ଖୋର୍ଦ୍ଧା-ଜଟଣୀ (ଓଡ଼ିଶା ତାଜା ନ୍ୟୁଜ୍) :- ପୋସ୍ ଆଇନ (କର୍ମସ୍ଥଳୀରେ ମହିଳାମାନଙ୍କ ଯୌନ ଉତ୍ପୀଡ଼ନ, ଏହାର ନିବାରଣ, ନିଷେଧ ଏବଂ ପ୍ରତିକାର) ଆଇନ,୨୦୧୩ ର ଅନୁପାଳନ ପ୍ରତି, ପ୍ରତିବଦ୍ଧତା ଏବଂ ଯେ’କୌଣସି ପ୍ରକାରର ଯୌନ ଉତ୍ପୀଡ଼ନରୁ ମୁକ୍ତ ଏକ ସୁରକ୍ଷିତ କାର୍ଯ୍ୟ ପରିବେଶକୁ ପ୍ରୋତ୍ସାହିତ କରିବା ପାଇଁ ପୂର୍ବତଟ ରେଳପଥ ଖୋର୍ଦ୍ଧାରୋଡ଼ ରେଳ ମଣ୍ଡଳ ପକ୍ଷରୁ ପଲାସା ଷ୍ଟେସନ ଠାରେ ଏକ ସମ୍ବେଦନ ଶୀଳତା କାର୍ଯ୍ୟକ୍ରମ ଆୟୋଜିତ ହୋଇଯାଇଛି ।
ଏହି କାର୍ଯ୍ୟକ୍ରମରେ କାର୍ଯ୍ୟସ୍ଥଳରେ ହେଉଥିବା ଉତ୍ପୀଡ଼ନର ସମାଧାନ ଉପରେ କେନ୍ଦ୍ରିତ ଏକ ସୂଚନା ପ୍ରଦ ଏବଂ ଆକର୍ଷଣୀୟ କର୍ମଶାଳା ଅନୁଷ୍ଠିତ ହୋଇଥିବା ବେଳେ କର୍ମକ୍ଷେତ୍ରରେ ଯେ’କୌଣସି ପ୍ରକାରର ଉତ୍ପୀଡ଼ନ ପ୍ରତି ରେଳ ମଣ୍ଡଳର ଶୂନ୍ୟ-ସହିଷ୍ଣୁତା ନୀତିକୁ ସୁଦୃଢ଼ କରିବା ସମ୍ବନ୍ଧରେ ସଚେତନତା କରାଯାଇଥିଲା ।
ଏହି ଅଧିବେଶନରେ ଖୋର୍ଦ୍ଧାରୋଡ଼ ରେଳମଣ୍ଡଳର ସହାୟକ କାର୍ମିକ ଅଧିକାରୀ ତଥା ବିଶାଖା ଆଭ୍ୟନ୍ତରୀଣ କମିଟିର କାର୍ଯ୍ୟନିର୍ବାହୀ ସଦସ୍ୟ ଓ ଖୋର୍ଦ୍ଧାରୋଡ୍ ରେଳ ମଣ୍ଡଳର ସି-ବକ୍ସର ନୋଡାଲ ଅଧିକାରୀ ଶ୍ରୀମତୀ ତପସ୍ୱିନୀ ମହାନନ୍ଦିଆ ଏକ ବିସ୍ତୃତ ଏବଂ ଅନ୍ତର୍ଦୃଷ୍ଟିପୂର୍ଣ୍ଣ ଆଲୋଚନା କରିଥିଲେ, ଯାହା ମହିଳା କର୍ମଚାରୀଙ୍କ ପାଇଁ ଏକ ସୁରକ୍ଷିତ ଏବଂ ସହାୟକ ପରିବେଶ ସୃଷ୍ଟି କରିବାର ଗୁରୁତ୍ୱ ଉପରେ ଆଲୋକପାତ କରିଥିଲା ।
ସେ ପୋଷ୍ ଆଇନର ପ୍ରମୁଖ ବ୍ୟବସ୍ଥା ଗୁଡ଼ିକ ବିଷୟରେ ବିସ୍ତୃତ ଭାବରେ ବର୍ଣ୍ଣନା କରିଥିଲେ, ଯେଉଁଥିରେ ଅନ୍ତର୍ଭୁକ୍ତ ଥିଲା ଆଭ୍ୟନ୍ତରୀଣ ଅଭିଯୋଗ କମିଟି(ଆଇସିସି)ଏବଂ ବିଶାଖା ଆଭ୍ୟନ୍ତରୀଣ କମିଟି ଏବଂ ଏହାର ଭୂମିକା, ଯୌନ ନିର୍ଯାତନା ଘଟଣାକୁ ନିଷିଦ୍ଧ କରିବା ଏବଂ ଏହାର ପ୍ରତିକାର କରିବାରେ ନିଯୁକ୍ତି ଦାତାଙ୍କ ଦାୟିତ୍ୱ କର୍ମଚାରୀ ମାନଙ୍କ ପାଇଁ ଉପଲବ୍ଧ ଆଇନଗତ ଢାଞ୍ଚା ଏବଂ ପ୍ରତିକାର ବ୍ୟବସ୍ଥା ।
