ବିଶ୍ୱ ଦକ୍ଷତା ପ୍ରତିଯୋଗିତାରେ ଭାରତର ପ୍ରତିନିଧିତ୍ୱ କରିବେ, ଗୌରବାନ୍ୱିତ ରଣପୁରବାସୀ
ରଣପୁର (ଓଡ଼ିଶା ତାଜା ନ୍ୟୁଜ) (ନିପ୍ର) :- ନୟାଗଡ଼ ଜିଲ୍ଲାର ରଣପୁର ବ୍ଳକ, ବୃନ୍ଦାବନପୁର ଗ୍ରାମ ମାଟି ଆଜି ପୁଣିଥରେ ଗୌରବରେ ଗର୍ବିତ ହୋଇଛି । ଏହି ଶହୀଦ ମାଟିର ସୁଯୋଗ୍ୟ ସନ୍ତାନ ଶ୍ରୀମାନ ଜଗନ୍ନାଥ ମିଶ୍ର ନିଜର ଅଦମ୍ୟ ପରିଶ୍ରମ, ଦକ୍ଷତା, ନିଷ୍ଠା ଓ ପ୍ରତିଭା ବଳରେ ଜାତୀୟସ୍ତରରେ ନିଜର ସ୍ୱତନ୍ତ୍ର ପରିଚୟ ସୃଷ୍ଟି କରିବା ସହିତ ଏବେ ଅନ୍ତର୍ଜାତୀୟ ମଞ୍ଚରେ ଭାରତର ଗୌରବ ବଢ଼ାଇବାକୁ ଯାଉଛନ୍ତି ।
ଚୀନର ସାଙ୍ଘାଇ ସହରରେ ଅନୁଷ୍ଠିତ ହେବାକୁ ଯାଉଥିବା ବିଶ୍ୱ ଦକ୍ଷତା ପ୍ରତିଯୋଗିତାରେ ଭାରତ ପକ୍ଷରୁ ପ୍ରତିନିଧିତ୍ୱ କରିବା ପାଇଁ ଜଗନ୍ନାଥ ମିଶ୍ର ଯୋଗ୍ୟ ବିବେଚିତ ହୋଇଥିବା ଖବର ସମଗ୍ର ରଣପୁର ଅଞ୍ଚଳରେ ଆନନ୍ଦ ଓ ଗର୍ବର ପରିବେଶ ସୃଷ୍ଟି କରିଛି। ଜଣେ ସାଧାରଣ ଗ୍ରାମୀଣ ପରିବେଶରୁ ଆସି ନିଜ ପ୍ରତିଭା ଓ କଠିନ ପରିଶ୍ରମ ମାଧ୍ୟମରେ ବିଶ୍ୱସ୍ତରୀୟ ମଞ୍ଚରେ ଦେଶର ପ୍ରତିନିଧି ହେବାର ସୁଯୋଗ ପାଇବା ନିଶ୍ଚିତ ଭାବେ ଏକ ବିରଳ ସଫଳତା ।
ଜଗନ୍ନାଥଙ୍କ ଏହି ସଫଳତା କେବଳ ତାଙ୍କର ବ୍ୟକ୍ତିଗତ କୃତିତ୍ୱ ନୁହେଁ; ଏହା ତାଙ୍କ ପରିବାର, ବୃନ୍ଦାବନପୁର ଗ୍ରାମ, ରଣପୁର ଅଞ୍ଚଳ ଏବଂ ସମଗ୍ର ନୟାଗଡ଼ ଜିଲ୍ଲା ପାଇଁ ଏକ ବଡ଼ ଗୌରବର ବିଷୟ। ତାଙ୍କର ଏହି ଉପଲବ୍ଧି ଅନେକ ଯୁବପିଢ଼ିଙ୍କୁ ନୂଆ ସ୍ୱପ୍ନ ଦେଖିବା ଓ ସେହି ସ୍ୱପ୍ନକୁ ସାକାର କରିବା ପାଇଁ ଅକ୍ଲାନ୍ତ ପରିଶ୍ରମ କରିବାର ପ୍ରେରଣା ଦେବ। ରଣପୁର ଅଞ୍ଚଳର ଐତିହ୍ୟ,
ସଂସ୍କୃତି ଓ ସଂଗ୍ରାମର ପରମ୍ପରା ସହିତ ଏହି ମାଟିର ଅନେକ ସୁଯୋଗ୍ୟ ସନ୍ତାନ ବିଭିନ୍ନ କ୍ଷେତ୍ରରେ ନିଜର ପ୍ରତିଭାର ପରିଚୟ ଦେଇଆସିଛନ୍ତି । ସେହି ଗୌରବମୟ ପରମ୍ପରାରେ ଜଗନ୍ନାଥ ମିଶ୍ରଙ୍କ ନାମ ଯୋଡ଼ିହେବା ନିଶ୍ଚିତ ଭାବେ ଏକ ଗର୍ବର ବିଷୟ।ବୃନ୍ଦାବନପୁରର ଏହି ଯୁବ ପ୍ରତିଭା ଏବେ ଦେଶର ସୀମା ଅତିକ୍ରମ କରି ବିଶ୍ୱ ମଞ୍ଚରେ ନିଜର ଦକ୍ଷତା ପ୍ରଦର୍ଶନ କରିବାକୁ ଯାଉଛନ୍ତି ।
ତେଣୁ ତାଙ୍କର ଏହି ସଫଳତାରେ ଗ୍ରାମବାସୀଙ୍କଠାରୁ ଆରମ୍ଭ କରି ରଣପୁର ଅଞ୍ଚଳର ବୁଦ୍ଧିଜୀବୀ, ଶିକ୍ଷାବିତ୍, ଯୁବପିଢ଼ି ଓ ସଚେତନ ନାଗରିକମାନଙ୍କ ମଧ୍ୟରେ ଖୁସିର ଲହରୀ ଖେଳିଯାଇଛି । ସାଙ୍ଘାଇର ଅନ୍ତର୍ଜାତୀୟ ମଞ୍ଚରେ ଭାରତର ପ୍ରତିନିଧି ଭାବେ ଜଗନ୍ନାଥ ନିଜର ଦକ୍ଷତା ପ୍ରଦର୍ଶନ କରିବାକୁ ଯାଉଥିବାରୁ ଏହା କେବଳ ତାଙ୍କ ପାଇଁ ନୁହେଁ, ତାଙ୍କ ପରିବାର ଓ ମାଟି ପାଇଁ ମଧ୍ୟ ଏକ ସ୍ମରଣୀୟ ମୁହୂର୍ତ୍ତ ।
ଭାରତର ତ୍ରିରଙ୍ଗାକୁ ନିଜ ପ୍ରତିଭା ମାଧ୍ୟମରେ ବିଶ୍ୱ ମଞ୍ଚରେ ଗୌରବାନ୍ୱିତ କରିବାର ଏହି ସୁଯୋଗ ତାଙ୍କ ଜୀବନର ଏକ ଅମୂଲ୍ୟ ଅଧ୍ୟାୟ ହୋଇ ରହିବ । “ରଣପୁର ମାଟିରୁ ସାଙ୍ଘାଇ ପର୍ଯ୍ୟନ୍ତ- ଜଗନ୍ନାଥ ମିଶ୍ରଙ୍କ ଏହି ଯାତ୍ରା ନିଶ୍ଚିତ ଭାବେ ଆମ ଅଞ୍ଚଳର ଯୁବପିଢ଼ି ପାଇଁ ଏକ ପ୍ରେରଣାଦାୟୀ ଗାଥା ହୋଇ ରହିବ ।”
