କବାଡିଆ ବେପାରୀ ନିକଟରୁ ୧୩.୧ କେଜି ଗଞ୍ଜେଇ ଜବତ, ଅଭିଯୁକ୍ତ ଅଦାଲତ ଚାଲାଣ

୨୫ ନଭେମ୍ବର ୨୦୨୪ ( ଓଡ଼ିଶା ତାଜା ନ୍ୟୁଜ୍ ) ଭାପୁର :-> ଭାପୁର ବ୍ଲକ ଫତେଗଡ ପଞ୍ଚାୟତ ମଣିପୁର ଗ୍ରାମର କବାଡିଆ ବେପାରୀ ଉପେନ୍ଦ୍ର ଖଟେଇ ଙ୍କୁ ଚୋରା ଗଞ୍ଜେଇ ଚାଲାଣ କରୁଥିବା ନେଇ ପୁଲିସ ଗିରଫ କରି ଅଦାଲତ ଚାଲାଣ କରିଛି । ପୁଲିସ ସୁତ୍ରରୁ ପ୍ରକାଶ ମଣିପୁର ଗ୍ରାମର ଯୁଗୋଳ ଖଟେଇଙ୍କ ପୁଅ ଉପେନ୍ଦ୍ର (ରୁପିଆ) କବାଡିଆ ବେପାର କରି ନିଜର ଗୁଜୁରାଣ ମେଣ୍ଟଇବା ସହିତ ନିଶା କାରବାରରେ ଲିପ୍ତ ରହି ଭଲ ଦୁଇ ପଇସା ରୋଜଗାର କରିଥାଏ । ସେ କବାଡିଆ ଜିନିଷ ଭିତରେ ଗଞ୍ଜେଇ ଭର୍ତ୍ତି କରି ବେପାରୀମାନଙ୍କୁ ଯୋଗେଇଥାଏ ବୋଲି ଫତେଗଡ ପୋଲିସ ନିକଟରେ ଖବର ପହଞ୍ଚିଥିଲା ।

ଏ ନେଇ ପୋଲିସ ଶନିବାର ଦିନ ରୂପିଆକୁ ଧରିବା ପାଇଁ ଥାନାଧିକାରୀ ପଞ୍ଚାନନ ପରିଡ଼ାଙ୍କ ନେତୃତ୍ୱରେ ଏକ ଟିମ୍ ୪୮ ନମ୍ବର ରାଜ୍ୟ ରାଜପଥର ତାଙ୍କ ଗାଁ ଛକ ନିକଟରେ ଛକି ବସିଲେ । ଯେତେବେଳେ ରୁପିଆ ଲୁନା ମୋପେଡରେ କବଡିଆ ଜିନିଷ କ୍ରୟ କରିବ ବୋଲି ଆସିଲା ସେତେବେଳେ ତାକୁ ପୋଲିସ ମାଡ଼ିବସିଲେ ଏବଂ ତା ନିକଟରୁ ୧୩ କେଜି ୧୦୦ ଗ୍ରାମ ଗଞ୍ଜେଇ ସହିତ ଗାଡିକୁ ଜବତ କରି ଥାନାକୁ ଆଣିଥିଲେ । ଏନେଇ ପୁଲିସ ପକ୍ଷରୁ ଏକ ମାମଲା ରୁଜୁ କରିବା ସହ ରବିବାର ଦିନ ଅଭିଯୁକ୍ତ ରୁପିଆକୁ ଅଦାଲତ ଚାଲାଣ କରାଯାଇଥିଲା । ଫତେଗଡ ଥାନା ଅଂଚଳରେ ନିଶା କାରବାର ଦିନକୁ ଦିନ ବୃଦ୍ଧି ପାଉଥିବାବେଳେ ଅଭିଯୁକ୍ତ ବିଭିନ୍ନ ଅଭିନବ ଉପାୟରେ ଗଞ୍ଜେଇ ଚୋରା ଚାଲାଣକୁ ନେଇ ସାଧାରଣରେ ଚର୍ଚ୍ଚା ଜୋର ଧରିଛି l