ଓଡିଶା ତାଜା ନ୍ୟୁଜ୍ (୧୯ ଅଗଷ୍ଟ ବୁଧବାର ) ରାଉରକେଲା :- ବାସନ୍ତି କଲୋନୀର ଏକ ବୁଲେଟ୍ ସୋ’ରୁମରୁ ଫାଇନାନ୍ସରେ ବୁଲେଟ୍ ନେବା ଜଣେ ନକଲି ମହିଳା ଆଇପିଏସ୍ ଅଫିସରକୁ ମହଙ୍ଗା ପଡିଛି। ଉଦିତନଗର ପୁଲିସ ମହିଳାଙ୍କୁ ଥାନାରେ ଅଟକ ରଖି ପଚରାଉଚୁରା କରୁଛି। ତା ନିକଟରୁ ପୁଲିସ ପିନ୍ଧିଥିବା ନକଲି ପୁଲିସ ପୋଷାକ, ବୁଲେଟ୍, ଆଇପିଏସ୍ ଲୋଗୋ, ନକଲି କାଗଜପତ୍ର ଆଦି ଜବତ କରିଛି। ମହିଳାଙ୍କ ଘର ଭଦ୍ରକ ଜିଲ୍ଲା ଧାମନଗର ଅଞ୍ଚଳର । ଗତ ଏପ୍ରିଲ ମାସରେ ଏମିତି ନକଲି ଆଇପିଏସ୍ ଅଫିସର ପରିଚୟ ଦେଇ ଲୋକଙ୍କୁ ଧକମଚମକ ଦେଇ ଟଙ୍କା ଆଦାୟ କରୁଥିବା ଅଭିଯୋଗରେ ଭୁବନେଶ୍ୱର କ୍ୟାପିଟାଲ ଥାନା ଦ୍ଵାରା ଗିରଫ ହୋଇଥିଲେ। ଆସନ୍ତାକାଲି (ବୁଧବାର) ପୁଲିସ ମହିଳାଙ୍କ କଳା କାରନାମା ସଂକ୍ରାନ୍ତରେ ବିସ୍ତୃତ ତଥ୍ୟ ବୋଲି କହିଛି। ମିଳିଥିବା ସୂଚନା ମୁତାବକ ଗତ ୧୧ତାରିଖରେ ଏକ ଇନୋଭା କାର୍ରେ ମହିଳା ଜଣକ ଆଇପିଏସ୍ ପୋଷାକରେ ଆସି ରାଉରକେଲା ବାସନ୍ତି କଲୋନୀ ବୁଲେଟ୍ ସୋ’ରୁମ୍ରେ ପହଞ୍ଚିଥିଲେ। ନିଜକୁ ଆଇପିଏସ୍ ଅଫିସର ପରିଚୟ ଦେଇ ବୁଲେଟ୍ ଦେଖିଥିଲେ। ପସନ୍ଦ ହେବା ପରେ ନକଲି କାଗଜପତ୍ର, ଆଇପିଏସ୍ ଆଇକାର୍ଡ, ଦୁଇଟି ବ୍ଲାକ ଚେକ୍ ସମେତ ୨୫ ହଜାର ଟଙ୍କା ଅଗ୍ରୀମ ଦେଇ ଋଣରେ ୧ ଲକ୍ଷ ୯୦ ହଜାର ଟଙ୍କାର ବୁଲେଟ୍ ନେଇ ଚାଲି ଯାଇଥିଲେ ।
ଫାଇନାନ୍ସ କମ୍ପାନିର କର୍ମଚାରୀ ଦୁଇଟି ବ୍ଲାକ୍ ଚେକ୍କୁ ବ୍ୟାଙ୍କରେ ଲଗାଇଥିଲେ । ଆକାଉଣ୍ଟରେ ଟଙ୍କା ନଥିବା ଜାଣିବା ପରେ ସନ୍ଦେହ ହେବାରୁ ଉଦିତନଗର ଥାନାରେ ଲିଖିତ ଏତଲା ଦେଇଥିଲେ। ପୁଲିସ ମାମଲା ରୁଜୁ କରି ଘଟଣାର ତଦନ୍ତ ଚଳାଇଥିଲା । ଆଜି ମହିଳା ଜଣକ ପୁଣି ରାଉରକେଲା ସହରକୁ ଆସିଥିବା ଜାଣିବା ପରେ ତା’ର ମୋବାଇଲ ନମ୍ବରକୁ ଟ୍ରାକିଂ କରିଥିଲେ । ଉଦିତନଗର ଅଞ୍ଚଳରେ ଗାଡିରେ ବୁଲୁଥିବା ଅବସ୍ଥାରେ ପୁଲିସ ତାଙ୍କୁ ଥାନାକୁ ନେଇଥିଲେ। ସୂଚନାଯୋଗ୍ୟ, ନକଲି ମହିଳା ଆଇପିଏସ ଅଫିସରଙ୍କୁ କ୍ୟାପିଟାଲ୍ ଥାନା ପୁଲିସ ଗତ ଏପ୍ରିଲ ୨୩ରେ ଗିରଫ କରିଥିଲା । ସେ ମହିଳା ଥାନାକୁ ଫୋନ୍ କରି ନିଜକୁ ୨୦୧୮ ବ୍ୟାଚର ଜଣେ ଆଇପିଏସ ଅଫିସର୍ ବୋଲି ପରିଚୟ ଦେଇଥିଲେ। ତାଙ୍କ ପାଖକୁ କିଛି ଅତ୍ୟାବଶ୍ୟକ ସାମଗ୍ରୀ ପଠାଇବାକୁ କହିଥିଲେ। ତା’ଛଡ଼ା ତାଙ୍କ ପାଖକୁ କିଛି ଟଙ୍କା ପଠାଇବାକୁ କହିଥିଲେ । ପୁଲିସ ଖବର ପାଇ ତାଙ୍କୁ କାବୁ କରି ଥାନାରେ ଜେରା ଚଳାଇଛି। କିଛିମାସ ତଳେ ଭୁବନେଶ୍ୱରରେ ମଧ୍ୟ ଜଣେ ମହିଳା ଏହି ଢଙ୍ଗରେ ଏକ ବୁଲେଟ ହାତେଇଥିବା ମାମଲା ତଦନ୍ତାଧୀନ ରହିଥିଲା ।
