ପୁରୀ (ଓଡ଼ିଶା ତାଜା ନ୍ୟୁଜ୍) :- ଜୁନ ୨୭ ତାରିଖ ମହାପ୍ରଭୁଙ୍କ ବିଶ୍ବପ୍ରସିଦ୍ଧ ରଥଯାତ୍ରା । ଏଥିପାଇଁ ସମସ୍ତ ପ୍ରସ୍ତୁତି ଚୁଡାନ୍ତ ପର୍ଯାୟରେ ପହଞ୍ଚିଛି । ଆଇନମନ୍ତ୍ରୀ ପୃଥିବୀରାଜ ହରିଚନ୍ଦନଙ୍କ ଅଧ୍ୟକ୍ଷତାରେ ଆଜି ଟାଉନହଲ ଠାରେ ଦ୍ବିତୀୟ ସମନ୍ଵୟ ବୈଠକ ଅନୁଷ୍ଠିତ ହୋଇଯାଇଛି । ରାସ୍ତାଘାଟ, ପାନୀୟଜଳ, ବିଦ୍ୟୁତ ଯୋଗାଣ, ସ୍ବାସ୍ଥ୍ୟ ସେବା ଓ ପୂର୍ତ୍ତବିଭାଗ କାର୍ଯ୍ଯକୁ ନେଇ ଗୃହରେ ପ୍ରବଳ ହଟ୍ଟଗୋଳ ଦେଖାଯାଇଥିଲା । ରାତି ପାହିଲେ ରଥଯାତ୍ରା । ଏବେ ରାସ୍ତାଘାଟ କାମ ତରବରିଆ ଭାବେ କରାଯାଉଛି । ବୈଠକରେ ଅନେକ ପ୍ରସଙ୍ଗକୁ ନେଇ ଯୁକ୍ତିତର୍କ ଚାଲିଥିଲା । ବୈଠକର ନର୍ଥ, ଇଷ୍ଟ, ୱେଷ୍ଟ ଓ ସାଉଥ (ନ୍ୟୁଜ) ଚାରିପଟର ଖବର କିଛି କଥା ଓ ବ୍ଯଥା । ଦାମ ଦେଖାଇଲେ ଦମ୍ – ସମନ୍ଵୟ ବୈଠକରେ ଏଜେଣ୍ଡା ଅନୁଯାଇ ଆଲୋଚନା ଚାଲିଥିଲା ।
ଏହି ସମୟରେ ଶ୍ରୀମନ୍ଦିରର ବରିଷ୍ଠ ସେବକ ଦାମୋଦର ମହାସୁଆର ଚିହିଙ୍କି ଉଠିଥିଲେ । ଶ୍ରୀମନ୍ଦିର ପରିଚାଳନା କମିଟି ଗଠିତ ହୋଇପାରୁ ନାହିଁ । ଆଇନମନ୍ତ୍ରୀ କରୁଛନ୍ତି ସମୀକ୍ଷା । ନିୟମ ଅନୁଯାଇ ପରିଚଳନା କମିଟି ବିନା ଟଙ୍କାଟିଏ ଖର୍ଚ୍ଚ ହୋଇପାରିବ ନାହିଁ । ଆଗକୁ ଯଦି ଅଘଟଣ ଘଟେ ତେବେ କୋଟି କୋଟି ଟଙ୍କାର ହିସାବ ଦେବ କିଏ ବୋଲି ପ୍ରଶ୍ନ କରିଥିଲେ । ଛତିଶା ନିଯୋଗ ଓ ପୁରୁଣା ପରିଚାଳନା କମିଟିକୁ ନେଇ କେଉଁ ଆଇନ ବଳରେ ବୈଠକ ହେଉଛି । ସେବାୟତ ବିଶୃଙ୍ଖଳା ପାଇଁ ଜଣେ ସେବକଙ୍କୁ ଆଠମାସ ବାସନ୍ଦ କରାଯାଇଥିବା ବେଳେ ଅନ୍ଯଜଣେ ସେବକଙ୍କୁ ଏକମାସ ବାସନ୍ଦ କରାଯାଇଛି କେଉଁ ଆଇନ ବଳରେ ବୋଲି ପ୍ରଶ୍ନ କରିଥିଲେ ।
ସାମ୍ବାଦିକ ତାତିଲେ ହୋହଲ୍ଲାରେ ମାତିଲେ -ଏଜେଣ୍ଡା ଅନୁଯାଇ ବୈଠକ ଚାଲିଥିଲା । ଏହି ସମୟରେ ଜଣେ ସାମ୍ବାଦିକ ଗୋଟିଏ ପ୍ରସଙ୍ଗ ଉପରେ ପ୍ରଶ୍ନ କରିବା ସମୟରେ ଜଣେ ସେବାୟତ ଏହାକ କଣ ପ୍ରେସ ମିଟ୍ ବୋଲି ପ୍ରଶ୍ନ କରିବାରୁ ସାମ୍ବାଦିକ ମାନେ ତାତିଲେ ଓ ହୋହଲ୍ଲାରେ ମାତିଲେ । ବୈଠକକୁ ବର୍ଜନ କରିବା ପାଇଁ ଉଦ୍ୟମ କରୁଥିବା ବେଳେ ପ୍ରଶାସନିକ ଅଧିକାରୀ ଓ ପୋଲିସ ବୁଝାସୁଝା କରିବାରୁ ପରିସ୍ଥିତି ଶାନ୍ତ ପଡିଥିଲା । ଆଇନମନ୍ତ୍ରୀ ଅଧ୍ଯକ୍ଷତା କରୁଥିବା ବେଳେ ସେବାୟତ ମାନେ ଉପରେ ପଡି ଆଦେଶ ଦେବା ଠିକ୍ ନୁହେଁ ବୋଲି କେତେକ ସାମ୍ବାଦିକ କହିଥିଲେ ।
ତାଳି ମାରନ୍ତୁ ନାହିଁ ଏହା ତାଳି ମାରିବା ଯାଗାନୁହେଁ- ଭକ୍ତ ଓ ସହରବାସୀଙ୍କ ପାଇଁ ସାମ୍ବାଦିକ ମାନେ ସହରର ବିଭିନ୍ନ ସମସ୍ଯା ଓ ଅସୁବିଧା ସମୟରେ ମନ୍ତ୍ରୀଙ୍କୁ ଅବଗତ କରାଉଥିବା ବେଳେ ସତ୍ଯ ଅନୁଭୂତିକୁ ନେଇ ଗୃହରେ ପ୍ରବଳ ତାଳି ମାଡ ହୋଇଥିଲା । ଏହା ଦେଖି ଗୃହରେ ଅଧ୍ଯକ୍ଷତା କରୁଥିବା ଆଇନମନ୍ତ୍ରୀ କହିଲେ ଏହା ତାଳି ମାରିବା ଯାଗା ନୁହେଁ । ମହାପ୍ରଭୁଙ୍କ କାମ ପାଇଁ ଆମେ ସମସ୍ତେ ଏକାଠି ହୋଇଛେ । ଅଭାବ ଅସୁବିଧା ସଂପର୍କରେ କୁହନ୍ତୁ । ତାଳି ମାରନ୍ତୁ ନାହିଁ ବୋଲି ମନ୍ତ୍ରୀ ନିବେଦନ କରିଥିଲେ ।
ଆସୁଛି କୋଭିଡ-ତୁଣ୍ଡି ଭିଡି ! – ଚଳିତବର୍ଷ କୋଭିଡ ଯଦିଓ ମାରାତ୍ମକ ନୁହେଁ ତଥାପି ଜନଗହଳିରେ ସଚେତନତାର ଆବଶ୍ୟକତା ରହିଛି ବୋଲି ସ୍ବାସ୍ଥ୍ୟମନ୍ତ୍ରୀ ଓ ସ୍ବାସ୍ଥ୍ୟ ସଚିବ କହିଥିଲେ । ଯେଉଁ ବ୍ଯକ୍ତିଙ୍କର କୋଭିଡ ଲକ୍ଷଣ ଥିବ, ପ୍ରବଳ ଜ୍ବର ହେଉଥିବ, ହାର୍ଟ ଆଟାକ ଥିବ ସେମାନେ ରଥ ଗହଳିକୁ ନାସିବା ପାଇଁ ମନ୍ତ୍ରୀ ପରାମର୍ଶ ଦେଇଥିଲେ । ଆସୁଥିବା ଭକ୍ତ ମାନେ ତୁଣ୍ଡରେ ମାକ୍ସ ବାନ୍ଧିବା ପାଇଁ ପରାମର୍ଶ ଦିଆଯାଇଥିଲା । ଶ୍ରୀମନ୍ଦିର କାର୍ଯ୍ଯାଳୟ କମଳଯାକ……- ଜଣେ ସେବକ ଗୃହରେ ହଠାତ ଉଠିପଡି ମାଇକ୍ରୋଫୋନ ଧରି କହିଲେ ପରିକ୍ରମା ମାର୍ଗ ଯୋଗୁ କେତେକ ନେତା, ଅଧିକାରୀ,ଯନ୍ତ୍ରୀ କୋଟିପତି ହୋଇଛନ୍ତି । ଶ୍ରୀମନ୍ଦିର କାର୍ଯ୍ଯାଳୟରେ ଅନେକ ଖାଉ କର୍ମଚାରୀ ରହିଛନ୍ତି । ପରିକ୍ରମା ମାର୍ଗରେ ଯେତିକି ଦୁର୍ନୀତି ହୋଇଛି ସମସ୍ତେ ବନ୍ଧା ହୋଇଥିଲେ ଝାରପଡା ଜେଲ ପୂର୍ଣ୍ଣ ହୋଇଯାଇଥାନ୍ତା । ହାସ୍ଯରୋଳ ଛଳରେ କହିଲେ ଶ୍ରୀମନ୍ଦିର କାର୍ଯ୍ୟାଳୟ କମଳଯାକ ….
