ସମଲେଶ୍ୱରୀ ପୀଠରେ “ସାତବହନୀ” ଭଜନ ସନ୍ଧ୍ୟା : ଲୋକଗୀତ ଓ ଲୋକବାଦ୍ୟର ଅପୂର୍ବ ସମ୍ମିଶ୍ରଣ

ସମ୍ବଲପୁର (ଓଡିଶା ତାଜାନ୍ୟୁଜ) (ନି. ପ୍ର) :- ସମଲେଶ୍ୱରୀ ଟ୍ରଷ୍ଟ ବୋର୍ଡ ଓ ସମ୍ବଲପୁରର ମିଳିତ କଳାକାରଙ୍କ ସହଯୋଗରେ ସମଲେଶ୍ୱରୀ ମନ୍ଦିର ପରିସରରେ ଆୟୋଜିତ ହୋଇଆସୁଥିବା ମାସିକ ଭଜନ ସନ୍ଧ୍ୟା କାର୍ଯ୍ୟକ୍ରମରେ ରବିବାର ସନ୍ଧ୍ୟାରେ “ସାତବହନୀ” ଶୀର୍ଷକ ଏକ ସ୍ୱତନ୍ତ୍ର ସଙ୍ଗୀତାନୁଷ୍ଠାନ ପରିବେଷଣ କରାଯାଇଥିଲା । ବିଗତ ଆଠ ମାସ ଧରି ପ୍ରତି ମାସର ଦ୍ୱିତୀୟ ଓ ଚତୁର୍ଥ ରବିବାରରେ ଏହି ଭଜନ ସନ୍ଧ୍ୟାର ଆୟୋଜନ କରାଯାଉଛି।ଆଜିର କାଯ୍ୟକ୍ରମ କୁ ସଭାପତି ସଞ୍ଜୟ ବାବୁ ଉଦ୍ଘାଟନ କରିଥିଲେ ।

ଏହି ଭଜନ ସନ୍ଧ୍ୟା ରେ ଟ୍ରଷ୍ଟ ବୋର୍ଡ ସଦସ୍ୟ ପ୍ରଫୁଲ୍ଲ ହୋତା , ସନ୍ତୋଷ ପ୍ରୂସେଠ, ଦେବ କୁମାର ଅଜମେରୀଆ ତଥା ଶ୍ୟାମ ସୁନ୍ଦର ଧର , ସୁକାନ୍ତ କର , ମୋହିତ ସ୍ୱାଇଁ , ତ୍ରିଲୋଚନ ତ୍ରୀପାଠୀ , ରତନ ଶର୍ମା , ସୁଶୀଲ ଦାଶ , ରାଜୁ ମିଶ୍ର , ସୁଶାନ୍ତ ମିଶ୍ର ଓ ଅପର୍ଣ୍ଣା ପାଢ଼ୀ , ଦୀପାଳି ଚୌଧୁରୀ ନରେଶ ସେଠ ପ୍ରମୁଖ ଉପସ୍ଥିତ ରହି କଳାକାର ମାନଙ୍କୁ ଉତ୍ସାହିତ କରିଥିଲେ । ଆଜିର କାର୍ଯ୍ୟକ୍ରମ “ଶିରି ସମଲେଇ” କାବ୍ୟକୁ ଆଧାର କରି “ସାତବହନୀ”ର ଉପସ୍ଥାପନା କରାଯାଇଥିଲା ।

ଆଜି ଭଜନ ସନ୍ଧ୍ୟାରେ ଅଞ୍ଚଳର ‘ସାତବହନୀ’ କୁହାଯାଉଥିବା ଦେବୀ ମା ସୁରେଶ୍ୱରୀ, ମା ମାଣିକେଶ୍ବରୀ, ମା ଚନ୍ଦ୍ରହାସିନୀ, ମା ଘଣ୍ଟେଶ୍ୱରୀ, ମା ମେଟାକାନୀ, ମା ପାଟଣେଶ୍ୱରୀ ଏବଂ ମା ସମଲେଶ୍ୱରୀଙ୍କ ମହିଳା କଳାକାରମାନେ ସ୍ତୁତିଗାନ କରିଥିଲେ । ଏହାର ପରିକଳ୍ପନା, ସଙ୍ଗୀତ ସଂଯୋଜନା ଓ ପରିଚାଳନା କରିଥିଲେ ଗୁରୁ ରଞ୍ଜନ ସାହୁ। କାର୍ଯ୍ୟକ୍ରମରେ ପଶ୍ଚିମ ଓଡ଼ିଶାର ଲୋକଗୀତ ଓ ଲୋକବାଦ୍ୟର ସୁନ୍ଦର ସମ୍ମିଶ୍ରଣ ଦର୍ଶକଙ୍କୁ ବିମୋହିତ କରିଥିଲା ।

ଏହି ସଙ୍ଗୀତାନୁଷ୍ଠାନର ରଚନା ଓ ସଙ୍ଗୀତ ଗୁରୁ ରତନ ପୁଜାରୀଙ୍କର ହୋଇଥିବାବେଳେ ସଙ୍ଗୀତ ସହାୟକ ଭାବେ ବିଶିଷ୍ଟ ଗୁରୁ ଶଙ୍କର ପ୍ରଧାନ ଏବଂ ସ୍ୱର୍ଗତ ପ୍ରଭୂଦତ୍ତ ପ୍ରଧାନଙ୍କ ଅବଦାନ ରହିଥିଲା । ସଙ୍ଗୀତ ସଂଯୋଜନା କରିଥିଲେ ଶ୍ରୀ ଦେବାଶିଷ ପାଢ଼ୀ । ଦୀପାଳି ଚୌଧୁରୀ ଓ ନବୀନ କୁଜୁର ବିଶେଷ ସହଯୋଗ କରିଥିବାବେଳେ ଡ. ଶ୍ୟାମ ସୁନ୍ଦର ଧର, ପ୍ରଫୁଲ୍ଲ ହୋତା ଓ ସଞ୍ଜୟ ବାବୁ ମାର୍ଗଦର୍ଶନ ପ୍ରଦାନ କରିଥିଲେ ।

କାର୍ଯ୍ୟକ୍ରମରେ କଣ୍ଠଶିଳ୍ପୀ ଭାବେ ପଦ୍ମିନୀ ଦୋରା, ଚେତନାମୟୀ ବେହେରା, ନୂପୁର ମଲ୍ଲିକ, ସୁମନ ମେହେର, ଅର୍ପିତା ମିଶ୍ର, ସିଲ୍କି ବୋହିଦାର ଓ ଅଦ୍ୱୈତା ମିଶ୍ର ସୁମଧୁର ଭଜନ ପରିବେଷଣ କରିଥିଲେ । ବାଦ୍ୟଯନ୍ତ୍ର ଓ ସଙ୍ଗୀତରେ ଦେବାଶିଷ ପାଢ଼ୀ, ସିଲୁ ସିଂଦେଓ, ରଞ୍ଜନ କୁମାର ହୋତା, ରଞ୍ଜନ ପଟ୍ଟନାୟକ, ଗୁରୁ କପିଳେନ୍ଦ୍ର ସାହୁ, ଦିବାକର ମହାନନ୍ଦ, ଗୁରୁ ରଞ୍ଜିତ ସାହୁ, ଓଁକାର ବାଗ, ଅନୁରୋଧ ବାଗ ଓ ସୁମିତ କୁମାର ପଧାନ ସହଯୋଗ କରିଥିଲେ ।

କାର୍ଯ୍ୟକ୍ରମକୁ ଶ୍ରୀମତୀ ମାନସୀ ନନ୍ଦ ସୁନ୍ଦର ଭାବେ ଉପସ୍ଥାପନା କରିଥିବାବେଳେ, ସମଲେଶ୍ୱରୀ ଟ୍ରଷ୍ଟ ବୋର୍ଡ ଓ ସମ୍ବଲପୁରର ମିଳିତ କଳାକାରଙ୍କ ଏହି ପ୍ରୟାସକୁ ଉପସ୍ଥିତ ଦର୍ଶକ ଓ ସଙ୍ଗୀତପ୍ରେମୀମାନେ ଭୂୟସୀ ପ୍ରଶଂସା କରିଥିଲେ । ଏହି ଅବସରରେ ସମଲେଶ୍ୱରୀ ଟ୍ରଷ୍ଟ ବୋର୍ଡ ସଭାପତି ଶ୍ରୀ ସଞ୍ଜୟ ବାବୁ କହିଛନ୍ତି ଯେ ମା ସମଲେଇଙ୍କ ଅପାର କରୁଣା ରୁ ଗୁରୁ ଓ କଳାକାରମାନେ ଏହି ମାଟି କୁ ଗୌରବାନ୍ୱିତ କରିଛନ୍ତି । ମା ସମଲେଇ ଙ୍କ ନିକଟରେ ସେ ତାଙ୍କର ଉତ୍ତରୋତ୍ତର ଉନ୍ନତି କାମନା କରିଛନ୍ତି ।