ସାହିର ବାସିନ୍ଦା ହାଡୁ ମୁଦୁଲି | ତାଙ୍କ ଦୁଇ ପୁଅ ସଞ୍ଜୟ (୨୮) ଓ ବସନ୍ତ (୨୪) ବର୍ଷ |
ଦଶବର୍ଷ ପୂର୍ବେ ହଠାତ ଏହି ଦୁଇ ଭାଇଙ୍କ ଦେହ ଖରାପ ହୋଇଥିଲା | ହାତ ଗୋଡରୁ ଶକ୍ତି ହରାଇ ମେରୁଦଣ୍ଡ ଦୁର୍ବଳ ହେବା ସହ ଚାଲିବାରେ କଷ୍ଟ ହେଲା | ଲକ୍ଷାଧିକ ଟଙ୍କା ଖର୍ଚ୍ଚ କରି ସାରିଲା ପରେ ମଧ୍ୟ ରୋଗ ଏଯାବତ ବଢ଼ିବାରେ ଲାଗିଛି | ବିନା ଆଶ୍ରା ରେ ଚଳିବା ଅସମ୍ଭବ | ହାତ ଓ ମୁଣ୍ଡ ବହୁ ଜୋରରେ ଥରୁଛି | ଏତେ ଜୋର ଥରୁଛି ଯେ ନିଜେ ଖାଇ ବି ପାରୁନାହାନ୍ତି | ମାଆ ଧନୁ ମୁଦୁଲି ନିଜେ ମୂଲ ଲାଗିବା ସହ ଦୁଇ ପୁଅ ଓ ସ୍ୱାମୀ ଙ୍କୁ ନିଜ ହାତରେ ଖୁଆଇବା ଦୃଶ୍ୟ ହୃଦୟ ବିଦାରକ | ନିଜ ଘର ଆଗରେ ଭଡା ସୂତ୍ରରେ କେବିନ ପକାଇ ଦୁଇ ପଇସା ରୋଜଗାର କରି ଦୁଃଖ କଷ୍ଟରେ ଚଳିବା ପାଇଁ | କିନ୍ତୁ ସେ କେବିନ ରେ ଜିନିଷ ରଖିବା ପାଇଁ ଅର୍ଥ ନାହିଁ | ଦୁଇ ଭାଇ, ବାପା, ମାଆ ଙ୍କ ପରିବାର ଚଳଣି ଆଖିରେ ନ ଦେଖିଲେ କାହାର ବିଶ୍ୱାସ ହେବନି | ପ୍ରମାଣ ପତ୍ର ପାଇଁ ଦୌଡ଼ି ଦୌଡ଼ି ଶେଷରେ ପ୍ରମାଣ ପତ୍ର ମିଳିଲା ପରେ ବି ବର୍ତମାନ ସୁଦ୍ଧା ଭିନ୍ନକ୍ଷମ ଭତ୍ତା ମିଳିନି |
ପଞ୍ଚାୟତ କର୍ତୃପକ୍ଷ ଙ୍କ କହିବା ଅନୁସାରେ ଅନଲାଇନ ରେ ଏ ଦୁଇ ଭାଇଙ୍କ ଭତ୍ତା ପାଇଁ ଆବେଦନ କରାଯିବ | ଏ ନେଇ ବ୍ଲକ ଉନ୍ନୟନ ଅଧିକାରୀ ବେଦବର ପ୍ରଧାନଙ୍କ ମତାମତ ନେବାରେ ସେ ଖୁବ ଶୀଘ୍ର ତଦନ୍ତ କରି ଦୁଇ ଭାଇଙ୍କୁ ଭତ୍ତା ମିଳିବା ନେଇ ପ୍ରତିଶୃତି ଦେଇଛନ୍ତି | ଯେଉଁ ବୟସରେ ପୁଅ ଦୁଇଜଣ ମାଆ ଙ୍କ ଯତ୍ନ ନେବା କଥା ସେହି ବୟସରେ ମାଆ ଦୁଇ ପୁଅଙ୍କ ଯତ୍ନ ନେଉଛି ବୋଲି କହିଛନ୍ତି ସାହି ପଡିଶା | ଯୁବକ ଅବସ୍ଥାରେ ଯଦି ଚିକିତ୍ସାରେ ଅବହେଳା ଘଟେ ତେବେ ଆଗକୁ ସଞ୍ଜୟ ଓ ବସନ୍ତଙ୍କ ଅବସ୍ଥା ଆହୁରି ଖରାପ ଆଡକୁ ଗତି କରିବ | ତେଣୁ ଏମାନଙ୍କୁ ପ୍ରଶାସନ ତରଫରୁ ଭିନ୍ନକ୍ଷମ ଭତ୍ତା ଦେବା ସହ ମେଡିକାଲ ସୁବିଧା ଯୋଗାଇଦେବାକୁ ପରିବାର ଲୋକେ ଆକୁଳ ନିବେଦନ କରିଛନ୍ତି | (ରିପୋର୍ଟ /ଶେଷଦେବ ସାହୁ/ ଗଞ୍ଜାମ ଜିଲ୍ଲା ବ୍ୟୁରୋ)
