ନୀତିଗତ ସଂସ୍କାର ଏବଂ ସ୍ଥାୟୀ ଖଣି ହେଉଛି ଭାରତର ଖଣିଜ ସୁରକ୍ଷାର ଚାବିକାଠି : ଅରୁଣ କୁମାର

ଆସୋଚାମ୍ ଇଣ୍ଡିଆ ମାଇନ୍ସ ଆଣ୍ଡ ମିନେରାଲ୍ସ କନକ୍ଲେଭ୍ ୨୦୨୬

ଭୁବନେଶ୍ୱର (ଓଡ଼ିଶା ତାଜା ନ୍ୟୁଜ୍) (ନି. ପ୍ର ) :- ଭାରତୀୟ ବାଣିଜ୍ୟ ଏବଂ ଶିଳ୍ପ ସଂଘ (ଆସୋଚାମ୍‌) ପକ୍ଷରୁ ସ୍ୱସ୍ତି ପ୍ରିମିୟମ୍ ଠାରେ ଇଣ୍ଡିଆ ମାଇନ୍ସ ଆଣ୍ଡ ମିନେରାଲ୍ସ କନକ୍ଲେଭ୍ ୨୦୨୬ ଆୟୋଜନ କରାଯାଇଛି । “ନୀତି ସଂସ୍କାର, ସ୍ଥାୟୀତ୍ୱ ଏବଂ ରଣନୈତିକ ସୁରକ୍ଷା ମାଧ୍ୟମରେ ରୂପାନ୍ତରକୁ ଆକାର ଦେବା’ ବିଷୟବସ୍ତୁ ଉପରେ ଆଧାରିତ ଏହି କନକ୍ଲେଭରେ ଭାରତର ଖଣି ଏବଂ ଖଣିଜ କ୍ଷେତ୍ରର ଭବିଷ୍ୟତ ଉପରେ ବିଚାର ବିମର୍ଶ କରିବା ପାଇଁ ନୀତି ନିର୍ଦ୍ଧାରକ, ଶିଳ୍ପ ନେତା, ନିୟାମକ ଏବଂ ପ୍ରଯୁକ୍ତିବିଦ୍ୟା ଉଦ୍ଭାବକମାନେ ଏକତ୍ରୀତ ହୋଇଛନ୍ତି ।

ଏହି କନକ୍ଲେଭରେ ମୁଖ୍ୟ ଅତିଥି ଭାବରେ ଯୋଗଦେଇ ଭାରତୀୟ ଖଣି ବ୍ୟୁରୋର ଆଂଚଳିକ ଖଣି ନିୟନ୍ତ୍ରକ ଶ୍ରୀ ଅରୁଣ କୁମାର କହିଛନ୍ତି, ଯେ ଭାରତର ୫ ଟ୍ରିଲିୟନ ଡଲାର ଅର୍ଥନୀତି ହେବାର ଆକାଂକ୍ଷା ଖଣିଜ ପଦାର୍ଥର ଚାହିଦାକୁ ଉଲ୍ଲେଖନୀୟ ଭାବରେ ବୃଦ୍ଧି କରିବ, ବିଶେଷକରି ସ୍ୱଚ୍ଛ ଶକ୍ତି ଏବଂ ଶିଳ୍ପ ଅଭିବୃଦ୍ଧି ପାଇଁ ଆବଶ୍ୟକ ଗୁରୁତ୍ୱପୂର୍ଣ୍ଣ ଖଣିଜ ପଦାର୍ଥ । ସେ ଉଲ୍ଲେଖ କରିଛନ୍ତି ଯେ ସରକାର ଖଣି କ୍ଷେତ୍ରରେ ଅଭିବୃଦ୍ଧିକୁ ତ୍ୱରାନ୍ୱିତ କରିବା ପାଇଁ ଅନେକ ସଂସ୍କାର ଗ୍ରହଣ କରିଛନ୍ତି, ଯାହା ନିୟମାବଳୀରୁ ସୁବିଧାକରଣକୁ ସ୍ପଷ୍ଟ ପରିବର୍ତନକୁ ଚିହ୍ନିତ କରୁଛି ।”

ସ୍ୱାଗତ ଅଭିଭାଷଣରେ ଆସୋଚାମ ଓଡ଼ିଶା ରାଜ୍ୟ ବିକାଶ ପରିଷଦର ସହ-ଅଧ୍ୟକ୍ଷ ଏବଂ ଏସଏନଏମ ଗ୍ରୁପ୍‌ର ଅଧ୍ୟକ୍ଷ ଶ୍ରୀଯୁକ୍ତ ପ୍ରବୋଧ ମହାନ୍ତି କହିଛନ୍ତି, “ଓଡ଼ିଶା ଦେଶର ସବୁଠାରୁ ଗୁରୁତ୍ୱପୂର୍ଣ୍ଣ ଖଣି ଏବଂ ଖଣିଜ କେନ୍ଦ୍ର ମଧ୍ୟରୁ ଗୋଟିଏ । ରାଜ୍ୟ ଗତ ଦଶନ୍ଧି ମଧ୍ୟରେ ପ୍ରାୟ ଟ.୧.୫ ଲକ୍ଷ କୋଟି ଖଣି ରାଜସ୍ୱ ସୃଷ୍ଟି କରିଛି, ଯାହା ଭାରତର ଅର୍ଥନୈତିକ ବିକାଶରେ ଯଥେଷ୍ଟ ଅବଦାନ ରଖିଛି । ଆଜି ଓଡ଼ିଶା ଭାରତର ଇସ୍ପାତ ଉତ୍ପାଦନର ପ୍ରାୟ ୨୫ ପ୍ରତିଶତ ପାଇଁ ଦାୟୀ, ଯାହା ଭାରତର ଇସ୍ପାତ ରାଜଧାନୀ ଭାବରେ ଏହାର ସ୍ଥିତିକୁ ସୁଦୃଢ଼ କରୁଛି ।”

ସେହିଭଳି ଆସୋଚାମ ଓଡ଼ିଶା ରାଜ୍ୟ ଖଣି ଏବଂ ଖଣିଜ ପଦାର୍ଥ ବିକାଶ ପରିଷଦର ସଦସ୍ୟ ଏବଂ ଜେଏସଡବ୍ଲୁ ଷ୍ଟିଲର ବ୍ୟବସାୟ ମୁଖ୍ୟ (ଓଡ଼ିଶା ବ୍ୟବସାୟ) ଶ୍ରୀଯୁକ୍ତ ପ୍ରସନ୍ନ କୁମାର ପଣ୍ଡା ଜାତୀୟ ଗୁରୁତ୍ୱପୂର୍ଣ୍ଣ ଖଣିଜ ମିଶନର ବିଭିନ୍ନ ଦିଗ ଉପରେ ଆଲୋକପାତ କରିଛନ୍ତି । ଶିଳ୍ପ ଆହ୍ୱାନ ବିଷୟରେ ଆଲୋଚନା କରି ଜିନ୍ଦଲ ଷ୍ଟିଲ୍ ଆଣ୍ଡ୍ ପାୱାର (ଜେଏସପି)ର ଖଣିଜ ନିଲାମ, ରଣନୀତି, ମିଶ୍ରଣ ଏବଂ ଅଧିଗ୍ରହଣ ମୁଖ୍ୟ ଶ୍ରୀ ମନୀଷ ସିଙ୍ଗଲା କହିଛନ୍ତି ଯେ ଓଡ଼ିଶା ୨୦୩୦ ସୁଦ୍ଧା ଏହାର ଇସ୍ପାତ ଉତ୍ପାଦନ କ୍ଷମତାକୁ ବାର୍ଷିକ ୧୦୦ ନିୟୁତ ଟନ୍‌କୁ ବୃଦ୍ଧି କରିବାକୁ ଲକ୍ଷ୍ୟ ରଖିଛି, ଯାହା ବର୍ତମାନର ୪୨-୪୫ ନିୟୁତ ଟନ୍ ଅଟେ । ଏହି ଲକ୍ଷ୍ୟ ହାସଲ କରିବା ପାଇଁ ଲୁହାପଥର ଉତ୍ପାଦନ ଏବଂ ଯୋଗାଣରେ ସମାନୁପାତିକ ବୃଦ୍ଧି ଆବଶ୍ୟକ ।

ଏହି ସମ୍ମିଳନୀ ସମୟରେ, ଆସୋଚାମ ପକ୍ଷରୁ ଖଣି ଏବଂ ଖଣିଜ କ୍ଷେତ୍ର ଉପରେ ଏକ ଜ୍ଞାନ ରିପୋର୍ଟ ମଧ୍ୟ ପ୍ରକାଶ କରାଯାଇଛି । ଏହି ସମ୍ମିଳନୀରେ ନୀତି, ରଣନୈତିକ ଖଣିଜ ଏବଂ ଖଣିରେ ପ୍ରଯୁକ୍ତିବିଦ୍ୟା ପରିବର୍ତନ ଉପରେ ଧ୍ୟାନ ଦେଇ ତିନୋଟି ଗୁରୁତ୍ୱପୂର୍ଣ୍ଣ ପ୍ୟାନେଲ ଆଲୋଚନା କରାଯାଇଛି । କେପିଏମଜିର ଶ୍ରୀ ବିଦ୍ୟୁତ ଚକ୍ରବର୍ତୀଙ୍କ ଦ୍ୱାରା ପରିଚାଳିତ ‘ଭାରତୀୟ ଖଣି କ୍ଷେତ୍ରରେ ନୀତି, ସଂସ୍କାର ଏବଂ ବ୍ୟବସାୟିକ ସୁଗମତା’ ଉପରେ ଏକ ପ୍ୟାନେଲ୍ ଖଣି ଆଇନ,

ନିଲାମ ଢାଂଚା ଏବଂ କ୍ଲିୟରାନ୍ସ ବ୍ୟବସ୍ଥାରେ ପ୍ରମୁଖ ସଂସ୍କାର ବିଷୟରେ ଆଲୋଚନା କରିଥିଲା । ଏହି ପ୍ୟାନେଲରେ ଇଣ୍ଡିଆନ୍ ବ୍ୟୁରୋ ଅଫ୍ ମାଇନ୍ସର ଶ୍ରୀ ଅରୁଣ କୁମାର, ଶିବ ସିମେଂଟ ଲିମିଟେଡର ଖଣି ବିଭାଗ ମୁଖ୍ୟ ଶ୍ରୀ ମନୋଜ ବର୍ମା ଏବଂ ଜିନ୍ଦଲ ଷ୍ଟିଲ୍ ଆଣ୍ଡ୍ ପାୱାରର ଶ୍ରୀ ମନୀଷ ସିଂଘଲା ଉପସ୍ଥିତ ଥିଲେ । ଆଇସିଆରଏ ଲିମିଟେଡର ଉପାଧ୍ୟକ୍ଷ ତଥା ଖଣି ଓ ଖଣିଜ କ୍ଷେତ୍ରର ମୁଖ୍ୟ ସୁମିତ ଝୁନଝୁନୱାଲାଙ୍କ ଦ୍ୱାରା ପରିଚାଳିତ ‘ଗୁରୁତ୍ୱପୂର୍ଣ୍ଣ ଖଣିଜ ଏବଂ ଭାରତର ରଣନୀତିକ ସମ୍ବଳ ସୁରକ୍ଷା’ ଉପରେ ଥିବା ପ୍ୟାନେଲ୍‌, ଭାରତର କ୍ରିଟିକାଲ୍ ମିନେରାଲ୍ସ ମିଶନ୍‌, ଘରୋଇ ଉତୋଳନ କ୍ଷେତ୍ରରେ ଥିବା ଆହ୍ୱାନ ଏବଂ ଖଣିଜ ଯୋଗାଣ ଶୃଙ୍ଖଳାର ଭୂ-ରାଜନୈତିକ ଦିଗ ଉପରେ ଧ୍ୟାନ କେନ୍ଦ୍ରିତ କରିଥିଲା ।

ଆଲୋଚକମାନଙ୍କ ମଧ୍ୟରେ ଆଟେରୋ ରିସାଇକ୍ଲିଂର ସିଇଓ ତଥା ସହ-ପ୍ରତିଷ୍ଠାତା ନୀତିନ ଗୁପ୍ତା, ଓଡ଼ିଶା ଖଣି ନିଗମର ପୂର୍ବତନ ନିର୍ଦ୍ଦେଶକ (ଅପରେସନ୍ସ) ସବ୍ୟସାଚୀ ମହାନ୍ତି ଏବଂ ସିଏସଆଇଆର-ଆଇଏମଏମଟିର ମୁଖ୍ୟ ବୈଜ୍ଞାନିକ କାଳୀ ସଞ୍ଜୟ ସାମିଲ ଥିଲେ । କେପିଏମଜିର ବୈଷୟିକ ନିର୍ଦ୍ଦେଶକ ଶ୍ରୀ ପ୍ରଣବ କୁମାରଙ୍କ ଦ୍ୱାରା ପରିଚାଳିତ ‘ପ୍ରଯୁକ୍ତିବିଦ୍ୟା, ନିରାପତା ଏବଂ ସ୍ଥାୟୀ ଖଣି ଖନନ’ ଉପରେ ଥିବା ପ୍ୟାନେଲ୍ ଖଣି ଉତ୍ପାଦନ ଓ ନିରାପତାରେ ଉନ୍ନତି ଆଣିବା କ୍ଷେତ୍ରରେ କୃତ୍ରିମ ବୁଦ୍ଧିମତା (ଏଆଇ),

ସ୍ୱୟଂଚାଳନ, ଡ୍ରୋନ୍‌, ଡିଜିଟାଲ୍ ମାଇନ୍ ପ୍ଲାନିଂ ଏବଂ ସ୍ୱଳ୍ପ ପ୍ରଦୂଷଣକାରୀ ପ୍ରଯୁକ୍ତିବିଦ୍ୟାର ଭୂମିକା ଉପରେ ଆଲୋକପାତ କରିଥିଲେ । ବକ୍ତାମାନଙ୍କ ମଧ୍ୟରେ ଜିଓଲୋଜିକାଲ୍ ସର୍ଭେ ଅଫ୍ ଇଣ୍ଡିଆର ନିର୍ଦ୍ଦେଶକ (ଭୂବିଜ୍ଞାନ) ଶ୍ରୀ ଅଶିତ କୁମାର ସ୍ୱାଇଁ, ସିଏସଆଇଆର-ଆଇଏମଏମଟିର ପୂର୍ବତନ ମୁଖ୍ୟ ବୈଜ୍ଞାନିକ ତଥା ଭୁବନେଶ୍ୱର ସ୍ଥିତ ଆର୍ଯ୍ୟନ୍ ଇନଷ୍ଟିଚ୍ୟୁଟ୍ ଅଫ୍ ଇଞ୍ଜିନିୟରିଂ ଆଣ୍ଡ୍ ଟେକ୍ନୋଲୋଜିର ନିର୍ଦ୍ଦେଶକ ଶ୍ରୀ ଆର୍ ଭୀମା ରାଓ ଏବଂ ସୈନିକ୍ ମାଇନିଂ ଆଣ୍ଡ୍ ଆଲାଏଡ୍ ସର୍ଭିସେସ୍ ଲିମିଟେଡର ଉପାଧ୍ୟକ୍ଷ ଶ୍ରୀ ପ୍ରିୟଦର୍ଶୀ ପ୍ରମୁଖ ଉପସ୍ଥିତ ଥିଲେ ।