ସଂପୁର ବଣିଆସାହି ରାସ୍ତାରେ ଆଣ୍ଠୁଏ ପାଣି: ହୀନସ୍ତ ହେଉଛନ୍ତି ଗାଁଲୋକେ

୧୧ ଅଗଷ୍ଟ,୨୦୨୪ (ଓଡ଼ିଶା ତାଜା ନ୍ୟୁଜ୍ ) ବୋଲଗଡ଼  :-> ରାଜ୍ୟ ତଥା କେନ୍ଦ୍ର ସରକାରଙ୍କ ଦ୍ୱାରା ବହୁ ଯୋଜନାରେ ଗ୍ରାମ୍ୟ ଦାଣ୍ଡ ଓ ଗ୍ରାମୀଣ ଲୋକଙ୍କ ଯାତାୟାତ ନିମନ୍ତେ କଂକ୍ରିଟ ପକ୍କା ସଡକ ରାସ୍ତା ଅଥବା ପିଚୁରାସ୍ତା ନିର୍ମାଣ ହୋଇ ସୁଗମନାଗମନର ବ୍ୟବସ୍ଥା କରାଯାଉଅଛି । ତେବେ ରାଜନେତା କିମ୍ବା ବିଭାଗୀୟ ଅଧିକାରୀମାନଙ୍କ ମନମାନିରେ ଏଯାବତ ବୋଲଗଡ଼ ବ୍ଲକରେ ଅନେକ ଗ୍ରାମରାସ୍ତା ଅଧା ପନ୍ତରିଆ ଭାବେ ପଡିରହି ଥିବା ଦେଖିବାକୁ ମିଳିଛି । ଏହାର ଏକ ନିଚ୍ଛକ ନମୁନା ବୋଲଗଡ଼ ବ୍ଲକ ଖଙ୍ଗୁରିଆ ଗ୍ରାମ ପଞ୍ଚାୟତ ଅଧୀନ ସଂପୁର ଗ୍ରାମର ବଣିଆସାହି ପଶ୍ଚିମ ତରଫ ଦାଣ୍ଡ ଅସଜଡ଼ା ଅବସ୍ଥାରେ ଦୀର୍ଘଦିନ ଧରି ପାଣିଜମିବା ସହିତ ପରିବେଶ ସନ୍ତସନ୍ତିଆ କାଦୁଅ ପଚପଚରେ ପରିପୂର୍ଣ୍ଣ ହୋଇ ରହିଅଛି । ସାଧାରଣ ଲୋକେ ଯାତାୟାତରେ ବିଶେଷ ସମସ୍ୟା ସୃଷ୍ଟି ହେବା ସହ ପଚା ଆବର୍ଜନା ପାଣି ଜମିବା ଫଳରେ ନାନା ସଂକ୍ରାମକ ରୋଗ ହେବାର ଆଶଙ୍କାକୁ ଏଡାଇ ହେବନାହିଁ ।

ଫଳରେ ପଚାପାଣି ଜମି ରହିବା ଦ୍ଵାରା ବିଭିର୍ଣ୍ଣ ରୋଗର ବାହକ ମଶା, ମାଛି ମାନଙ୍କ ସଂଖ୍ୟା ବୃଦ୍ଧି ପାଉଛି ।ବିଶେଷ କରି ବର୍ଷାଋତୁରେ ସ୍ଥାନୀୟ ଲୋକମାନଙ୍କର ଯାତାୟାତରେ ଅନେକ ସମସ୍ୟା ସ ହି ତ ମହାମାରୀ ରୋଗ ବଢିବାର ଆଶଙ୍କାକୁ ଦ୍ୱିଗୁଣିତ କରୁଛି । ଏହି ରାସ୍ତାର ଅବସ୍ଥା ଏପରି ହୋଇଛି ଯେ ସ୍ଥାନୀୟ ଲୋକ ଏବଂ ବଣିଆସାହିର ଲୋକମାନଙ୍କ ପାଇଁ ସମ୍ପୃକ୍ତ ରାସ୍ତାଟି ନର୍କ ପାଲଟିଛି।ପାଦରେ ଚାଲିବା ଦୂରର କଥା ସାଧାରଣ ମୋଟର ସାଇକେଲ ଓ ସାଇକେଲରେ ଯାତାୟାତ କରିବାକୁ ଲୋକେ ଭୟ କରୁଛନ୍ତି । ଅଙ୍ଗନୱାଡି ଶିଶୁ, ସ୍କୁଲପିଲା ଏବଂ କଲେଜକୁ ଯାଉଥିବା ଛାତ୍ରଛାତ୍ରୀମାନେ ନାନାଦି ଅସୁବିଧାର ସମ୍ମୁଖୀନ ହେଉଛନ୍ତି।ତେବେ ବିଗିଡି ଯାଇଥିବା ସମ୍ପୃକ୍ତ ରାସ୍ତାର ଅବସ୍ଥାକୁ ତୁରନ୍ତ ସଜାଡ଼ିବା ପାଇଁ ବଣିଆସାହିର ବାସିନ୍ଦା ଏବଂ ସ୍ଥାନୀୟ ଲୋକମାନେମାନେ ଦାବି କରିଛନ୍ତି ।