ଶୌଚାଳୟ ନାମରେ ବଡଦାଣ୍ଡ ମାଡି ବସିବା ଅଭିଯୋଗ

ପୁରୀ (ଓଡ଼ିଶା ତାଜା ନ୍ୟୁଜ୍) ନି.ପ୍ର :- ପବିତ୍ର ବଡଦାଣ୍ଡ ଉପରେ ଘରୋଇ ଶୌଚାଳୟ ନିର୍ମାଣ କରିବା ପାଇଁ ସୁଚିନ୍ତିତ ଉପାୟରେ ଜାତୀୟ ରାଜପଥ ଉପରେ ଲାଟିନ ନିର୍ମାଣ ହେଉଥିବା ଅଭିଯୋଗ ହୋଇଛି । ଯୁବ ସାମାଜିକ କର୍ମୀ ସ୍ବାଧୀନ ପଣ୍ଡା ଏହାକୁ ଘୋର ବିରୋଧ କରି କହିଛନ୍ତି ଯଦି ଏଠାରେ ଘରୋଇ ଅନୁଷ୍ଠାନ ଭକ୍ତଙ୍କୁ ଶୋଷଣ କରିବ ତେବେ ଆମେ ତାକୁ ବିରୋଧ କରିବୁ ବୋଲି ସାମାଜିକ ଗଣମାଧ୍ୟମରେ ଭିଡିଓ ଜାରି କରିଛନ୍ତି । ପୁରୀକୁ ଆସୁଥିବା ଭକ୍ତ, ପର୍ଯ୍ୟଟକ ଓ ତୀର୍ଥଯାତ୍ରୀ ମାନେ ଝାଡା ପରିସ୍ରା ଓ ଗାଧୋଇବା ପାଇଁ ସୁଲଭ ମୂଲ୍ଯରେ ଶୌଚାଳୟ ଖୋଜିଥାନ୍ତି ।

ବଗଲା ଧର୍ମଶାଳା ଭିଆଇପି ସୁଟ ସମ୍ମୁଖ ପାଚେରୀ ନିକଟରେ ଏକ ସୁଲଭ ଶୌଚାଳୟ ରହିଥିଲା । ତାହାର ସମ୍ମୁଖ ସ୍ଥାନକୁ ଡ୍ରେନ ସହ ବଡଦାଣ୍ଡକୁ ମିଶାଇ ବାଲି ସିମେଣ୍ଟ ଗୋଡି ପକାଇ ଟାଇଲ ବିଛାଇବା ପାଇଁ କାର୍ଯ୍ୟ କରାଯାଉଛି । ଏହାକୁ ଶ୍ରୀପଣ୍ଡା ଘୋର ବିରୋଧ କରିଛନ୍ତି । ରଥଯାତ୍ରା ସମୟରେ ଘରୋଇ ଶୌଚାଳୟରେ ପରିସ୍ରା ଯିବାପାଇଁ ୮୦ ଟଙ୍କା, ଝାଡା ଯିବା ପାଇଁ ୧୦୦ ଟଙ୍କା ଓ ଗାଧୋଇବା ପାଇଁ ୧୫୦ ଟଙ୍କା ଦେଇ ଅତିଷ୍ଠ ହୋଇଥିଲେ । ସେହି ବ୍ଯବସ୍ଥା ପୁଣି ଚାଲୁ କରିବା ପାଇଁ ନେଳି ଜରି ଘୋଡାଇ କାର୍ଯ୍ୟ କରାଯାଉଛି ।

ପବିତ୍ର ବଡଦାଣ୍ଡ ମହାପ୍ରଭୁଙ୍କ ରଥଦାଣ୍ଡ । ମହାପ୍ରଭୁ ସ୍ବଂୟ ରଥରେ ବିଜେ କରିବା ସମୟରେ ବଡଦାଣ୍ଡର ଦୁଇ ପାର୍ଶ୍ବରେ ପାଇଖାନା ଓ ପରିସ୍ରାଗାର ରହିବା ଉଚିତ ନୁହେଁ ବୋଲି ଧାର୍ମିକ ବ୍ଯକ୍ତି ମାନେ କହିଛନ୍ତି । ରଥ ଯିବା ସମୟରେ ରଥ ଯଦି ବଗଲା ପାଖରେ ମୋଡ ଖାଏ ତେବେ ତାହା ଭଙ୍ଗା ହେବାର ସମ୍ଭାବନା ରହିଛି । ଜିଲ୍ଲା ପ୍ରଶାସନ ଓ ପୌର ପ୍ରଶାସନ ଉଠା ଦୋକାନୀଙ୍କୁ ଉଠାଇ କାର ବାଇକ ପାର୍କିଙ୍ଗ ଓ ଶୌଚାଳୟ ନିର୍ମାଣକୁ ଶ୍ରୀପଣ୍ଡା ଘୋର ବିରୋଧ କରିଛନ୍ତି । ଯଦି ପ୍ରଶାସନ ଏହି ଘରୋଇକରଣ ବ୍ଯବସ୍ଥାକୁ ବଡଦାଣ୍ଡରୁ ନଉଠାଏ ତେବେ ଅନଶନରେ ବସିବେ ବୋଲି ଶ୍ରୀ ପଣ୍ଡା କହିଛନ୍ତି ।