କଲକତା (ଓଡ଼ିଶା ତାଜା ନ୍ୟୁଜ୍) :- ବଙ୍ଗଲାରେ ବିଜେପି ବହୁମତ ହାସଲ କରିବା ପରେ ପ୍ରଥମ ଥର ପାଇଁ ଦିଦି ସାମ୍ବାଦିକ ସମ୍ମିଳନୀ କରି ବିଜେପିକୁ କଡା ସମାଲୋଚନା କରିଛନ୍ତି । ନିର୍ବାଚନ ଫଳାଫଳ ଆସିବା ପରେ ପଶ୍ଚିମବଙ୍ଗରେ ରାଜନୀତିକ ବୟାନବାଜି ଜୋର ଧରିଛି । ବେଙ୍ଗଲ ବିଧାନସଭା ନିର୍ବାଚନରେ ହାରିବା ପରେ ବିଜେପି ବିରୋଧରେ ଭୋଟ ଚୋରି ଅଭିଯୋଗକୁ ତୀବ୍ର କରିଛନ୍ତି ମମତା ବାନାର୍ଜୀ । ସେ ବେଙ୍ଗଲରେ ନିର୍ବାଚନ ହାରି ନାହାନ୍ତି, ବରଂ ଜନାଦେଶକୁ ବଳପୂର୍ବକ ଲୁଟ କରି ନିଆଯାଇଥିବା କହିଛନ୍ତି । ନିର୍ବାଚନରେ ହାରି ନଥିବାରୁ ସେ ପରମ୍ପରା ଅନୁସାରେ ରାଜ୍ୟପାଳଙ୍କୁ ଭେଟି ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେବେ ନାହିଁ ବୋଲି ଆଜି ସାମ୍ବାଦିକ ସମ୍ମିଳନୀରେ ଘୋଷଣା କରିଛନ୍ତି । ସେ କହିଛନ୍ତି, “ଆମେ ହାରି ନାହୁଁ ।
ମୁଁ ହାରି ନାହିଁ । ତେଣୁ ରାଜ ଭବନ ଯିବି ନାହିଁ । ମୁଁ ଇସ୍ତଫା ଦେବି ନାହିଁ । ବିଜେପି ଲୁଟ କରି ବିଜୟ ହାସଲ କରିଛି । ବେଙ୍ଗଲରେ ବିଜେପି ୧୦୦ ସିଟ ଲୁଟ କରିଥିବା କଥା ଦୋହରାଇଛନ୍ତି ଦିଦି । ସେ କହିଛନ୍ତି, ଗଣତନ୍ତ୍ର ଏମିତି କାମ କରେ ନାହିଁ । ଯେତେବେଳେ ନିର୍ବାଚନ କମିଶନ ପକ୍ଷପାତିତା କରୁଛନ୍ତି ଓ ସରକାର ଗୋଟିଏ ଦଳର ଶାସନ ଚାହୁଁଛନ୍ତି ସେତେବେଳେ ଗୋଟିଏ ଖରାପ ବାର୍ତ୍ତା ପୂରା ବିଶ୍ୱକୁ ଯାଉଛି । ମମତା ବାନାର୍ଜୀ ପରାଜୟର ସବୁ ଦୋଷ ଭାରତୀୟ ନିର୍ବାଚନ କମିଶନ ଓ କେନ୍ଦ୍ରୀୟ ସୁରକ୍ଷା ବଳ ଉପରେ ଲଦିଛନ୍ତି । ନିର୍ବାଚନ କମିଶନ ଅତ୍ୟନ୍ତ ଖରାପ ଖେଳ ଖେଳିଛନ୍ତି ।
ବାସ୍ତବରେ ବିଜେପି ନୁହେଁ, ବରଂ ତାଙ୍କ ଦଳ ନିର୍ବାଚନ କମିଶନ ସହ ଲଢ଼ୁଥିବା ମମତା କହିଛନ୍ତି । ସେ କହିଛନ୍ତି, କେନ୍ଦ୍ର ସରକାର ନିର୍ବାଚନ ପ୍ରକ୍ରିୟାରେ ସିଧାସଳଖ ହସ୍ତକ୍ଷେପ କରିଛନ୍ତି । ସେମାନେ ଯେମିତି ମହାରାଷ୍ଟ୍ର, ହରିୟାଣା, ବିହାରରେ କରିଥିଲେ ଏବେ ବେଙ୍ଗଲରେ ସମାନ ପଦକ୍ଷେପ ନେଇଛନ୍ତି । ୭୧ ବର୍ଷୀୟ ମମତା ଅଭିଯୋଗ କରିଛନ୍ତି ଯେ କାଉଣ୍ଟିଂ ସେଣ୍ଟରରେ ତାଙ୍କଚ ମାଡ଼ ମରାଯାଇଥିଲା । ସେ କହିଛନ୍ତି, ମୋ ପେଟ ଓ ପିଠିକୁ ଗୋଇଠା ମରାଯାଇଛି । ସିସିଟିଭିକୁ ବନ୍ଦ କରାଯାଇଥିଲା । କାଉଣ୍ଟିଂ ସେଣ୍ଟରରୁ ମୋତେ ଧକ୍କା ମାରି ବିଦା କରାଯାଇଛି ।
ଜଣେ ମହିଳା ହିସାବରେ ମୋ ସହ ଦୁର୍ବ୍ୟବହାରୁ କରାଯାଇଥିଲା । ମମତା ଆହୁରି କହିଛନ୍ତି ଯେ ନିର୍ବାଚନ ପରଠାରୁ ଟିଏମସିର କର୍ମୀ ଓ ଅଫିସ ଉପରେ ଆକ୍ରମଣ କରାଯାଉଛି । ବିଭିନ୍ନ ଲୋକଙ୍କୁ ଧମକ ଦିଆଯାଉଛି । ଟିଏମସି କର୍ମୀମାନେ ଭୟରେ ରହିଛନ୍ତି । ବିଜେପି ନେତା ଓ କର୍ମୀଙ୍କ ଆକ୍ରମଣରେ ଅନେକ ଟିଏମସି କର୍ମୀ ଆହତ ହୋଇଛନ୍ତି । ବିଜେପି ପକ୍ଷରୁ ଟିଏମସିର ଏକାଧିକ ଅଫିସକୁ ଜାଳି ଦିଆଯାଇଛି । ସେମାନେ ଟିଏମସିର ମୁଖ୍ୟାଳୟକୁ ମଧ୍ୟ ଦଖଲ କରିବାକୁ ଚାହୁଁଥିବା ସେ ଅଭିଯୋଗ କରିଛନ୍ତି ।
