No Result
View All Result

ରଣପୁର (ଓଡିଶା ତାଜା ନ୍ୟୁଜ ) ନି.ପ୍ର :- ଓଡ଼ିଶା ସରକାରଙ୍କ ବିଦ୍ୟାଳୟ ଓ ଗଣଶିକ୍ଷା ବିଭାଗ ଓ ଓଡ଼ିଶା ରାଜ୍ୟ ବିଦ୍ୟାଳୟ ସମୂହ କ୍ରୀଡ଼ା ସଂଗଠନ ଏବଂ ନୟାଗଡ଼ ଜିଲ୍ଲା ବିଦ୍ୟାଳୟ ସମୂହ କ୍ରୀଡ଼ା ସଂଗଠନର ମିଳିତ ଆନୁକୂଲ୍ୟରେ ଶନିବାର ଦିନ ରାଜସୁନାଖଳା ସରକାରୀ ଉଚ୍ଚ ବିଦ୍ୟାଳୟର ଖେଳପଡିଆରେ (୧୭ ବର୍ଷରୁ କମ୍ ବାଳକ ଓ ବାଳିକା) ୭୦ତମ ଓଡିଶା ରାଜ୍ୟସ୍ତରୀୟ ବିଦ୍ୟାଳୟ ସମୂହ ନେଟ୍ ବଲ ପ୍ରତିଯୋଗିତା ଉଦଯାପନୀ ସମାରୋହ ଅନୁଷ୍ଠିତ ହୋଇଯାଇଅଛି । ଏହି ଉଦ୍ଯାପନୀ ସମାରୋହ କାର୍ଯ୍ୟକ୍ରମରେ ନୟାଗଡ଼ ଜିଲ୍ଲା ଶିକ୍ଷା ଅଧିକାରୀ ଚିତ୍ତରଞ୍ଜନ ପାଣ୍ଡେଙ୍କ ସଭାପତିତ୍ୱରେ ମୁଖ୍ୟ ଅତିଥିଭାବେ ନୟାଗଡ଼ ଜିଲ୍ଲାପରିଷଦ ଅଧ୍ୟକ୍ଷ ଇଂ ଦେବାଶିଷ ପଟ୍ଟନାୟକ ଓ ସମ୍ମାନିତ ଅତିଥିଭାବେ ନୟାଗଡ଼ ଜିଲ୍ଲା ଅତିରିକ୍ତ ଶିକ୍ଷା ଅଧିକାରୀ ଗୀତାଞ୍ଜଳୀ ସାହୁ, ସନ୍ଧ୍ୟା ରାଣୀ ରାଉତ,

ବନଲତା ବେହେରା, ଜିଲ୍ଲା ପ୍ରାକ୍ତନ ଶାରୀରିକ ଶିକ୍ଷା ଅଧିକାରୀ ତ୍ରିନାଥ ପ୍ରଧାନ, ସମୂହ କ୍ରୀଡା ସଂଗଠନ ସଂପାଦକ ତଥା ରାଜସୁନାଖଳା ସରକାରୀ ଉଚ୍ଚ ବିଦ୍ୟାଳୟର ପ୍ରଧାନ ଶିକ୍ଷକ ପ୍ରକାଶ ଚନ୍ଦ୍ର ସାହୁ,ରଣପୁରବ୍ଲକ ଗୋଷ୍ଠୀ ଶିକ୍ଷା ଅଧିକାରୀ ପିଣ୍ଟୁ ପ୍ରଧାନ, ଓଡ଼ଗାଁ ବ୍ଲକ ଗୋଷ୍ଠୀ ଶିକ୍ଷା ଅଧିକାରୀ ଗିରିଜା ଶଙ୍କର ମହାପାତ୍ର, ପ୍ରାକ୍ତନ ଶାରୀରିକ ଶିକ୍ଷା ଅଧିକାରୀ ଅଶୋକ କୁମାର ନାୟକ ଓ ବିଦ୍ୟାଳୟ ପରିଚାଳନା କମିଟି ସଭାପତି ସୁଦର୍ଶନ ମହାପାତ୍ର ପ୍ରମୁଖ ଯୋଗଦେଇ କାର୍ଯ୍ୟକ୍ରମକୁ ଶୁଭ ଉଦଘାଟନ ସହିତ କ୍ରୀଡ଼ାବିତମାନଙ୍କୁ ଉତ୍ସାହିତ କରିଥିଲେ।ପ୍ରତିଯୋଗୀମାନଙ୍କ ସମାବେଶ, କ୍ରୀଡାବିତ୍ତମାନଙ୍କ ଦ୍ବାରା ସମବେତ ପଦ ସଞ୍ଚାଳନ ଓ ଅତିଥିମାନଙ୍କ ଦ୍ବାରା ରାଜ୍ୟ ଏବଂ ଜିଲ୍ଲା କ୍ରୀଡା ପତାକା ଅବତରଣ ହୋଇଥିଲା । ବିଦ୍ୟାଳୟର ଛାତ୍ରୀମାନଙ୍କ ଦ୍ୱାରା ସ୍ୱାଗତ ସଂଗୀତ ପରିବେଶ କରାଯାଇଥିଲା।

ଶିକ୍ଷକ ଅଜୟ କୁମାର ପ୍ରଧାନ ଓ ନମ୍ରତା ସମଦର୍ଶିନୀ ପ୍ରମୁଖ ମିଳିତ ଭାବେ ଅତିଥିମାନଙ୍କର ପରିଚୟ ପ୍ରଧାନ କରି ମଞ୍ଚ ପରିଚାଳନା କରିଥିଲେ। ଏହି କାର୍ଯ୍ୟକ୍ରମରେ ନୟାଗଡ଼, ଖୋର୍ଦ୍ଧା, ନବରଙ୍ଗପୁର, କଟକ, କେନ୍ଦ୍ରାପଡ଼ା, କେନ୍ଦୁଝର, ସୁନ୍ଦରଗଡ,ନୂଆପଡା, ଜଗତସିଂହପୁର,ଯାଜପୁର, ବୌଦ୍ଧ, ଢେଙ୍କାନାଳ, ଭଦ୍ରକ, କୋରାପୁଟ, ମାଲକାନଗିରି ଓ ଗଞ୍ଜାମ ପ୍ରମୁଖ ଜିଲାରୁ ୧୬୫ଜଣ ବାଳକ ଓ ୧୨୬ଜଣ ବାଳିକା କ୍ରୀଡା ପ୍ରତିଯୋଗୀତାରେ ଅଂଶ ଗ୍ରହଣ କରିଥିଲେ । ରାଜ୍ୟସ୍ତରୀୟ ବିଦ୍ୟାଳୟ ସମୂହ ନେଟବଲ ପ୍ରତିଯୋଗିତାରେ ବାଳକ ବିଭାଗ ନୟାଗଡ଼ ଜିଲ୍ଲା ଚମ୍ପିୟାନ ହୋଇଥିବାବେଳେ ବାଳକ ବିଭାଗ କଟକ ଜିଲ୍ଲା ରନର୍ସ ଅଫ ହୋଇଥିଲା । ବାଳିକା ବିଭାଗରେ କଟକ ଜିଲ୍ଲା ଚମ୍ପିୟାନ ହୋଇଥିବାବେଳେ ବାଳିକା ବିଭାଗ ନୟାଗଡ଼ ଜିଲ୍ଲା ରନର୍ସ ଅଫ ହୋଇଥିଲେ । ଉଭୟ ଜିଲ୍ଲାର ବିଜେତା ଓ ଉପବିଜେତା ଦଳକୁ ଅତିଥିମାନଙ୍କ ଦ୍ୱାରା ଟ୍ରଫି ସହିତ ପୁରସ୍କାର ପ୍ରଦାନ କରାଯାଇଥିଲା ।

ଏହି ଦୁଇ ଜିଲ୍ଲାର ଖେଳାଳିମାନେ ଜାତୀୟସ୍ତରୀୟ ପ୍ରତିଯୋଗିତାରେ ଭାଗ ନେଇ ଓଡ଼ିଶାର ଗୌରବ ଆଣିବେ ବୋଲି ମୁଖ୍ୟଅତିଥି ଶ୍ରୀ ପଟ୍ଟନାୟକ ଆହ୍ୱାନ ଦେଇଥିଲେ। ଏହି ଖେଳ ପ୍ରତିଯୋଗିତାକୁ ୪ଜଣ କୋଚ, ୩୯ ପରିଚାଳକ ଓ ୮ଜଣ ବ୍ଲକ କ୍ରୀଡା ସମ୍ପାଦକ, ନୟାଗଡ଼ ଜିଲ୍ଲାର ସମସ୍ତ ବିଦ୍ୟାଳୟର ପ୍ରଧାନ ଶିକ୍ଷକ, ରଣପୁର ବ୍ଲକର ସମସ୍ତ ଖେଳ ଶିକ୍ଷକ, ରାଜସୁନାଖଳା ସରକାରୀ ଉଚ୍ଚ ବିଦ୍ୟାଳୟର ଶିକ୍ଷକ/ଶିକ୍ଷୟିତ୍ରୀ ଓ ସରସ୍ବତୀ ଶିଶୁ ବିଦ୍ୟାମନ୍ଦିରର ସମସ୍ତ ଆଚାର୍ଯ୍ୟ ଓ ଆଚାର୍ଯ୍ୟମାନେ ସହଯୋଗ କରି ପରିଚାଳନା କରିଥିଲେ। ପତାକା ଅବତରଣ ଓ ସମାପ୍ତି ଘୋଷଣାପରେ ଅତିଥିମାନେ କ୍ରୀଡ଼ା ପତାକା ଅବତରଣ କରିଥିଲେ। ପରିଶେଷରେ ସମୂହ କ୍ରୀଡା ସଂଗଠନ ସଂପାଦକ ତଥା ରାଜସୁନାଖଳା ସରକାରୀ ଉଚ୍ଚ ବିଦ୍ୟାଳୟର ପ୍ରଧାନ ଶିକ୍ଷକ ପ୍ରକାଶ ଚନ୍ଦ୍ର ସାହୁ ସମସ୍ତ କ୍ରୀଡ଼ାବିତ, ଖେଳ ଶିକ୍ଷକ, ପ୍ରଧାନ ଶିକ୍ଷକ ଓ ନିମନ୍ତ୍ରିତ ଅତିଥିମାନଙ୍କୁ ଧନ୍ୟବାଦ ଅର୍ପଣ କରିଥିଲେ ।

No Result
View All Result