ନୟାଗଡ ଜିଲ୍ଲା (ଓଡିଶା ତାଜା ନିଉଜ୍) ରଣପୁର 25.12.2019 :- ନୟାଗଡ଼ ଜିଲ୍ଲା ମହୋତ୍ସବ ଓ ପଲ୍ଲିଶ୍ରୀ ମେଳା ଆଜି ଦ୍ୱିତୀୟ ଦିବସ ମହା ଆଡ଼ମ୍ବରରେ ଅନୁଷ୍ଠିତ ହୋଇଯାଇଛି । ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଖଣ୍ଡପଡ଼ା ବିଧାୟକ ସୈାମ୍ୟରଂଜନ ପଟ୍ଟନାୟକ ଯୋଗ ଦେଇଥିଲେ । ନୟାଗଡ଼ ଅତିରିକ୍ତ ଜିଲ୍ଲାପାଳ ବିଧାନଚନ୍ଦ୍ର ରାୟଙ୍କ ସଭାପତିତ୍ୱରେ ଅନୁଷ୍ଠିତ କାର୍ଯ୍ୟକ୍ରମରେ ସମ୍ମାନିତ ଅତିଥି ଭାବେ କେନ୍ଦ୍ର ସମବାୟ ବ୍ୟାଙ୍କ ସଭାପତି ଲୋକନାଥ ସାହୁ ଯୋଗ ଦେଇଥିବା ବେଳେ ଅନ୍ୟତମ ଅତିଥି ଭାବେ ନୟାଗଡ଼ ଜିଲ୍ଲାପାଳ ଡ. ପୋମା ଟୁଡୁ ଯୋଗ ଦେଇଥିଲେ ।
ଗଣତନ୍ତ୍ରରେ ଲୋକମାନଙ୍କୁ ବାନ୍ଧି ରଖିବାରେ ଉତ୍ସବର ଏକ ସ୍ୱତନ୍ତ୍ର ଭୂମିକା ରହିଥିବା ମୁଖ୍ୟ ଅତିଥି ଶୀଯୁକ୍ତ ପଟ୍ଟନାୟକ ତାଙ୍କ ବକ୍ତବ୍ୟରେ କହିବା ସହ ସାମାଜିକ ବ୍ୟବସ୍ଥାରେ ଉତ୍ସବ ସବୁ ଚାର୍ଜର ସଦୃଶ ବୋଲି କହିଥିଲେ । ନୟାଗଡ଼ ମାଟି ହେଉଛି କଳା, ସାହିତ୍ୟ, ସଂସ୍କୃତିର ମାଟି । ଏଠି ମହାନଦୀଠାରୁ ଆରମ୍ଭ କରି ପଠାଣି ସାମନ୍ତଙ୍କ ଯାଏଁ ଅନେକ କିମ୍ବଦନ୍ତି ରହିଥିବା ନେଇ ମୁଖ୍ୟ ଅତିଥି ତାଙ୍କ ବକ୍ତବ୍ୟରେ କହିଛନ୍ତି । ସମ୍ମାନିତ ଅତିଥି ଶ୍ରୀ ସାହୁ ତାଙ୍କ ବକ୍ତବ୍ୟରେ ନୟାଗଡ଼ର ମାଟିର କଥା କହିବା ସହ ପ୍ରଶାସନର ଉଦ୍ୟମକୁ ପ୍ରଶଂସା କରିଥିଲେ ।
ଜିଲ୍ଲା ସୂଚନା ଓ ଲୋକ ସଂମ୍ପର୍କ ଅଧିକାରୀ ଡ. ପ୍ରମୋଦ କୁମାର ନାୟକ ସଂଯୋଜନା କରିଥିଲେ । ଆଜିର ସଂନ୍ଧ୍ୟାରେ ସର୍ବ ପ୍ରଥମେ ସ୍ଥାନୀୟ କଳାକାର ମାନଙ୍କ ଦ୍ୱାରା ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ପରେ ନୟାଗଡ଼ ୟୁନିଟେକ୍ ମହାବିଦ୍ୟାଳୟର ଛାତ୍ରୀମାନଙ୍କ ଦ୍ୱାରା ନୟାଗଡ଼ ବନ୍ଦନା ପରିବେଷଣ କରାଯାଇଥିଲା । ବରଗଡ଼ କଳାଜୀବୀ ଡ୍ୟାନ୍ସ ଗ୍ରୃପ ଦ୍ୱାରା ଅନୁଷ୍ଠିତ ଡାଲଖାଇ ନୃତ୍ୟ ବେଶ୍ ଚିତାକର୍ଷକ ଥିଲା । ସେହିଭଳି ସୁନ୍ଦରଗଡ଼ର ରସରକେଲି ଏବଂ କଳାହାଣ୍ଡି ବଜାସାଲା ଅନୁଷ୍ଠିତ ହୋଇଥିଲା । (ଓଡିଶା ତାଜା ନିଉଜ୍) ରିପୋର୍ଟ – ସୋନାଲି
