ଓଡ଼ିଶା ତାଜା ନ୍ୟୁଜ (୨୬ ସେପ୍ଟେମ୍ଵର,ଶନିବାର ) ଚନ୍ଦାହାଣ୍ଡି :- ନବରଙ୍ଗପୁର ଜିଲ୍ଲା ଚନ୍ଦାହାଣ୍ଡି ବ୍ଲକ, ପାଟଖଲିଆ ଗ୍ରାମ ପଞ୍ଚାୟତ ଅଧିନସ୍ଥ ଦୁର୍ଗମ ଅଞ୍ଚଳ ଭାବେ ପରିଚିତ ଗୌରଝରିଆ ଓ ଭେଲୁଆକୋଟ ଗ୍ରାମକୁ ଗମନାଗମନ ନିମନ୍ତେ ରାସ୍ତାଘାଟର ଅତି ଅସୁବିଧା ଥିଲା l ବାଟରେ ଡ଼ୁମାଜୋର ନଦୀ ପଡୁଥିବାରୁ ଉକ୍ତ ଅଞ୍ଚଳ ର ପ୍ରାୟ ୫୦୦ରୁ ଉର୍ଦ୍ଧ ପରିବାର ର ଲୋକମାନେ ପାଟଖଲିଆ ପଞ୍ଚାୟତ କାର୍ଯ୍ୟାଳୟକୁ,ଚନ୍ଦାହାଣ୍ଡି ବ୍ଲକ ସଦର ମହକୁମାକୁ ତଥା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର କୁ ଆସିବା ପାଈଁ ବହୁଅସୁବିଧା ର ସମ୍ମୁଖୀନ ହେଉଥିଲେ l ଡ଼ୁମାଜୋର ନଦୀରେ ବର୍ଷାଦିନେ ପ୍ରାୟ 3ରୁ 4ମାସ ଧରି ଲୋକମାନେ ବହୁ କଷ୍ଟରେ ନଦୀ ପାରହୋଇ ଯିବା ଆସିବା କରୁଥିବା ବେଳେ କୌଣସି ମଟର ସାଇକେଲ କିମ୍ବା ଚାରିଚକିଆ ଗାଡି ଯିବା ଆସିବା କରିବାରେ ଅସୁବିଧା ହେଉଥିଲା l
ଉକ୍ତ ଅଞ୍ଚଳ ର ଜନସାଧାରଣଙ୍କ ସୁବିଧା ନିମନ୍ତେ ନବରଙ୍ଗପୁର ଲୋକସଭା ସାଂସଦ ରମେଶ ଚନ୍ଦ୍ର ମାଝୀ ଓ ଝରୀଗାଁ ବିଧାୟକ ଇଁ. ପ୍ରକାଶ ଚନ୍ଦ୍ର ମାଝୀ ବଇଦପଡା ଗ୍ରାମ ଠାରୁ ଗୌରଝରିଆ ଓ ଭେଲୁଆକୋଟ ଗ୍ରାମକୁ ଯିବା ବାଟରେ ପଡୁଥିବା ଡ଼ୁମାଜୋର ନଦୀ ରେ ଯଥାଶୀଘ୍ର ଏକ “ପୋଲ” ନିର୍ମାଣ ପ୍ରସ୍ତାବ କାର୍ଯ୍ୟକାରି କରାଯିବା ପାଈଁ ଲିଖିତ ଭାବେ ନବରଙ୍ଗପୁର ଜିଲ୍ଲାପାଳ ଡ଼କ୍ଟର ଅଜିତ କୁମାର ମିଶ୍ର ଙ୍କ ଦୃଷ୍ଟି ଆକର୍ଷଣ କରାଇଥିଲେ l ଜିଲ୍ଲାପାଳ ଡ଼କ୍ଟର ମିଶ୍ର ଙ୍କ ପତ୍ର ସଂଖ୍ୟା ୬୪୮/୨୦୨୦ ତା -୨୦/୦୫/୨୦୨୦ ଦ୍ୱାରା ବଇଦପଡା ଠାରୁ ଗୌରଝରିଆ ରାସ୍ତାରେ ଡ଼ୁମାଜୋର ନଦୀରେ ଯଥାଶୀଘ୍ର ଏକ “ପୋଲ” ନିର୍ମାଣ ନିମନ୍ତେ ନବରଙ୍ଗପୁର ଜିଲ୍ଲା ପ୍ରକଳ୍ପ ଅଧିକାରୀ ଙ୍କୁ ନିର୍ଦେଶ ଦେବାସହ କାର୍ଯ୍ୟ ଶେଷ ବେଳକୁ ଜିଲ୍ଲା ଜଙ୍ଗଲ ଓ ପରିବେଶ ବିଭାଗ ଦ୍ୱାରା କାର୍ଯ୍ୟବନ୍ଦ କରାଯାଇଥିଲା l ଝରୀଗାଁ ବିଧାୟକ ଇଂ ପ୍ରକାଶ ଚନ୍ଦ୍ର ମାଝୀ ଜଙ୍ଗଲ ଓ ପରିବେଶ ବିଭାଗ ସହ ଜୋଗାଯୋଗ କରି ସମସ୍ୟାର ସମାଧାନ କରି ଉକ୍ତ “ପୋଲ”ନିର୍ମାଣ କାର୍ଯ୍ୟ ଶୀଘ୍ର ସାରିବା ପାଈଁ ନିର୍ଦେଶ ଦେଇଥିଲେ l ଯାହା ଦ୍ୱାରା ଅତି କମଦିନରେ ଡ଼ୁମାଜୋର ନଦୀରେ ବର୍ତମାନ ସୁଦ୍ଧା “ପୋଲ” ନିର୍ମାଣ କାର୍ଯ୍ୟ ଅର୍ଦ୍ଧାଧିକ ସରି “ପୋଲ”ର ଛାତ ପଡିବା ବାକି ରହିଯାଇଥିଲା l
ଉକ୍ତ “ପୋଲ” ନିର୍ମାଣ ବିଷୟରେ ସମନ୍ନିତ ଆଦିବାସୀ ଉନ୍ନୟନ ସଂସ୍ଥା ବିଭାଗ ର କନିଷ୍ଠ ଯନ୍ତ୍ରୀ ଶରତ ଚନ୍ଦ୍ର ମାଝୀ ଙ୍କ ମତାମତ ଅନୁଯାଇ ଡ଼ୁମାଜୋର ନଦୀର “ପୋଲ” ନିର୍ମାଣ ନିମନ୍ତେ ମୋଟ ୪୫,୧୩,୮୫୨ ଟଙ୍କା ବ୍ୟୟ ଅଟକଳ କରାଯାଇ ଠିକାଦାର -ରଶ୍ମିତା ସ୍ୱାଇଁ ଙ୍କୁ କାର୍ଯ୍ୟାଦେଶ ଦିଆଯାଇଛି l ଖୁବଶୀଘ୍ର “ପୋଲ” ନିର୍ମାଣ କାର୍ଯ୍ୟ ଶେଷ ହୋଇ ସମସ୍ତ ଗାଡିମଟର ଓ ଚାରିଚକିଆ ଯାନ ଚଳପ୍ରଚଳ ହୋଇ ସମସ୍ୟାର ସମାଧାନ ହୋଇ ପାରିବ ବୋଲି କହିଛନ୍ତି l ଉକ୍ତ “ପୋଲ” ନିର୍ମାଣ ନିମନ୍ତେ ଜଙ୍ଗଲ ଓ ପରିବେଶ ବିଭାଗ ର ମଞ୍ଜୁରୀ ମିଳିବାରେ ବିଳମ୍ବ ହେବା ସହ ବର୍ଷା ଦିନ ହୋଇଥିବାରୁ “ପୋଲ” ର ଛାତ ପଡିବାରେ କିଛିଦିନ ବିଳମ୍ବ ହୋଇଛି ବୋଲି କନିଷ୍ଠ ଯନ୍ତ୍ରୀ ମାଝୀ କହିଛନ୍ତି l ଗୌରଝରିଆ ଗ୍ରାମର ଧନସିଂ ମାଝୀ, ରାମ ମାଝୀ, କହ୍ନେଇ ପୂଜାରୀ ପ୍ରମୁଖ ବିଧାୟକ ଇଁ. ପ୍ରକାଶ ଚନ୍ଦ୍ର ମାଝୀ ଙ୍କ ଗୌରଝରିଆ ଓ ଭେଲୁଆକୋଟ ଅଞ୍ଚଳ ବାସୀଙ୍କ ଗମନାଗମନ ସୁବିଧା ନିମନ୍ତେ ଏପରି ଉଦ୍ୟମ କୁ ସାଧାରଣରେ ପ୍ରଶଂସା କରି ଆମ ଅଂଚଳର ବିକାଶ ଧାରା ତ୍ବରାନିତ ହେବାସହ ବହୁଦିନ ର ଆଶା ପୂରଣ ହୋଇପାରିବ ବୋଲି କହିଛନ୍ତି l (ରିପୋର୍ଟ-ଯୁବରାଜ ଜଗତ,ନବରଙ୍ଗପୁର ଜିଲ୍ଲା ପ୍ରତିନିଧି)
