ନିରାପଦ ଇଣ୍ଟରନେଟ୍ ଦିବସ ପାଳିତ

ମାଲକାନଗିରି (ଓଡ଼ିଶା ତାଜା ନ୍ୟୁଜ୍) (ନି. ପ୍ର ) :- ଜିଲ୍ଲା ପରିଷଦ ସମ୍ମିଳନୀ କକ୍ଷରେ ନିରାପଦ ଇଣ୍ଟରନେଟ୍ ଦିବସ ପାଳନ କରାଯାଇଛି । ଏହି କାର୍ଯ୍ୟକ୍ରମରେ ଅତିରିକ୍ତ ଜିଲ୍ଲାପାଳ (ରାଜସ୍ୱ) ମୁଖ୍ୟ ଅତିଥି ଭାବେ ଯୋଗ ଦେଇଥିବା ବେଳେ ଉପ-ଜିଲ୍ଲାପାଳଙ୍କ ସମେତ ଜିଲ୍ଲାର ବିଭିନ୍ନ ବିଭାଗର ବରିଷ୍ଠ ଅଧିକାରୀ ଓ ବିଭିନ୍ନ ବିଦ୍ୟାଳୟର ଛାତ୍ରଛାତ୍ରୀମାନେ ଉପସ୍ଥିତ ଥିଲେ । ଏହି ଅବସରରେ ଚଳିତ ବର୍ଷର ବିଷୟବସ୍ତୁ ସ୍ମାର୍ଟ ଟେକ୍, ସେଫ୍ ଚଇସେସ୍- ଏକପ୍ଲରିଙ୍ଗ ଦ ସେଫ୍ ଏଣ୍ଡ ରେସ୍ପନସିବଲ୍ ୟୁଜ୍ ଅଫ୍ ଏଆଇ ଉପରେ ଗୁରୁତ୍ୱାରୋପ କରାଯାଇଥିଲା ।

ଜିଲ୍ଲା ସୂଚନା ବିଜ୍ଞାନ ଅଧିକାରୀ ଏବଂ ଜିଲ୍ଲା ଇ-ଗଭର୍ଣ୍ଣାନ୍ସ ମ୍ୟାନେଜର ଉପସ୍ଥିତ ରହି ଛାତ୍ରଛାତ୍ରୀ ଓ ଅତିଥିମାନଙ୍କୁ ଏହି ଦିବସର ତାତ୍ପର୍ଯ୍ୟ ବୁଝାଇଥିଲେ।ଆର୍ଟିଫିସିଆଲ୍ ଇଣ୍ଟେଲିଜେନ୍ସ ର ସତର୍କ ବିନିଯୋଗ ଉପରେ ଜିଲ୍ଲା ଇ-ଗଭର୍ଣ୍ଣାନ୍ସ ମ୍ୟାନେଜର ନିଜ ବକ୍ତବ୍ୟରେ କହିଥିଲେ ଯେ, ଆଜିର ଡିଜିଟାଲ ଯୁଗରେ ଆମେ ସମସ୍ତେ ସଚେତନ, ଦାୟିତ୍ୱବାନ ଓ ସୁରକ୍ଷିତ ଡିଜିଟାଲ୍ ନାଗରିକ ହେବା ଆବଶ୍ୟକ । ବିଶେଷ କରି ଏଆଇ ବା କୃତ୍ରିମ ବୁଦ୍ଧିମତାର ବ୍ୟବହାର କିପରି ବୁଦ୍ଧିମତାର ସହ ଏବଂ ସୁରକ୍ଷିତ ଭାବେ କରାଯାଇପାରିବ,

ସେ ନେଇ ସେ ଆଲୋକପାତ କରିଥିଲେ।ଅନ୍ୟପଟେ, ଜିଲ୍ଲା ସୂଚନା ବିଜ୍ଞାନ ଅଧିକାରୀ ଏଆଇ ବ୍ୟବହାରର ବିଭିନ୍ନ ସୁଫଳ ଓ କୁଫଳ ସମ୍ପର୍କରେ ସବିଶେଷ ଆଲୋଚନା କରିଥିଲେ। ଇଣ୍ଟରନେଟର ସୁରକ୍ଷିତ ବ୍ୟବହାର କରି କିପରି ସାଇବର ଅପରାଧରୁ ଦୂରେଇ ରହିହେବ, ସେଥିପାଇଁ ସେ ଛାତ୍ରଛାତ୍ରୀମାନଙ୍କୁ ପରାମର୍ଶ ଦେଇଥିଲେ । ପରିଶେଷରେ, ଏହି କାର୍ଯ୍ୟକ୍ରମଟି ଛାତ୍ରଛାତ୍ରୀଙ୍କ ମଧ୍ୟରେ ଡିଜିଟାଲ୍ ସଚେତନତା ସୃଷ୍ଟି କରିବାରେ ବେଶ୍ ସହାୟକ ହୋଇଥିଲା ।