ଭୁବନେଶ୍ବର ବ୍ଲକ କାର୍ଯ୍ୟାଳୟରେ ସାଂସଦଙ୍କ ସମୀକ୍ଷା ବୈଠକ : ଉତ୍କଳ ଦିବସରୁ ଏଥର ଗାଁକୁ ଗାଁ ବୁଲିବେ ଅପରାଜିତା

୨୦ ମାର୍ଚ୍ଚ ୨୦୨୫ (ଓଡ଼ିଶା ତାଜା ନ୍ୟୁଜ୍) ଭୁବନେଶ୍ବର  :-  ଏଥର ଉତ୍କଳ ଦିବସରୁ ରାଜଧାନୀରେ ଗାଁକୁ ଗାଁ ବୁଲିବେ ସାଂସଦ ଅପରାଜିତା ଷଡ଼ଙ୍ଗୀ । ଆଜି ଭୁବନେଶ୍ବର ବ୍ଲକ କାର୍ଯ୍ୟାଳୟରେ ସମୀକ୍ଷା ଅବସରରେ ଏପରି ଘୋଷଣା କରିଛନ୍ତି ଭୁବନେଶ୍ବର ସାଂସଦ। ଲୋକଙ୍କ ସମସ୍ୟା କିଭଳି ଦୂର ହେବ, ସେଥିପାଇଁ ଭୁବନେଶ୍ବର ବିଡିଓ, ତହସିଲଦାର, ବିଇଓ, ଲାଇନ୍ ଅଫିସର ଏବଂ ଅନ୍ୟ ସମ୍ପୃକ୍ତ ବିଭାଗର ଅଧିକାରୀଙ୍କ ସହିତ ଭୁବନେଶ୍ବର ସାଂସଦ ବିଶେଷ ଆଲୋଚନା କରିଛନ୍ତି । ଆସନ୍ତା ଉତ୍କଳ ଦିବସ, ଏପ୍ରିଲ 1 ତାରିଖରୁ ସାଂସଦ ଶ୍ରୀମତୀ ଷଡ଼ଙ୍ଗୀ ସଂସଦୀୟ କ୍ଷେତ୍ରରେ ଥିବା ଗାଁକୁ ଗସ୍ତ କରିବା କାର୍ଯ୍ୟକ୍ରମ ଆରମ୍ଭ ହେବ ।

ଏହି ଅବସରରେ ଭୁବନେଶ୍ବର ସଂସଦୀୟ କ୍ଷେତ୍ର ଅନ୍ତର୍ଗତ ଗାଁ ଗୁଡି଼କରେ ବିଭିନ୍ନ ସମସ୍ୟାକୁ ନିଜେ ବୁଝିବା ସହିତ , କିଭଳି ଶୀଘ୍ର ସମାଧାନ ହେବ ତାହା ବ୍ୟକ୍ତିଗତ ଭାବେ ତଦାରଖ କରିବେ ବୋଲି କହିଛନ୍ତି ସାଂସଦ ମହୋଦୟା । ଗାଁର ବିକାଶ ହେଲେ, ବାସ୍ତବ ବିକାଶ ସମସ୍ତଙ୍କୁ ଛୁଇଁ ପାରିବ । ବ୍ଲକ ଅଧୀନରେ ସମୟ ସମୟରେ ଅନେକ ବିକାଶମୂଳକ ଅଟକି ରହିଥାଏ । ବର୍ତ୍ତମାନ ଏସବୁ ଅଟକି ରହିଥିବା କାମ ଯେଭଳି ଶୀଘ୍ର ସମାଧାନ ହେବ ସେଥିପାଇଁ ପଦକ୍ଷେପ ନେବାକୁ ସେ ବିଭାଗୀୟ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି ।

ଏଥିସହ ଅଧିକାରୀମାନେ ଗାଁ କୁ ଯାଇ ନିଜେ କ୍ଷେତ୍ର ଅନୁଧ୍ୟାନ କରିବାକୁ ସାଂସଦ ନିର୍ଦ୍ଦେଶ ଦେଇଛନ୍ତି । ରାଜ୍ୟ ଓ କେନ୍ଦ୍ର ସରକାରଙ୍କ ବିଭିନ୍ନ ଲୋକାଭିମୁଖୀ ଯୋଜନା ଯେଭଳି ଗାଁରେ ରହୁଥିବା ମହିଳା, ବୃଦ୍ଧବୃଦ୍ଧା ଓ ଅନ୍ୟ ଲୋକଙ୍କ ପାଖରେ ପହଞ୍ଚିପାରିବ ସେଥିପାଇଁ ଅଧିକାରୀମାନେ ଯତ୍ନବାନ ହେବାକୁ କହିଛନ୍ତି । ବର୍ତ୍ତମାନ ମୁଖ୍ୟମନ୍ତ୍ରୀ ବିଶେଷ ସହାୟତା ଯୋଜନା(ସିଏମଏସଏ), ପିଏମଶ୍ରୀ ସ୍କୁଲ ଯୋଜନା, ପ୍ରଧାନମନ୍ତ୍ରୀ ଆବାସ ଯୋଜନା, ସାଂସଦ ପାଣ୍ଠି, ଅଙ୍ଗନବାଡିର ଉନ୍ନତିକରଣ, ମନରେଗା, ବିକଶିତ ଗାଁ ଓ ବିକଶିତ ଓଡ଼ିଶା, ଅମୃତ ସରୋବର, ଜଳସେଚନ ଯୋଜନା ଏବଂ ଅନ୍ୟ ଯୋଜନା କିଭଳି ଲୋକଙ୍କ ପାଖରେ ସୁବିଧାରେ ପହଞ୍ଚିବ,

ସେ ନେଇ ସମସ୍ତ ବିଡିଓ, ତହସିଲଦାର, ବିଇଓ ଅନ୍ୟ ସମ୍ପୃକ୍ତ ବିଭାଗର ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି ଭୁବନେଶ୍ବର ସାଂସଦ ଅପରାଜିତା ଷଡ଼ଙ୍ଗୀ । ଏଣିକି ଯେପରି କୌଣସି ସାଧାରଣ ଲୋକ ବ୍ଲକ ଅଫିସ ଆସିଲେ, ତାକୁ ଯେଭଳି ସୁବିଧାରେ ସେବା ମିଳିବ ଓ ତାକୁ ଉପଯୁକ୍ତ ସୂଚନା ମିଳିବାରେ ବିଳମ୍ବ ନହେବ, ସେଥିପ୍ରତି ଯତ୍ନବାନ ହେବାକୁ ବିଡିଓମାନଙ୍କୁ ପରାମର୍ଶ ରଖିଛନ୍ତି ସାଂସଦ । ଭୁବନେଶ୍ବର ସାଂସଦଙ୍କ ଏହି ସମୀକ୍ଷା ବୈଠକରେ ଏକାମ୍ର ବିଧାୟକ ବାବୁ ସିଂ, ଉତ୍ତର ବିଧାୟକ ପ୍ରାର୍ଥୀ ପ୍ରିୟଦର୍ଶୀ ମିଶ୍ର, ଖୋର୍ଦ୍ଧା ଜିଲ୍ଲା ବିଜେପି ସଭାପତି ବିଶ୍ବରଞ୍ଜନ ବଡ଼ଜେନା ପ୍ରମୁଖ ଉପସ୍ଥିତ ରହିଥିଲେ । ସାଂସଦଙ୍କ ଉତ୍କଳ ଦିବସରୁ ଗାଁକୁ ଗସ୍ତ ଅଭିଯାନକୁ ସମସ୍ତେ ବିକାଶର ମାର୍ଗଦର୍ଶକ ହେବ ବୋଲି ମତ ରଖିଛନ୍ତି ।