ଓଡ଼ିଶା ତାଜା ନିଉଜ (୧୬ ଅଗଷ୍ଟ ରବିବାର) ହିଞ୍ଜିଳିକାଟୁ :- କରୋନା ମହାମାରୀ ଯୋଗୁଁ ଦୀର୍ଘ ୪ମାସ ଧରି କଟକଣା ଲାଗୁ କରାଯାଇଥିଲା । କରୋନା ସଂକ୍ରମଣକୁ ପ୍ରତିହିତ କରିବା ଲାଗି ଉଭୟ ସରକାର ଓ ପ୍ରଶାସନ ପକ୍ଷରୁ ବହୁ କଟକଣା ଜାରି କରାଯାଇଥିଲା । ଫଳରେ ଅଂଚଳର ପ୍ରାୟ ସମସ୍ତ ବ୍ୟବସାୟିକ ପ୍ରତିଷ୍ଠାନ ବନ୍ଦ ରହିଥିଲା । ହିଞ୍ଜିଳିକାଟୁ ପୌରାଂଚଳ ସମେତ ବ୍ଳକର ବିଭିନ୍ନ ଗ୍ରାମାଂଚଳରେ ବର୍ତମାନ ସ୍ଥିତିରେ ସ୍ୱାବ ନମୁନା ଓ ଟେଷ୍ଟ ଯେତିକି ପରିମାଣରେ ବୃଦ୍ଧି ପାଉଛି ସେହି ଅନୁପାତରେ ସଂକ୍ରମିତଙ୍କ ସଂଖ୍ୟା କମିବାରେ ଲାଗିଛି । କହିବାକୁ ଗଲେ ସ୍ଥାନୀୟ ଅଂଚଳରେ କରୋନାରେ ସାମାନ୍ୟ ସୁଧାର ଆସିଛି । ଅଗଷ୍ଟ ମାସ ପହିଲାରୁ ଅନଲକ-୩ କାର୍ଯ୍ୟକାରୀ କରାଯିବା ସହ କଟକଣାରେ କିଛିଟା କୋହଳ କରାଯାଇଛି । କେବଳ ଚାହା, ପାନ ଓ ଗୁଟଖା ଦୋକାନକୁ ବାଦ୍ ଦେଲେ ଅନ୍ୟ ସମସ୍ତ ବ୍ୟବସାୟିକ ପ୍ରତିଷ୍ଠାନ ଗୁଡ଼ିକ ପ୍ରତ୍ୟହ ଭୋର ୫ଟାରୁ ଅପରାହ୍ନ ୪ଟା ପର୍ଯ୍ୟନ୍ତ ଖୋଲିବା ସକାଶେ ପ୍ରଶାସନ ପକ୍ଷରୁ ଅନୁମତି ପ୍ରଦାନ କରାଯାଇଛି । ପ୍ରଶାସନର ଏଭଳି ନିଷ୍ପତି ଯୋଗୁଁ ସ୍ଥାନୀୟ ପୌରାଂଚଳର ଚାହା, ପାନ ଓ ଗୁଟଖା ଦେକାନୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି ।
ଗ୍ରାମାଂଚଳ ଗୁଡ଼ିକରେ ପ୍ରଶାସନିକ ଅଧିକାରୀଙ୍କ ପକ୍ଷରୁ ତଦାରଖ କରାଯାଉନଥିବା ବେଳେ ଗ୍ରାମାଂଚଳ ଗୁଡ଼ିକରେ ଚାହା, ପାନ ଓ ଗୁଟଖା ଦୋକାନୀ ମାନେ ବ୍ୟବସାୟ ଚଲାଇ ଆସୁଛନ୍ତି । କିନ୍ତୁ ସ୍ଥାନୀୟ ପୌରାଂଚଳରେ ପ୍ରତ୍ୟହ ପୁଲିସ, ରାଜସ୍ୱ ଓ ପୌର ପ୍ରଶାସନ ପକ୍ଷରୁ ଏନଫୋର୍ସମେଂଟ ଟିମ୍ ଗଠନ କରାଯାଇ ଚଢାଉ ଜୋରଦାର କରାଯାଉଥିବାରୁ ଚାହା, ପାନ ଓ ଗୁଟଖା ଦୋକାନୀ ମାନେ ଗ୍ରାମାଂଚଳ ପରି ବ୍ୟବସାୟ କରିପାରୁନାହାନ୍ତି । ଦୀର୍ଘ ୪ ମାସ କାଳ ପ୍ରଶାସନର ଲକଡ଼ାଉନ, ସଟଡ଼ାଉନ, କଂଟେନମେଂଟ ଓ ବଫରଜୋନ ଘୋଷଣା କରାଯାଇଥିବାରୁ ସ୍ଥାନୀୟ ପୌରାଂଚଳର ଚାହା, ପାନ ଓ ଗୁଟଖା ଦୋକାନୀ ମାନେ ସେମାନଙ୍କ ଦୋକାନ ଖୋଲି ପାରିନାହାନ୍ତି । ଫଳରେ ସେମାନଙ୍କ ରେୀାଜଗାର ସମ୍ପୁର୍ଣ୍ଣ ଠପ୍ ହୋଇଯାଇଛି । ଏଭଳି ପରିସ୍ଥିତିରେ ପରିବାର ପ୍ରିତିପୋଷଣ କରିବା ସେମାନଙ୍କ ପକ୍ଷେ କଷ୍ଟକର ହୋଇପଡ଼ିଛି । ତେଣୁ ଅନ୍ୟ ବ୍ୟବସାୟିକ ପ୍ରତିଷ୍ଠାନ ଖୋଲିବା ପରି ସ୍ଥାନୀୟ ପୌରାଂଚଳର ଚାହା, ପାନ ଓ ଗୁଟଖା ଦୋକନକୁ ମଧ୍ୟ କୋଭିଡ଼ ନିୟମ ପାଳନ ପୂର୍ବକ ଖୋଲିବାକୁ ଅନୁମତି ପ୍ରଦାନ କରିବା ସକାଶେ ସ୍ଥାନୀୟ ପୌରାଂଚଳର ବହୁ ଚାହା, ପାନ ଓ ଗୁଟଖା ଦୋକାନୀ ଅନୁରୋଧ କରିଛନ୍ତି । ( ରିପୋର୍ଟ – ଶେଷଦେବ ସାହୁ )
