ଭୁବନେଶ୍ୱର (ଓଡ଼ିଶା ତାଜା ନ୍ୟୁଜ) (ନିପ୍ର) :- ଭାରତୀୟ ଅର୍ଥନୀତିରେ ଷ୍ଟାର୍ଟଅପ୍ ଗୁଡ଼ିକ ଏବେ ବିକାଶର ମୁଖ୍ୟ ଇଞ୍ଜିନ୍ ପାଲଟିଛନ୍ତି । ଏହି ପରିପ୍ରେକ୍ଷୀରେ, ଆଗାମୀ ନଭେମ୍ବର ୧୪ ଏବଂ ୧୫ ତାରିଖରେ ଭୁବନେଶ୍ୱରସ୍ଥିତ ହୋଟେଲ୍ କ୍ରିଷ୍ଟାଲ୍ କ୍ରାଉନ୍ ଠାରେ ‘ସ୍କେଲଅପ୍ ଇଣ୍ଡିଆ ସମ୍ମିଟ୍ (SIS) ୨୦୨୬’ ଅନୁଷ୍ଠିତ ହେବା ଏକ ସ୍ୱାଗତଯୋଗ୍ୟ ତଥା ଐତିହାସିକ ପଦକ୍ଷେପ। CNOX ଦ୍ୱାରା ଆୟୋଜିତ ଏହି ବିଶାଳ ସମ୍ମିଳନୀ, ଉଦ୍ୟୋଗୀ, ନୀତି ନିର୍ଦ୍ଧାରକ ଏବଂ ନିବେଶକମାନଙ୍କୁ ଗୋଟିଏ ମଞ୍ଚରେ ଏକାଠି କରି ଭାରତୀୟ ଷ୍ଟାର୍ଟଅପ୍ ଗୁଡ଼ିକୁ ସଠିକ୍ ପୁଞ୍ଜି ଓ ଅନୁକୂଳ ପରିବେଶ ମାଧ୍ୟମରେ ବିଶ୍ୱସ୍ତରରେ ପହଞ୍ଚାଇବା ପାଇଁ ଏକ ମିଳିତ ଲକ୍ଷ୍ୟ ନେଇ ଆଗଉଛି ।
ଦେଶ ଯେତେବେଳେ ‘ବିକଶିତ ଭାରତ ୨୦୪୭’ ର ସ୍ୱପ୍ନ ଦେଖୁଛି, ଓଡ଼ିଶା ମଧ୍ୟ ସମାନ ଦୃଢ଼ତାର ସହ ‘ବିକଶିତ ଓଡ଼ିଶା’ ଗଠନ ଦିଗରେ ଦ୍ରୁତ ପଦକ୍ଷେପ ନେଉଛି। ଏହି ସନ୍ଧିକ୍ଷଣରେ ନୂଆ ପିଢ଼ିର ଉଦ୍ୟୋଗୀମାନଙ୍କୁ ବାଟ ଦେଖାଇବା ପାଇଁ ଏହି ସମ୍ମିଟ୍ ମୁଖ୍ୟତଃ SCALE ଅର୍ଥାତ୍ ସପୋର୍ଟ, କ୍ୟାପିଟାଲ, ଆକ୍ସେଲରେସନ୍, ଲର୍ଣ୍ଣିଂ ଏବଂ ଇକୋସିଷ୍ଟମ୍ ଭଳି ପାଞ୍ଚଟି ମୂଳ ସ୍ତମ୍ଭ ଉପରେ କାର୍ଯ୍ୟ କରିବ। ବ୍ୟବସାୟିକ ଅଭିନବ ଚିନ୍ତାଧାରାକୁ କେବଳ ଆଲୋଚନାରେ ସୀମିତ ନରଖି ତାହାକୁ ସ୍ଥାୟୀ ପ୍ରଗତି ଓ ସଫଳତାରେ ପରିଣତ କରିବା ଦିଗରେ ଏହା ଏକ ବଳିଷ୍ଠ ମାଧ୍ୟମ ସାଜିବ ।
