ମାଲକାନଗିରି (ଓଡ଼ିଶା ତାଜା ନ୍ୟୁଜ୍) :- ମାଲକାନଗିରି ଜିଲ୍ଲା ଦାୟିତ୍ୱରେ ଥିବା ଜିଲ୍ଲା ନୋଡାଲ ସଚିବ ତଥା ଶିଳ୍ପ ବିଭାଗ ନିର୍ଦ୍ଦେଶକ ପ୍ରଶାନ୍ତ କୁମାର ରେଡ୍ଡୀ ମାଲକାନଗିରି ଜିଲ୍ଲା ଗସ୍ତରେ ଆସିଥିଲେ। ଏହି ଅବସରରେ ଜିଲ୍ଲା ପରିଷଦ ସମ୍ମିଳନୀ କକ୍ଷରେ ଏକ ସମୀକ୍ଷା ବୈଠକ ଅନୁଷ୍ଠିତ ହୋଇଯାଇଛି। ଜିଲ୍ଲାପାଳ ଆଶିଷ ଈଶ୍ୱର ପାଟିଲଙ୍କ ଅଧ୍ୟକ୍ଷତାରେ ଆୟୋଜିତ ଏହି ବୈଠକରେ ବନଖଣ୍ଡ ଅଧିକାରୀ ସାଇ କିରଣ, ଅତିରିକ୍ତ ଜିଲ୍ଲାପାଳ ସାଧାରଣ ସୋମନାଥ ପ୍ରଧାନ, ଅତିରିକ୍ତ ଜିଲ୍ଲାପାଳ ରାଜସ୍ୱ ବେଦବର ପ୍ରଧାନ ଓ ଜିଲ୍ଲା ପରିଷଦ ମୁଖ୍ୟ ଉନ୍ନୟନ ଅଧିକାରୀ ତଥା ନିର୍ବାହୀ ଅଧିକାରୀ ନରେଶ ଚନ୍ଦ୍ର ଶବର ଉପସ୍ଥିତ ଥିଲେ।
ଜିଲ୍ଲାପାଳ ଶ୍ରୀ ପାଟିଲ ଜିଲ୍ଲାରେ ଚାଲିଥିବା ସରକାରଙ୍କ ବିଭିନ୍ନ ଯୋଜନା ସମ୍ପର୍କରେ ସଚିବଙ୍କୁ ଅବଗତ କରାଇଥିଲେ। ସର୍ବ ପ୍ରଥମେ ସଚିବ ସମାଜ ମଙ୍ଗଳ ବିଭାଗ ଅଧିନରେ ମମତା, ପୋଷଣ ଅଭିଯାନ ଓ ସୁଭଦ୍ରା ଯୋଜନା ବିଷୟରେ ପଚାରି ବୁଝିଥିଲେ। ଆକାଂକ୍ଷୀ ବ୍ଲକ ମାନଙ୍କରେ ଏହି ସବୁ ଯୋଜନାରେ ଯେପରି ସମସ୍ତ ଲୋକ ଉପକୃତ ହେବେ ସେଥିପ୍ରତି ସଚିବ ଗୁରୁତ୍ୱାରୋପ କରିଥିଲେ। ବିଭିନ୍ନ କାରଣରୁ ବଞ୍ଚିତ ହୋଇଥିବା ସୁଭଦ୍ରା ହିତାଧୀକାରୀକୁ ଅଗ୍ରାଧିକାର ଭିତ୍ତିରେ ଏହି ଯୋଜନାରେ ସାମିଲ କରେଇବା ପାଇଁ ନିର୍ଦ୍ଦେଶ ଦିଆଯାଇଥିଲା।
ସେହିପରି ପିଏମ୍ ଜନମନ ଅଧୀନରେ ଜିଲ୍ଲାର ଆଦିମ ଜନଜାତି ବଣ୍ଡା ଓ ଦିଦାୟୀଙ୍କ ନିମନ୍ତେ ପକ୍କା ଘର, ଶୌଚାଳୟ, ପାନୀୟ ଜଳ ଓ ବିଦ୍ୟୁତ୍ ସେବା ଯୋଗାଇ ଦେବା ପାଇଁ ଜନଜାତି ଉନ୍ନୟନ ବିଭାଗକୁ ନିର୍ଦ୍ଦେଶ ଦିଆଯାଇଛି।ମୁଖ୍ୟମନ୍ତ୍ରୀ ଜନଜାତି ଜୀବିକା ମିଶନ ଓ ସେତୁ ଯୋଜନାରେ ବଣ୍ଡା ଓ ଦିଦାୟୀ ଜନଜାତିଙ୍କ ଜୀଵନ ଜୀବିକାର ଉନ୍ନତି ପାଇଁ ବିଭିନ୍ନ ପଦକ୍ଷେପ ନିଆଯାଇଛି ବୋଲି ବୈଠକରେ କୁହାଯାଇଛି । ପ୍ରଧାନମନ୍ତ୍ରୀ ଆଦି ଆଦର୍ଶ ଗ୍ରାମ ଯୋଜନାରେ ଜିଲ୍ଲାର ୯୫ ଟି ଗ୍ରାମକୁ ଆଦର୍ଶ ଗ୍ରାମ ଭାବେ ରୂପାନ୍ତରଣ କରିବା ପାଇଁ ପଦକ୍ଷେପ ନିଆଯାଇଛି। ଏଥିନିମନ୍ତେ କେନ୍ଦ୍ର ସରକାରଙ୍କ ଜନଜାତି ମନ୍ତ୍ରାଳୟ ୩୬୯ ଟି ପ୍ରକଳ୍ପ ପାଇଁ ୧୯ କୋଟି ୩୩ ଲକ୍ଷ ଟଙ୍କା ମଞ୍ଜୁର କରିଛନ୍ତି। ଜନଜାତି ଆଶ୍ରମ ବିଦ୍ୟାଳୟର ଭିତ୍ତିଭୂମି ସହ ହୋଷ୍ଟେଲ ବ୍ୟବସ୍ଥା ବିଷୟରେ ବୈଠକରେ ଆଲୋଚନା କରାଯାଇଥିଲା ।
ବର୍ଷା ଋତୁ ସମୟରେ ମ୍ୟାଲେରିଆ ଡେଙ୍ଗୁ ଇତ୍ୟାଦି ରୋଗରୁ ରକ୍ଷା ପାଇବା ପାଇଁ ଏଲଏଲଏନ ମଶାରୀ ଓ ପର୍ଯ୍ୟାପ୍ତ ଔଷଧ ବଣ୍ଟନ ବ୍ୟବସ୍ଥା ବିଷୟରେ ମଧ୍ଯ ସଚିବ ପଚାରି ବୁଝିଥିଲେ। ସେହିପରି ଶିକ୍ଷା ବିଭାଗକୁ ସ୍କୁଲ ପୋଷାକ, ବହି, ମଧ୍ୟାହ୍ନ ଭୋଜନ ଓ ଆନୁଷଙ୍ଗିକ ବିଦ୍ୟାଳୟ ଭିତ୍ତିଭୂମି ବିଷୟରେ ପଚରା ଯାଇଛି। ଆକାଂକ୍ଷୀ ଜିଲ୍ଲା ଅଧୀନରେ କାର୍ଯ୍ୟକାରୀ ହୋଇଥିବା ବିଭିନ୍ନ ପ୍ରକଳ୍ପ ବିଷୟରେ ବିସ୍ତାରରେ ଆଲୋଚନା କରାଯାଇଛି। ଜିଲ୍ଲାରେ ଜଳ ସେଚନର ସ୍ଥିତି ନେଇ ମଧ୍ଯ ବିଭାଗୀୟ ଅଧିକାରୀଙ୍କ ସହ ସଚିବ ଆଲୋଚନା କରିଥିଲେ। ଜିଲ୍ଲାରେ କେନାଲ ସ୍ଥିତି ସହ ଶତ ପ୍ରତିଶତ ଜଳ ସେଚନ ହେଉଛି ନା ନାହିଁ ତାହା ମଧ୍ଯ ସୁନିଶ୍ଚିତ କରାଯାଇଛି । ଗ୍ରାମ୍ୟ ଉନ୍ନୟନ ବିଭାଗ ଅଧିନରେ ରାସ୍ତା ନିର୍ମାଣ କାର୍ଯ୍ୟ, ଗ୍ରାମ୍ୟ ଗୃହ ନିର୍ମାଣ, ପ୍ରାଣୀ ସମ୍ପଦ ସ୍ଥିତି ଏବଂ ଦକ୍ଷତା ବିକାଶ ଓ ନିଯୁକ୍ତି ନେଇ ମଧ୍ଯ ଆଲୋଚନା କରାଯାଇଛି ।
ସେହିପରି ମୁଦ୍ରା ଲୋନ୍, ଅଟଳ ପେନସନ ଯୋଜନା, ପ୍ରଧାନମନ୍ତ୍ରୀ ଜୀବନ ଜ୍ୟୋତି ବୀମା ଯୋଜନା, ପ୍ରଧାନମନ୍ତ୍ରୀ ସୁରକ୍ଷା ବୀମା ଯୋଜନା ଓ ପ୍ରଧାନମନ୍ତ୍ରୀ ଜନଧନ ଏକାଉଣ୍ଟ୍ ନେଇ ଲିଡ୍ ବ୍ୟାଙ୍କ୍ ଅଧିକାରୀଙ୍କ ସହ ଆଲୋଚନା କରାଯାଇଛି । ବିଶେଷ ଭାବେ ସୁକ୍ଷ୍ମ କ୍ଷୁଦ୍ର ମଧ୍ୟମ ଉଦ୍ୟୋଗୀଙ୍କୁ ଯୋଗ୍ୟତା ଭିତ୍ତିରେ ଋଣ ଯୋଗାଇ ଦେବା ପାଇଁ ସଚିବ ନିର୍ଦ୍ଦେଶ ଦେଇଛନ୍ତି। ଆଜି ପୂର୍ବାହ୍ନରେ ସଚିବ ଚିତ୍ରକୋଣ୍ଡା ବ୍ଲକ୍ ର ବଡପଡା ଏଜୁକେସନାଲ କମ୍ପ୍ଲେକ୍ସ, ଡ୍ରାଗନ୍ ଫଳ ଚାଷ, ଆମ ବ୍ୟାଙ୍କ୍, ମିନି ମେଗା ପାଇପ ୱାଟର, ଅଙ୍ଗନୱାଡ଼ି କେନ୍ଦ୍ର, ଟନେଲକ୍ୟାମ୍ପ ବହୁମୁଖି ଉତ୍କର୍ଷ କେନ୍ଦ୍ର, ଚିତ୍ରକୋଣ୍ଡା ସରକାରୀ ଉଚ୍ଚ ବାଳିକା ବିଦ୍ୟାଳୟ, ଇକୋ ପାର୍କ ପରିଦର୍ଶନରେ ଯାଇ ସ୍ଥିତି ଦେଖିଥିଲେ। ସେହିପରି ଜିଲ୍ଲାରେ ଚାଲିଥିବା ରେଳ ପ୍ରକଳ୍ପ କାର୍ଯ୍ୟ ମଧ୍ଯ ସଚିବ ସମୀକ୍ଷା କରିଥିଲେ । ଅନ୍ୟ ମାନଙ୍କ ମଧ୍ୟରେ ବୈଠକରେ ଜିଲ୍ଲାର ସମସ୍ତ ଅଧିକାରୀ ଉପସ୍ଥିତ ଥିଲେ।
