କ୍ଲଷ୍ଟର ସ୍ତରୀୟ ଶିଶୁ ମହୋତ୍ସବ ସୁରଭି- ୨୦୨୪

୨୭ ସେପ୍ଟେମ୍ବର,୨୦୨୪ (ଓଡ଼ିଶା ତାଜା ନ୍ୟୁଜ୍ ) ହିଞ୍ଜିଳିକାଟୁ :-> ଗଞ୍ଜାମ ଜିଲ୍ଲା ହିଞ୍ଜିଳିକାଟୁ ଗୋଷ୍ଠୀ ଶିକ୍ଷାଧିକାରୀଙ୍କ କାର୍ଯ୍ୟାଳୟ ଅଧିନସ୍ଥ ମକରଝୋଳ କ୍ଲଷ୍ଟର ସ୍ତରୀୟ ଶିଶୁ ମହୋତ୍ସବ-୨୦୨୪ ସୁରଭି କାର୍ଯ୍ୟକ୍ରମ ଗୁରୁବାର ଦିନ ଉତ୍ସାହ ଓ ଉଦ୍ଦୀପନାର ସହ ଅନୁଷ୍ଠିତ ହୋଇଯାଇଛି । ସିଆରସିସି ପ୍ରସନ୍ନ କୁମାର ସେଠୀଙ୍କ ତତ୍ତ୍ୱାବଧାନରେ ଗୋପୀନାଥପୁର ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟ ଠାରେ ଉକ୍ତ କାର୍ଯ୍ୟକ୍ରମ ଆୟୋଜିତ ହୋଇଥିଲା। କାର୍ଯ୍ୟକ୍ରମରେ ପ୍ରଧାନ ଶିକ୍ଷକ ଉଲ୍ଲାସ ଚନ୍ଦ୍ର ବେହେରା ସଭାପତିତ୍ବ କରିଥିଲାବେଳେ ବେଳେ ମୁଖ୍ୟ ଅତିଥି ଭାବେ ବଡ଼ଖଣ୍ଡି ଗ୍ରାମ ପଞ୍ଚାୟତ ସରପଞ୍ଚ ଝୁନୁ ନାଇକ, ସମ୍ମାନିତ ଅତିଥି ଭାବେ ସମିତିସଭ୍ୟା କପଲ ନର୍ମଦା, ବିଦ୍ୟାଳୟ ପରିଚାଳନା କମିଟିର ସଭାପତି ପେଦିନୀ ଶୁଭେନ୍ଦୁ ମୋହନ ରାଓ ଓ ହିଞ୍ଜିଳିକାଟୁ ଗୋଷ୍ଠୀ ଶିକ୍ଷାଧିକାରୀ ଏସ. ଗିରିଧର ପ୍ରମୁଖ ମଞ୍ଚାସିନ ଥିଲେ ।

କାର୍ଯ୍ୟକ୍ରମରେ ୧୪ ପ୍ରକାରର ବିଭିନ୍ନ ପ୍ରତିଯୋଗିତା ନିମନ୍ତେ ୭ଟି ବିଦ୍ୟାଳୟର କନିଷ୍ଠ ଓ ବରିଷ୍ଠ ବର୍ଗରେ ସମୁଦାୟ ୧୮୨ ଜଣ ପ୍ରତିଯୋଗୀ ଅଂଶ ଗ୍ରହଣ କରିଥିଲେ । ସେମାନଙ୍କ ମଧ୍ୟରୁ ଉତ୍କର୍ଷତା ହାସଲ କରି ଯୋଗ୍ୟ ବିବେଚିତ ହୋଇଥିବା ୫୩ ଜଣ କୃତି ପ୍ରତିଯୋଗୀଙ୍କୁ ଅତିଥି ମାନେ ପୁରସ୍କାର ଓ ପ୍ରଶଂସାପତ୍ର ପ୍ରଦାନ କରି ସମ୍ବର୍ଦ୍ଧିତ ସହ ଉତ୍ସାହିତ କରିଥିଲେ । ଏହି ଅବସରରେ ଅତିଥିମାନେ ଶିକ୍ଷାର୍ଥୀଙ୍କ ବୌଦ୍ଧିକ, ଶାରୀରିକ ଓ ଅନ୍ତର୍ନିହିତ ଗୁଣର ବିକାଶ ପାଇଁ ଗୁଣାତ୍ମକ ଶିକ୍ଷାଦାନ ବ୍ୟବସ୍ଥା ଉପରେ ଗୁରୁତ୍ୱାରୋପ କରିଥିଲେ। ବିଦ୍ୟାଳୟ ଗୁଡ଼ିକରେ ଉତ୍ତମ ଶୈକ୍ଷିକ ବାତାବରଣ ସୃଷ୍ଟି କରିବା ସହ ସାଂପ୍ରତିକ ଶିକ୍ଷା ପଦ୍ଧତି ଅନୁଯାୟୀ ଶିକ୍ଷାଦାନ କରିବା ସହ ପାଠ୍ୟକ୍ରମର ସବୁ ବିଷୟରେ ଶିକ୍ଷାର୍ଥୀଙ୍କ ମଧ୍ୟରେ ପ୍ରତିଯୋଗିତା ମୂଳକ ପରିବେଶ ପ୍ରସ୍ତୁତ କରି ଏକ ଶ୍ରେଷ୍ଠ ଶିକ୍ଷାର୍ଥୀ ତିଆରି ବିଦ୍ୟାଳୟ ଭାବେ ସୁନାମ ଅର୍ଜ୍ଜନ କରିବା ସକାଶେ ସମସ୍ତଙ୍କୁ ଆହ୍ବାନ ଦେଇଥିଲେ।

ଏହା ବ୍ୟତୀତ ପାଠ୍ୟକ୍ରମ ସହ ଜଡ଼ିତ ବିଷୟ ସହ ବାହ୍ୟଜ୍ଞାନ ସଂପର୍କରେ ଜ୍ଞାନ ଆହରଣ କରି ସଦାସର୍ବଦା ନିଜ ପାରଦର୍ଶିତା ହାସଲ ନିମନ୍ତେ ନିଷ୍ଠା, ଅଧ୍ୟବସାୟ ଏବଂ ସମୟର ସୁବିନିଯୋଗ କରିବା ନିହାତି ଆବଶ୍ୟକ ବୋଲି କୃତି ପ୍ରତିଯୋଗିଙ୍କୁ ମାର୍ଗଦର୍ଶନ ଦେଇଥିଲେ । କାର୍ଯ୍ୟକ୍ରମରେ ଗୋପୀନାଥପୁର, ମକରଝୋଳ, ସମରଝୋଳ, ରଙ୍ଗୁଣୀ ପଲ୍ଲୀ, ପଲ୍ଲୀ ପଦ୍ମନାଭପୁର, ବଡ଼ଖଣ୍ଡି ଉଚ୍ଚ ବିଦ୍ୟାଳୟ ଓ ଉଚ୍ଚ ପ୍ରାଥମିକ ବିଦ୍ୟାଳୟର ଛାତ୍ରଛାତ୍ରୀ ଅଂଶ ଗ୍ରହଣ କରିଥିଲେ । ଶିକ୍ଷକ ଏନ୍ ରଘୁନାଥ ଉପସ୍ଥିତ ଥିବା ଅତିଥି ,ଶିକ୍ଷକ ଓ ଶିକ୍ଷୟତ୍ରୀ ମାନଙ୍କୁ ଧନ୍ୟବାଦ ଅର୍ପଣ କରିଥିଲେ ।