ଶିଶିର ସରସ-୨୦୨୬ରେ ଫ୍ୟାସନ ଶୋ’ ଅତୀତ ରୁ ଆନୀତ, ଭବିଷ୍ୟତ ପାଇଁ ରୂପାୟିତ : ଓଡ଼ିଶା ହସ୍ତତନ୍ତ ଶୋ’ର ମୁଖ୍ୟ ଆକର୍ଷଣ

ଭୁବନେଶ୍ୱର (ଓଡ଼ିଶା ତାଜା ନ୍ୟୁଜ୍) ନି. ପ୍ର :-  ଚଳିତ ବର୍ଷ ଓରମାସ ଓ ସୁଭଦ୍ରା ଶକ୍ତି ମିଳିତ ଉଦ୍ୟମରେ ଆୟୋଜିତ ହୋଇଥିବା ‘ଶିଶିର ସରସ -୨୦୨୬’ର ୭ତମ ଦିବସରେ ଓଡ଼ିଶାର ପାରମ୍ପରିକ ହସ୍ତତନ୍ତକୁ ଆଧାର କରି ଏକ ଫ୍ୟାସନ ଶୋ’ ଆୟୋଜିତ ହୋଇଯାଇଛି । ଏହି ଫ୍ୟାସନ ଶୋ’ରେ ଭାଗ ନେଇଥିବା ଉଭୟ ମହିଳା ଓ ପୁରୁଷ ମଡେଲମାନେ ଓଡ଼ିଶାର ପାରମ୍ପରିକ ବସ୍ତ୍ର ଓ ଶାଢୀ ପରିଧାନ କରି ର‌୍ୟାମ୍ପ୍ ୱାକ୍ କରିଥିଲେ ।

ଏହା ମାଧ୍ୟମରେ ରାଜ୍ୟର ପାରମ୍ପରିକ ପରିଧାନ ସଂସ୍କୃତିକୁ ନୂତନ ମଞ୍ଚ ମିଳିବା ସହ ଏହାର ପ୍ରଚାର ଓ ପ୍ରସାର ହେବ ବୋଲି ଆଶା କରାଯାଉଛି । ଫ୍ୟାସନ ଶୋ’ର ମୁଖ୍ୟ ଆକର୍ଷଣ ଥିଲା ଓଡ଼ିଶା ହ୍ୟାଣ୍ଡଲୁମ । ମଡେଲମାନେ ଓଡ଼ିଶା ହ୍ୟାଣ୍ଡଲୁମ୍ ପୋଷାକରେ ୱାକ୍ କରିଥିଲେ । ଫ୍ୟାଶନ ଶୋ’ରେ ମୋଟ ୨୮ ଜଣ ମଡେଲ ମଧ୍ୟରୁ ୧୨ ଜଣ ସୁପର ମଡେଲ, ୪ ଜଣ ପୁରୁଷ ମଡେଲ ଏବଂ ୮ଜଣ ଲୋକାଲ ମଡେଲ ଏବଂ ସେଲିବ୍ରିଟୀ ମଡେଲ (ଶୋ’ ଷ୍ଟପର୍‌) ସ୍ୱପ୍ନା ପ୍ରିୟଦର୍ଶିନୀ,

ସୂର୍ଯ୍ୟମୟୀ ମହାପାତ୍ର, ପ୍ରକୃତି ମିଶ୍ର ଏବଂ ବି.ଏମ୍ ବୈଶାଳୀ ଶୋ’ରେ ଅଂଶଗ୍ରହଣ କରିଥିଲେ । ଓରମାସ୍ ଦ୍ୱାରା ଆୟୋଜିତ ଏହି ଫ୍ୟାସନ ଶୋ’ର ବିଷୟବସ୍ତୁ ରହିଛି ‘ସ୍ୱ-ତନ୍ତ’ , ଯାହାର ଅର୍ଥ ହେଉଛି ‘ସ୍ୱ’ (ନିଜସ୍ୱ) ଏବଂ ତନ୍ତର (ହସ୍ତତନ୍ତ) । ଏହା ଏକ ସମସାମୟିକ ହସ୍ତତନ୍ତ ପ୍ରଦର୍ଶନୀ, ଯାହା ଆଧୁନିକ ଦୃଷ୍ଟିକୋଣ ମାଧ୍ୟମରେ ଓଡ଼ିଶାର ସମୃଦ୍ଧ ବୟନ ପରମ୍ପରାକୁ ନୂତନ ଆକୃତି ଦେଇ ପ୍ରସ୍ତୁତ କରେ ।

‘ସ୍ୱ-ତନ୍ତ’ ଫ୍ୟାସନ ଶୋ’ ଜୀବନ୍ତ ପରମ୍ପରାକୁ ପାଳନ ଐତିହ୍ୟକୁ ଅତୀତରେ ସୀମିତ ନ ରଖି ବର୍ତ୍ତମାନ ଓ ଭବିଷ୍ୟତ ସହ ଯୋଡ଼ିଥାଏ ।  ମେଳାର ଆଗାମୀ ଦିନଗୁଡ଼ିକରେ ହସ୍ତତନ୍ତର ବ୍ୟବସାୟ ଓ ପ୍ରଚାର ପ୍ରସାରକୁ ଦୃଷ୍ଟିରେ ରଖି ଏହି ଫ୍ୟାସନ ଶୋ’ରେ ଓଡ଼ିଶାର ଜିଆଇ-ଟ୍ୟାଗ୍ ପ୍ରାପ୍ତ ହନ୍ତତନ୍ତକୁ ପ୍ରାଧାନ୍ୟ ଦିଆଯାଇଛି । ଓଡ଼ିଶାର ନିଜସ୍ୱ ପାରମ୍ପରିକ ଓ ପୁରାତନ ବୁଣାକାରମାନଙ୍କୁ ସ୍ୱତନ୍ତ୍ର ପରିଚୟ ଦେବା ଫ୍ୟାସନ ଶୋ’ର ମୁଖ୍ୟ ଉଦ୍ଦେଶ୍ୟ ।

ଏଥିରେ ବରପାଲି ବୟନ, କୋଟପାଡ ଶାଢୀ, ଢୋକରା ମେଟାଲ କଳାରେ ପ୍ରେରିତ ଶାଢୀ, ଡୋଙ୍ଗରିଆ କନ୍ଧ ଏମ୍ବ୍ରୋଡୋରୀ ଆଦି ଓଡ଼ିଶାର ବିବିଧ ହସ୍ତତନ୍ତ ପରମ୍ପରା ଫ୍ୟାସନ ଶୋ’ରେ ପ୍ରଦର୍ଶନ କରାଯିବ । ପ୍ରଦର୍ଶର୍ିତ ହେବାକୁ ଥିବା ପ୍ରତ୍ୟେକ ବସ୍ତ୍ର ସ୍ଥାନୀୟ ଅଞ୍ଚଳ, ଲୋକକଥା, ଏବଂ ଉଦ୍ଦେଶ୍ୟର କାହାଣୀକୁ ପ୍ରତିଫଳିତ କରିଥାଏ ଏବଂ ଆଧୁନିକତା ସହ ପାରମ୍ପରିକତାର ସମନ୍ୱୟର ବାର୍ତ୍ତା ପ୍ରଦାନ କରେ ।