- ବିଜେପି ସରକାରଙ୍କ ହାତ ବାରିସି ସାଜିଛି ପୋଲିସ ପ୍ରଶାସନ
ଭୁବନେଶ୍ୱର (ଓଡିଶା ତାଜା ନ୍ୟୂଜ ) ନି.ପ୍ର :- ପୁରୀ ଜିଲ୍ଲାର ପିପିଲି ଅଞ୍ଚଳର ସତ୍ୟବାଦୀ ବ୍ଲକ ଅଧ୍ୟକ୍ଷଙ୍କ କାର୍ଯ୍ୟାଳୟରେ ବିଜେପି କର୍ମୀଙ୍କ ଦ୍ୱାରା ଭଙ୍ଗାରୁଜା କରାଯାଇଛି । ଯାହାକୁ ବିଜେଡ଼ି ପକ୍ଷରୁ ଘୋର ନିନ୍ଦା କରାଯାଇଛି । ଶଙ୍ଖ ଭବନରେ ଆୟୋଜିତ ସାମ୍ବାଦିକ ସମ୍ମିଳନୀରେ ଉପସଭାପତି ଶ୍ରୀ ସଞ୍ଜୟ ଦାସବର୍ମା ଓ ରାଜ୍ୟସଭା ସାଂସଦ ଶ୍ରୀ ସୁଭାଶିଷ ଖୁଣ୍ଟିଆ ବିଜେପି ସରକାରଙ୍କୁ ସମାଲୋଚନା କରିଛନ୍ତି । ଶ୍ରୀ ଦାସବର୍ମା କହିଛନ୍ତି ଯେ, ବିଜେପି ସରକାର ଅପରାଧିକ କାର୍ଯ୍ୟକଳାପକୁ ପ୍ରୋତ୍ସାହିତ କରୁଛି । ଯାହାକୁ ନେଇ ରାଜ୍ୟ ବ୍ୟାପି ଆଇନ ଶୃଙ୍ଖଳା ପରିସ୍ଥିତି ବିଗିଡି ଯାଇଛି । ଯାହାକି ଗଣତନ୍ତ୍ର ପାଇଁ ଶୁଭଙ୍କର ନୁହେଁ । ବିଜୁ ଜନତା ଦଳ ପକ୍ଷରୁ ଏହାକୁ ତୀବ୍ର ଭାବେ ନିନ୍ଦା କରିଛନ୍ତି । କାର୍ଯ୍ୟାଳୟର ଆସବାବପତ୍ର ଓ ଅନ୍ୟାନ୍ୟ ସମ୍ପତ୍ତି ନଷ୍ଟ କରାଯିବା ସହ ଗୁରୁତ୍ୱପୂର୍ଣ୍ଣ ସରକାରୀ କାଗଜପତ୍ର ଏଣେତେଣେ ଫିଙ୍ଗାଯାଇଥିବା ଅଭିଯୋଗ ଅତ୍ୟନ୍ତ ଉଦ୍ବେଗଜନକ । ଏହା ଗଣତାନ୍ତ୍ରିକ ଅନୁଷ୍ଠାନ ପ୍ରତି ସମ୍ମାନ, ଆଇନର ଶାସନ ଏବଂ ସରକାରୀ ସମ୍ପତ୍ତିର ସୁରକ୍ଷାକୁ ନେଇ ଗମ୍ଭୀର ପ୍ରଶ୍ନ ଉଠାଇଛି । ସରକାରୀ କାର୍ଯ୍ୟାଳୟ ହେଉଛି ଜନସାଧାରଣଙ୍କ ଅନୁଷ୍ଠାନ । ଏହାକୁ ରାଜନୈତିକ ବିବାଦ, ଭୟଭୀତ କରିବା କିମ୍ୱା ହିଂସାର କେନ୍ଦ୍ରରେ ପରିଣତ କରାଯିବା ଉଚିତ ନୁହେଁ । ସେ ଆହୁରି କହିଛନ୍ତି ଯେ, ରାଜନୈତିକ ମତଭେଦ କିମ୍ୱା ବିଚାରଧାରାଗତ ପାର୍ଥକ୍ୟକୁ ଆଲୋଚନା ଏବଂ ଆଇନସମ୍ମତ ଗଣତାନ୍ତ୍ରିକ ପଦ୍ଧତି ମାଧ୍ୟମରେ ସମାଧାନ କରାଯିବା ଉଚିତ । ଆଇନ ହାତକୁ ନେଇ ଭଙ୍ଗାରୁଜା, ଭୟଭୀତ କରିବା କିମ୍ୱା ସରକାରୀ ସମ୍ପତ୍ତି ନଷ୍ଟ କରିବା ଆଦୌ ଗ୍ରହଣୀୟ ନୁହେଁ । ଏପରି କାର୍ଯ୍ୟ ଗଣତନ୍ତ୍ର ଓ ସାମ୍ୱିଧାନିକ ଶାସନର ମୌଳିକ ନୀତିର ପରିପନ୍ଥୀ । ଗୁରୁତ୍ୱପୂର୍ଣ୍ଣ ସରକାରୀ କାଗଜପତ୍ରକୁ ଫିଙ୍ଗି ଦିଆଯିବା ଏବଂ ସେଗୁଡ଼ିକର ସମ୍ଭାବ୍ୟ ଅବ୍ୟବସ୍ଥିତ ପରିଚାଳନା ନେଇ ଅଭିଯୋଗ ଅଧିକ ଚିନ୍ତାଜନକ । ଏହାଦ୍ୱାରା ସରକାରୀ କାର୍ଯ୍ୟ ପ୍ରଭାବିତ ହେବା ସହ ସରକାରୀ ନଥିପତ୍ରର ସୁରକ୍ଷା ଓ ଅଖଣ୍ଡତା ବିପନ୍ନ ହୋଇପାରେ । ତେଣୁ କାର୍ଯ୍ୟାଳୟର କ୍ଷୟକ୍ଷତି ଏବଂ ସରକାରୀ କାଗଜପତ୍ରର ସ୍ଥିତି ସମ୍ପର୍କରେ ତୁରନ୍ତ ଉପଯୁକ୍ତ ଆକଳନ କରାଯିବା ଆବଶ୍ୟକ । ପୋଲିସ ପ୍ରଶାସନ ରାଜ୍ୟ ସରକାରଙ୍କ ହାତ ବାରିସି ସାଜି କାର୍ଯ୍ୟ ନକରି ନିରପେକ୍ଷ ତଦନ୍ତ କରି ପଦକ୍ଷେପ ଗ୍ରହଣ କରନ୍ତୁ । ଏମିତି ହେଲେ ସତ୍ୟବାଦୀରେ ଆଇନ ବିଧି ବ୍ୟବସ୍ଥା ନିୟନ୍ତ୍ରଣରେ ରହିବ ନାହିଁ । ବିଜେପି ସରକାର ଏବଂ ସମ୍ପୃକ୍ତ କର୍ତ୍ତୃପକ୍ଷଙ୍କୁ ଏହି ଘଟଣାର ସ୍ୱଚ୍ଛ ଓ ନିରପେକ୍ଷ ତଦନ୍ତ ସୁନିଶ୍ଚିତ କରିବାକୁ ଦାବି କରିଛନ୍ତି ।
ତଦନ୍ତରେ ଯେଉଁମାନେ ଦୋଷୀ ବୋଲି ପ୍ରମାଣିତ ହେବେ, ସେମାନଙ୍କୁ କୌଣସି ରାଜନୈତିକ ପକ୍ଷପାତ କିମ୍ୱା ଭେଦଭାବ ବିନା ଆଇନ ଅନୁଯାୟୀ କଠୋର ଦଣ୍ଡ ଦିଆଯିବା ଆବଶ୍ୟକ । ଏହା ସହିତ, ନିରପେକ୍ଷ ତଦନ୍ତ ପାଇଁ ଉପଲବ୍ଧ ସମସ୍ତ ସିସିଟିଭି ଫୁଟେଜ୍ ଏବଂ ଅନ୍ୟାନ୍ୟ ପ୍ରାସଙ୍ଗିକ ପ୍ରମାଣକୁ ସୁରକ୍ଷିତ ରଖିବାକୁ ଦଳ ଦାବି କରିଛି । ସରକାରୀ ସମ୍ପତ୍ତିର କ୍ଷୟକ୍ଷତିର ପରିମାଣ ଆକଳନ କରିବା, କାର୍ଯ୍ୟାଳୟର ସୁରକ୍ଷା ବ୍ୟବସ୍ଥାର ସମୀକ୍ଷା କରିବା ଏବଂ ଭବିଷ୍ୟତରେ ଏପରି ଘଟଣାର ପୁନରାବୃତ୍ତି ରୋକିବା ପାଇଁ ଉପଯୁକ୍ତ ପଦକ୍ଷେପ ନେବାକୁ ଦଳ ଦାବି କରିଛି । ଏହି ଘଟଣା ସରକାରୀ କାର୍ଯ୍ୟାଳୟ ଏବଂ ନିର୍ବାଚିତ ପ୍ରତିନିଧିଙ୍କ ସୁରକ୍ଷାକୁ ନେଇ ମଧ୍ୟ ଗମ୍ଭୀର ଉଦ୍ବେଗ ସୃଷ୍ଟି କରିଛି । ରାଜନୈତିକ ମତଭେଦ ଯେପରି ହିଂସା, ଧମକ କିମ୍ୱା ଭୟଭୀତ କରିବା ଭଳି ଘଟଣାରେ ପରିଣତ ନହୁଏ, ସେଥିପାଇଁ ରାଜ୍ୟ ସରକାର କି ପଦକ୍ଷେପ ନେବେ, ତାହା ସ୍ପଷ୍ଟ କରିବା ଉଚିତ । ସରକାରୀ ଅନୁଷ୍ଠାନ, ସରକାରୀ ନଥିପତ୍ର ଏବଂ ନିର୍ବାଚିତ ପ୍ରତିନିଧିଙ୍କ ସୁରକ୍ଷା ପାଇଁ ଆବଶ୍ୟକ ସ୍ଥଳେ ପର୍ଯ୍ୟାପ୍ତ ସୁରକ୍ଷା ବ୍ୟବସ୍ଥା କରାଯିବା ଉଚିତ । ବିଜୁ ଜନତା ଦଳ ପୁନର୍ବାର ସ୍ପଷ୍ଟ କରିଛି ଯେ, କୌଣସି ବ୍ୟକ୍ତି କିମ୍ୱା ରାଜନୈତିକ ସଂଗଠନ ଆଇନର ଉଦ୍ଧ୍ୱର୍ରେ ନୁହନ୍ତି । ଓଡ଼ିଶାବାସୀ ଶାନ୍ତି, ସୁଶାସନ, ଉତ୍ତରଦାୟିତ୍ୱ ଏବଂ ଗଣତାନ୍ତ୍ରିକ ଅନୁଷ୍ଠାନ ପ୍ରତି ସମ୍ମାନ ଆଶା କରନ୍ତି । ନ୍ୟାୟ ସୁନିଶ୍ଚିତ କରିବା ପାଇଁ କର୍ତ୍ତୃପକ୍ଷ ତୁରନ୍ତ ପଦକ୍ଷେପ ନେବା ସହ ନିରପେକ୍ଷ ଓ ନ୍ୟାୟସଙ୍ଗତ ଭାବେ ତଦନ୍ତ ସମ୍ପନ୍ନ କରିବାକୁ ଦଳ ଆହ୍ୱାନ କରିଛି । ବିଜୁ ଜନତା ଦଳ ଏହି ଘଟଣାର ନିରପେକ୍ଷ ତଦନ୍ତ, ଦୋଷୀ ସାବ୍ୟସ୍ତ ବ୍ୟକ୍ତିଙ୍କ ବିରୋଧରେ କଠୋର ଆଇନଗତ କାର୍ଯ୍ୟାନୁଷ୍ଠାନ ଏବଂ ସରକାରୀ ସମ୍ପତ୍ତିର ସୁରକ୍ଷା ସହ ଗଣତାନ୍ତ୍ରିକ ଅନୁଷ୍ଠାନ ଗୁଡ଼ିକର ମର୍ଯ୍ୟାଦା ଅକ୍ଷୁର୍ଣ୍ଣ ରଖିବା ପାଇଁ ପ୍ରଭାବଶାଳୀ ପଦକ୍ଷେପ ଗ୍ରହଣ କରିବାକୁ ଦାବି କରିଛି । ସାଂସଦ ଶ୍ରୀ ଖୁଣ୍ଟିଆ କହିଛନ୍ତି ଯେ, ଗଣତନ୍ତ୍ର ନିୟମ ଅନୁସାରେ ସରକାର ପରିବର୍ତନ ହେବ । କିନ୍ତୁ ବିଜେପି ସରକାର ତାହାକୁ ବୁଝି ପାରୁନାହିଁ ।
ହିଂସା ଓ ଅପରାଧ କାର୍ଯ୍ୟ କଳାପ ବୃଦ୍ଧି କରାଇ ନିଜ ପତିଆରା ଦେଖାଉଛନ୍ତି । ସତ୍ୟବାଦୀ ପରି ତ୍ୟାଗ ଓ ଅହିଂସାର ମାଟିରେ ହିଂସା କାଣ୍ଡ ଘଟାଇଉଛନ୍ତି । ରାଜ୍ୟବାସୀ ଡବଲ ଇଞ୍ଜିନ ସରକାରଙ୍କ ବିରୋଧ ହୋଇ ପଡିଛନ୍ତି । ଯାହାକୁ ନେଇ ସେମାନେ ବିଚଳିତ ହୋଇ ଭୁଲ ପଦକ୍ଷେପ ଗ୍ରହଣ କରୁଛନ୍ତି । ନିର୍ବାଚନ ପ୍ରତିଶୃତି ପୂରଣ କରିବାରେ ବିଫଳ ହେବାରୁ ଲୋକଙ୍କ ବିଶ୍ୱାସ ହରାଇଛନ୍ତି । ବିଜେଡି ପ୍ରତି ଲୋକଙ୍କ ଅକୁଣ୍ଠ ସମର୍ଥନ ଦେଖି ବିଜେପି ସରକାରଙ୍କ ମୁଣ୍ଡ କାମ ଦେଉନି । ଅସହିଷ୍ଣୁ ଭାବନା ପୋଷଣ କରି ଅପରାଧ ଭିଆଇବାରେ ଲାଗି ପଡିଛନ୍ତି । ପୂର୍ବତନ ମୁଖ୍ୟମନ୍ତ୍ରୀ ଶ୍ରୀଯୁକ୍ତ ନବୀନ ପଟ୍ଟନାୟକଙ୍କ ଲୋକାଭିମୁଖି ଯୋଜନାକୁ ବନ୍ଦ କରିବା ଦ୍ୱାରା ଲୋକେ ବିଜେପି ସରକାର ପ୍ରତି ବିମୁଖ ହୋଇଛନ୍ତି । ଏବେ ଲୋକେ ବିଜେଡି ଶାସନ କାଳକୁ ମନେ ପକାଉଛନ୍ତି । ଡବଲ ଇଞ୍ଜିନ ସରକାରଙ୍କୁ ଲୋକେ ଯେଉଁ ଭରସା କରି ଭୋଟ ଦେଇଥିଲେ ତାହା ଆଜି ମିଥ୍ୟା ପ୍ରମାଣିତ ହୋଇଛି । ଡବଲ ଇଞ୍ଜିନ ସରକାରରେ ଓଡ଼ିଶା ଉନ୍ନତି ବଦଳରେ ଅବନତି ଆଡ଼କୁ ଗତି କରୁଛି । ଅପରାଧର ସାହାରା ନେଉଥିବା ବେଳେ ପଞ୍ଚଶଖାଙ୍କ ମାଟି ସତ୍ୟବାଦୀରେ ବି ଅପରାଧ ଭିଆଇବାରେ ଲାଗି ପଡିଛନ୍ତି । ଯାହାକି ଅତ୍ୟନ୍ତ ନିନ୍ଦନୀୟ । ବ୍ଲକ କାର୍ଯ୍ୟାଳୟକୁ ଆସି ଗ୍ରାମବାସୀ ମାନେ ଅଭିଯୋଗ ଜଣାଉଥିବା ବେଳେ ତାହାକୁ ଭଙ୍ଗାରୁଜା କରିଛନ୍ତି । ରାଜନୈତିକ ହିଂସା, ଧମକ କିମ୍ୱା ଭୟଭୀତ କରିବା ଭଳି ଘଟଣା ବିଜେପି ସରକାରଙ୍କ ଇଙ୍ଗିତରେ ହେଉଛି । ଯାହାକି ଗଣତନ୍ତ୍ର ପାଇଁ ଜମାରୁ ଗ୍ରହଣୀୟ ନୁହେଁ । ସତ୍ୟବାଦୀ ବ୍ଲକ ଅଧ୍ୟକ୍ଷଙ୍କ କାର୍ଯ୍ୟାଳୟରେ ଭଙ୍ଗାରୁଜା ଘଟଣାକୁ ତୀବ୍ର ନିନ୍ଦା କରିଛନ୍ତି । ସତ୍ୟବାଦୀ ପୋଲିସ ବିଜେପି ସରକାରଙ୍କ ହାତ ବାରିସି ସାଜି କାର୍ଯ୍ୟ ନକରି ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କହିଛନ୍ତି ।
