ଶିକ୍ଷୟତ୍ରୀ ବସନ୍ତ ମଞ୍ଜରୀ ଦେବୀଙ୍କ ସେବା ନିବୃତ ସମ୍ବର୍ଦ୍ଧନା ସଭା

ମୟୁରଝାଲିଆ ଉଚ୍ଚ ବିଦ୍ୟାଳୟରେ ଭାବବିହ୍ୱଳ ପରିବେଶ

ରଣପୁର (ଓଡିଶା ତାଜାନ୍ୟୁଜ) (ନି. ପ୍ର) :- ନୟାଗଡ଼ ଜିଲ୍ଲା ରଣପୁର ବ୍ଲକ ଅନ୍ତର୍ଗତ ମୟୂରଝାଲିଆ ନୋଡାଲ ଉଚ୍ଚ ବିଦ୍ୟାଳୟର ସହକାରୀ ଶିକ୍ଷୟିତ୍ରୀ ଶ୍ରୀମତୀ ବସନ୍ତ ମଞ୍ଜରୀ ଦେଇ ଦୀର୍ଘ କର୍ମମୟ ଜୀବନର ସଫଳ ସମାପ୍ତି ପରେ ବିଦ୍ୟାଳୟରୁ ଅବସର ଗ୍ରହଣ କରିଛନ୍ତି। ଏହି ଅବସରରେ ବିଦ୍ୟାଳୟ ପକ୍ଷରୁ ଏକ ଭାବବିହ୍ୱଳ ବିଦାୟକାଳୀନ ସମ୍ବର୍ଦ୍ଧନା ସଭାର ଆୟୋଜନ କରାଯାଇଥିଲା। ନବ ନିଯୁକ୍ତ ପ୍ରଧାନ ଶିକ୍ଷକ ଶ୍ରୀ ମାନସ ରଞ୍ଜନ ମହାପାତ୍ରଙ୍କ ସଭାପତିତ୍ୱରେ ଅନୁଷ୍ଠିତ ଏହି ସମାରୋହରେ ବିଦ୍ୟାଳୟ ପରିଚାଳନା କମିଟିର ସଦସ୍ୟବୃନ୍ଦ, ଶିକ୍ଷକ-ଶିକ୍ଷୟିତ୍ରୀ, ପୁରାତନ ଛାତ୍ରଛାତ୍ରୀ, ଅବସରପ୍ରାପ୍ତ ଶିକ୍ଷକ ଓ ବହୁ ସଂଖ୍ୟକ ବର୍ତ୍ତମାନର ଛାତ୍ରଛାତ୍ରୀ ଯୋଗଦେଇ ଅବସରପ୍ରାପ୍ତ ଶିକ୍ଷୟିତ୍ରୀଙ୍କୁ ଶ୍ରଦ୍ଧା ଓ ସମ୍ମାନ ଜଣାଇଥିଲେ ।

କାର୍ଯ୍ୟକ୍ରମର ଆରମ୍ଭରେ ବିଦ୍ୟାଳୟର କୋମଳମତି ଛାତ୍ରଛାତ୍ରୀମାନେ ମଙ୍ଗଳସଂଗୀତ ପରିବେଷଣ କରି ପରିବେଶକୁ ଆଧ୍ୟାତ୍ମିକ ଓ ଭାବପ୍ରବଣ କରିଥିଲେ। ପରେ ବିଭିନ୍ନ ଛାତ୍ରଛାତ୍ରୀ ନିଜ ଭାଷଣ ମାଧ୍ୟମରେ ଆଦର୍ଶ ଶିକ୍ଷୟିତ୍ରୀ ବସନ୍ତ ମଞ୍ଜରୀଙ୍କ ପ୍ରତି ନିଜର ଶ୍ରଦ୍ଧା, ସ୍ନେହ ଓ କୃତଜ୍ଞତା ପ୍ରକାଶ କରିଥିଲେ। ସେମାନେ କହିଥିଲେ ଯେ, ଗୁରୁମାଙ୍କର ସ୍ନେହ, ଶୃଙ୍ଖଳା ଓ ଆଦର୍ଶ ଶିକ୍ଷାଦାନ ତାଙ୍କ ଜୀବନରେ ସବୁଦିନ ପାଇଁ ପ୍ରେରଣାର ଉତ୍ସ ହୋଇ ରହିବ। ଛାତ୍ରଛାତ୍ରୀଙ୍କ ଭାବପୂର୍ଣ୍ଣ ଅଭିବ୍ୟକ୍ତିରେ ସମଗ୍ର ସଭା ପରିବେଶ ଭାବବିହ୍ୱଳ ହୋଇଉଠିଥିଲା। ସଭାରେ ବକ୍ତବ୍ୟ ରଖି ଶିକ୍ଷକ ଓ ଶିକ୍ଷୟିତ୍ରୀମାନେ ବସନ୍ତ ମଞ୍ଜରୀ ଦେଇଙ୍କୁ ଜଣେ ଅମାୟିକ, ସମୟାନୁବର୍ତ୍ତୀ, କର୍ତ୍ତବ୍ୟପରାୟଣ, ଶିଶୁବତ୍ସଳ, ପରୋପକାରୀ, ମେଳାପୀ, ମିଷ୍ଟଭାଷୀ ଓ ସମସ୍ତଙ୍କ ପ୍ରିୟ ବ୍ୟକ୍ତିତ୍ୱ ଭାବେ ବର୍ଣ୍ଣନା କରିଥିଲେ। 

ବିଶେଷକରି ଯୁବ ଶିକ୍ଷକ-ଶିକ୍ଷୟିତ୍ରୀଙ୍କ ପାଇଁ ସେ ଜଣେ ମାତୃସମ ପ୍ରେରଣାଦାୟୀ ବ୍ୟକ୍ତିତ୍ୱ ଥିଲେ ବୋଲି ସେମାନେ ମତ ରଖିଥିଲେ। ତାଙ୍କ ଅବସର ପରେ ବିଦ୍ୟାଳୟରେ ସୃଷ୍ଟି ହେବାକୁ ଥିବା ଶୂନ୍ୟସ୍ଥାନ ସହଜରେ ପୂରଣ ହେବ ନାହିଁ ବୋଲି ମଧ୍ୟ ମତ ପ୍ରକାଶ ପାଇଥିଲା। ଏହି ଅବସରରେ ମଞ୍ଚାସୀନ ଥିବା ବିଦ୍ୟାଳୟର ପୁରାତନ ଛାତ୍ର ତଥା ଅବସରପ୍ରାପ୍ତ ଶିକ୍ଷକ ଜୟୀରାମ ସାହୁ, ମନୋଜ ପାତ୍ର, ଶିକ୍ଷାବିତ୍ ଭାସ୍କର ଚନ୍ଦ୍ର ପ୍ରଧାନ, ରମେଶ ରାଉତ, ଭାଗ୍ୟଧର ଦଳେଇ ଓ ପୂର୍ଣ୍ଣଚନ୍ଦ୍ର ଛୋଟରାୟ ପ୍ରମୁଖ ବସନ୍ତ ମଞ୍ଜରୀ ଦେଇଙ୍କ କର୍ମନିଷ୍ଠା, ସରଳତା ଓ ଶିକ୍ଷା ପ୍ରତି ଅବଦାନର ଭୂୟସୀ ପ୍ରଶଂସା କରିଥିଲେ ।

ସେମାନେ ତାଙ୍କର ଅବସର ଜୀବନ ସୁସ୍ଥ, ସୁଖମୟ ଓ ଦୀର୍ଘାୟୁ ହେଉ ବୋଲି କାମନା କରିବା ସହ ବିଦ୍ୟାଳୟରେ ଶିକ୍ଷକ ଅଭାବକୁ ଦୃଷ୍ଟିରେ ରଖି ସମୟ ସମୟରେ ଆସି ଛାତ୍ରଛାତ୍ରୀଙ୍କୁ ଶିକ୍ଷାଦାନ କରିବାକୁ ମଧ୍ୟ ଅନୁରୋଧ ଜଣାଇଥିଲେ। ସଭାପତି ତଥା ପ୍ରଧାନ ଶିକ୍ଷକ ଶ୍ରୀ ମାନସ ରଞ୍ଜନ ମହାପାତ୍ର ନିଜ ବକ୍ତବ୍ୟରେ କହିଥିଲେ ଯେ, ଜଣେ ଅଭିଜ୍ଞ ଓ ଆଦର୍ଶ ଶିକ୍ଷୟିତ୍ରୀଙ୍କ ଅବସର ବିଦ୍ୟାଳୟ ପାଇଁ ଏକ ବଡ଼ କ୍ଷତି। ତେବେ ବିଦ୍ୟାଳୟର ସର୍ବାଙ୍ଗୀଣ ଉନ୍ନତି ପାଇଁ ସମସ୍ତଙ୍କ ସହଯୋଗ ଓ ପରାମର୍ଶ ଆବଶ୍ୟକ ବୋଲି ସେ ମତ ପ୍ରକାଶ କରିବା ସହ ବସନ୍ତ ମଞ୍ଜରୀ ଦେଇଙ୍କ ସୁସ୍ଥ, ନିରାମୟ ଓ ସୁଖମୟ ଅବସର ଜୀବନ କାମନା କରିଥିଲେ।

ପରିଶେଷରେ ବିଦ୍ୟାଳୟ ପରିବାର ଓ ଛାତ୍ରଛାତ୍ରୀମାନଙ୍କ ପକ୍ଷରୁ ବସନ୍ତ ମଞ୍ଜରୀ ଦେଇଙ୍କୁ ମାନପତ୍ର, ପୁଷ୍ପଗୁଚ୍ଛ ଓ ବିଭିନ୍ନ ଉପଢୌକନ ପ୍ରଦାନ କରି ସମ୍ମାନିତ କରାଯାଇଥିଲା । ଉତ୍ତରରେ ବସନ୍ତ ମଞ୍ଜରୀ ଦେଇ ସମସ୍ତଙ୍କ ସ୍ନେହ, ସମ୍ମାନ ଓ ସହଯୋଗ ପାଇଁ ଭାବବିହ୍ୱଳ କଣ୍ଠରେ କୃତଜ୍ଞତା ଜଣାଇଥିଲେ ଏବଂ ବିଦ୍ୟାଳୟ ସହ ତାଙ୍କର ସମ୍ପର୍କ ସଦା ଅତୁଟ ରହିବ ବୋଲି ପ୍ରକାଶ କରିଥିଲେ । ଶେଷରେ ଶିକ୍ଷକ ଅଖିଳ ଚରଣ ବେହେରା ଧନ୍ୟବାଦ ଅର୍ପଣ କରିଥିଲେ। ସମସ୍ତଙ୍କ ଶୁଭେଚ୍ଛା ଓ ଆଶୀର୍ବାଦ ମଧ୍ୟରେ କାର୍ଯ୍ୟକ୍ରମର ପରିସମାପ୍ତି ଘଟିଥିଲା । ସମଗ୍ର ସମାରୋହ ଏକ ଭାବପୂର୍ଣ୍ଣ, ସ୍ମରଣୀୟ ଓ ଗୁରୁ-ଶିଷ୍ୟ ସମ୍ପର୍କର ଅନନ୍ୟ ଦୃଷ୍ଟାନ୍ତ ହୋଇ ଉଭୟ ଶିକ୍ଷକ ଓ ଛାତ୍ରଛାତ୍ରୀଙ୍କ ମନରେ ଚିରସ୍ମରଣୀୟ ହୋଇ ରହିବ ।