ଗୋଟିଏ ରାତିରେ ୩ ମଦ ଦୋକାନରୁ ଚୋରି ଘଟଣାର ପର୍ଦ୍ଦାଫାଶ କଲା ଓଡଗାଁ ପୋଲିସ

୧ ଲକ୍ଷ ୬୨ ହଜାର ଟଙ୍କା, ଟାଟା ଇଣ୍ତିଗୋ, ୪ଟି ବାଇକ୍ ଓ ୧୧ଟି ମୋବାଇଲ୍ ଜବତ 

ଓଡ଼ଗାଁ (ଓଡ଼ିଶା ତାଜା ନ୍ୟୁଜ୍) ନି.ପ୍ର :-  ଓଡ଼ଗାଁ ଥାନା ସିନେମା ହଲ ଛକ ନିକଟରେ ଥିବା ଦୁଇଟି ବିଦେଶୀ ମଦ ଦୋକାନ ଓ ରୋହିବାଙ୍କ ଠାରେ ଥିବା ଅନ୍ୟ ଏକ ମଦ ଦୋକାନର ସଟରକୁ ଭାଙ୍ଗି ଦୋକାନରୁ ୧ଲକ୍ଷ ୯୮ ହଜାର ଟଙ୍କା ଓ ବିଦେଶି ମଦ ଚୋରି କରି ଧରାପଡ଼ିଛନ୍ତି ୭ଜଣ ଡ଼କାୟତ । ସେମାନଙ୍କ ଠାରୁ ୧ଲକ୍ଷ ୬୨ ହଜାର ଟଙ୍କା, ଇଣ୍ତିଗୋ କାର, ୪ଟି ବାଇକ୍, ମୋବାଇଲ୍ ଫୋନ୍ ଜବତ କରାଯାଇଥିବା ନୟାଗଡ଼ ଏସପି ଏସ. ସୁଶ୍ରୀ ଏକ ସାମ୍ବାଦିକ ସମ୍ମିଳନୀରେ ପ୍ରକାଶ କରିଛନ୍ତି ।

ସୂଚନା ଅନୁସାରେ, ଚଳିତ ମାସ ୧ତାରିଖ ଦିନ ସକାଳୁ ମଦ ଦୋକାନ ସଟର ଭାଙ୍ଗି ଚୋରି ହୋଇଥିବା ଘଟଣା ଜଣାପଡ଼ିବା ପରେ ସିନେମା ହଲ ଛକ ମଦ ଦୋକାନର ମ୍ୟାନେଜର ସମୀର ସାମାନ୍ତସିଂହାର, ରୋହିବାଙ୍କ ମଦ ଦୋକାନ ମାଲିକ ଶରତ କୁମାର ଡ଼ାକୁଆ ଓ ଓଡ଼ଗାଁ ଭଞ୍ଜନଗର ରୋଡ଼ରେ ଥିବା ଆଉ ଏକ ମଦ ଦୋକାନ ମାଲିକ ପୂର୍ଣ୍ଣଚନ୍ଦ୍ର ପ୍ରଧାନ ପୃଥକ ଭାବେ ଓଡ଼ଗାଁ ଥାନାରେ ଲିଖିତ ଅଭିଯୋଗ କରିଥିଲେ । ଓଡ଼ଗାଁ ପୁଲିସ ତିନୋଟି ମାମଲା ୩୦୯, ୩୧୦, ୩୧୧/୨୫ ରୁଜୁ କରି ତଦନ୍ତ ଆରମ୍ଭ କରିଥିଲା ।

ନୟାଗଡ଼ ଏସପି ଏସ. ସୁଶ୍ରୀଙ୍କ ନିର୍ଦ୍ଦେଶକ୍ରମେ ଓଡ଼ଗାଁ ପୁଲିସ ଏକ ଟିମ୍ ଗଠନ କରି ବିଭିନ୍ନ ସ୍ଥାନରେ ଚଢଉ କରିଥିଲା । ସିସଟିଭି ଫୁଟେଜ ଆଧାରରେ ଡ଼କାୟତ ଗ୍ୟାଙ୍ଗର ମାଷ୍ଟରମାଇଣ୍ତକୁ ଭଞ୍ଜନଗର ପୁଲିସ ଜାଣିପାରିଥିଲା । ଏହି ଡ଼କାୟତ ଦଳର ମାଷ୍ଟର ମାଇଣ୍ତ ଗଞ୍ଜାମ ଜିଲ୍ଲା ବୁଗୁଡ଼ା ଥାନା ଅରଖପୁର ଗ୍ରାମର ଦୋଳଗୋବିନ୍ଦ ଜେନାଙ୍କ ପୁଅ ଚିତ୍ରସେନ ଜେନା (୨୨) ଓ ହିଞ୍ଜିଳିକାଟ ବୁରୁପଦା ଗ୍ରାମର ସନ୍ତୋଷ ଦଳେଇଙ୍କ ପୁଅ ବାବୁଲା ଦଳେଇ (୨୧) ଙ୍କୁ ଗିରଫ କରି କୋର୍ଟ ଚାଲାଣ କରିଥିଲା ।

ଏହି ଦୁଇଜଣ ଡ଼କାୟତ ମାର୍ଚ୍ଚ ମାସରେ କୋର୍ଟରୁ ବାହାରିବା ପରେ ପୁଣି ନୂଆ ଯୋଜନା କରି ଯୁବକମାନଙ୍କୁ ଡ଼କାୟତି କାର୍ଯ୍ୟରେ ସାମିଲ କରିଥିଲେ । ଯୋଜନା ମୁତାବକ ଓଡ଼ଗାଁ ବିଦେଶୀ ମଦ ଦୋକାନ ଉପରେ ଟାଗେର୍ଟ କରି ରାତିରେ ଡ଼କାୟତି କରିଥିଲେ। ଏହି ଡ଼କାୟତ ଦଳ ରମ୍ଭା ନିକଟସ୍ଥ ଏକ ଗାଁରେ ଭଡ଼ା ଘର ନେଇ ଯୋଜନା କରୁଥିଲେ। ପୁଲିସ ଡ଼କାୟତ ଦଳର ମାଷ୍ଟର ମାଇଣ୍ତ ଚିତ୍ରସେନଙ୍କ ଫୋନ୍ ନମ୍ବର ବିଶ୍ବସ୍ତ ସୂତ୍ରରୁ ପାଇ ଟ୍ରାକିଂ କରିଥିଲେ ।

୭ଜଣ ଡ଼କାୟତଙ୍କୁ ଭଞ୍ଜନଗର ପୁଲିସ ସହାୟତାରେ ଭଡ଼ା ଘରୁ ଗିରଫ କରିଥିଲେ । ଦୁଇ ଜଣ ମାଷ୍ଟର ମାଇଣ୍ତଙ୍କ ସମେତ ଗଞ୍ଜାମ ଜିଲ୍ଲା କୋଦାଳ ଥାନା ପ୍ରକାଶ ରାଉଲଙ୍କ ପୁଅ ରଞ୍ଜନ ରାଉଲ (୨୬), ରମ୍ଭା ଥାନା ଅରୁଣପୁର ଗ୍ରାମର ମୁନି ମହାରଣାଙ୍କ ପୁଅ ଶଙ୍କର ମହାରଣା, ରମ୍ଭା ଥାନା ବାଲିପଦର ଅରଖପୁର ଗ୍ରାମର ଦୋଳଗୋବିନ୍ଦ ଜେନାଙ୍କ ପୁଅ ନାରାୟଣ ଜେନା (୨୭) ବୁଗୁଡ଼ା ଥାନା ପୋଚାରମୁଣ୍ତି ଗ୍ରାମର ଭଗବାନ ସ୍ବାଇଁଙ୍କ ପୁଅ ଶିଶିର ସ୍ବାଇଁ (୨୭) ଓ କୋଦାଳ ଥାନା ଯୁଧିଷ୍ଠିର ପାଣ୍ତିଙ୍କ ପୁଅ କିଶାନ ପାଣ୍ତି (୨୩) ଙ୍କୁ ପୁଲିସ ଗିରଫ କରିଥିଲା ।

ଏହି ଡ଼କାୟତମାନେ ବିଦେଶି ମଦ ଦୋକାନରୁ ଚୋରି କରିଥିବା ୧ଲକ୍ଷ ୯୨ ହଜାର ଟଙ୍କା ମଧ୍ୟରୁ ୩୦ ହଜାର ଟଙ୍କା ଖର୍ଚ୍ଚ କରି ଦେଇଥିବା ବେଳେ ବାକି ୧ଲକ୍ଷ ୬୨ ହଜାର ଟଙ୍କା ସହିତ ବ୍ୟବହାର କରୁଥିବା ଇଣ୍ତିଗୋ କାର, ୪ଟି ବାଇକ୍, ୯ଟି ସ୍ମାର୍ଟ ଫୋନ୍, ୨ଟି କି ପ୍ୟାଡ଼ ଫୋନ୍, ଗୋଟିଏ ଶାବଳ, ୩ଟି ତାଲା, ପେଚକସ, ମୋବାଇଲ୍ ଚାର୍ଜର, କଟୁରୀ ଜବତ କରାଯାଇଛି । ଏହାପୂର୍ବରୁ ଏହି ଡ଼କାୟତମାନଙ୍କ ନାମରେ ବିଭିନ୍ନ ଜିଲ୍ଲାରେ ୯ଟି ମାମଲା ଥିବା ନୟାଗଡ଼ ଏସପି ସୂଚନା ଦେଇଛନ୍ତି ।

ସେ କହିଛନ୍ତି ଜନସାଧାରଣ ଓ ଭଞ୍ଜନଗର ପୁଲିସ ପାଇଁ ଅପରେସନ ସଫଳତାର ସହ ଶେଷ ହୋଇଛି । ଏହି ପୁଲିସ ଟିମ୍ ରେ ଓଡ଼ଗାଁ ଆଦର୍ଶ ଥାନା ଅଧିକାରୀ ଅଭୟ କୁମାର ବେହେରା, ସବ ଇନସପେକ୍ଟର ଚକ୍ରଧର ସିଂହ ଓ ପୁଲିସ କର୍ମଚାରୀମାନେ ସାମିଲ୍ ଥିଲେ । ଆଜିର ଏହି ସାମ୍ବାଦିକ ସମ୍ମିଳନୀରେ ଅତିରିକ୍ତ ଆରକ୍ଷୀ ଅଧିକ୍ଷକ ସୁବାସ ଚନ୍ଦ୍ର ପଣ୍ତା, ଶରଣକୁଳ ଏସଡ଼ିପିଓ ଦିପ୍ତିକାନ୍ତ ପ୍ରଧାନ ଓ ଥାନାର ସମସ୍ତ ପୁଲିସ କର୍ମଚାରୀମାନେ ଉପସ୍ଥିତ ଥିଲେ ।