ଓଡିଶା ତାଜା ନ୍ୟୁଜ୍ (୧୧ ଅଗଷ୍ଟ ମଙ୍ଗଳବାର ) ଜଗତସିଂହପୁର :- ସୁଦୂର ବିଶାଖାପାଟଣାର ବିଶିଷ୍ଟ ସମାଜସେବୀ ପ୍ରହ୍ଲାଦ ଚନ୍ଦ୍ର ମହାନ୍ତିଙ୍କ ପରଲୋକ ଆମ ସମସ୍ତଙ୍କୁ ଶୋକାଭିଭୂତ କରିଛି । ଜଗତସିଂହପୁର ଜିଲ୍ଲା ପଞ୍ଚପଲ୍ଲୀ ଗ୍ରାମର ମୂଳବାସିନ୍ଦା ହେଉଛନ୍ତି ସ୍ୱର୍ଗତ ମହାନ୍ତି । ଦୀର୍ଘ ବର୍ଷ ଧରି ପ୍ରବାସରେ ରହି ବ୍ୟବସାୟ କରୁଥିଲେ ମଧ୍ୟ ତାଙ୍କର ଓଡ଼ିଶା ସହିତ ଆତ୍ମିକ ସଂପର୍କ ବଳବତ୍ତର ଥିଲା । ସେ ଜଣେ ସଫଳ ବ୍ୟବସାୟୀ ଥିଲେ । ବୃତ୍ତିରେ ବ୍ୟବସାୟୀ ହୋଇଥିଲେ ମଧ୍ୟ ପ୍ରବୃତ୍ତିରେ ଓଡ଼ିଶା ପ୍ରୀତି ଓ ବଦାନ୍ୟତା ଭରି ରହିଥିଲା । ତାଙ୍କର ବଦାନ୍ୟତା ମାଧ୍ୟମରେ ବହୁ ବ୍ୟକ୍ତି ଉପକୃତ ହୋଇଛନ୍ତି ।
ବହୁ ଗରିବ, ମେଧାବୀ ଛାତ୍ରଛାତ୍ରୀଙ୍କୁ ଆର୍ଥିକ ସହାୟତା ଦେଇ ସ୍ୱର୍ଗତ ମହାନ୍ତି ସେମାନଙ୍କୁ ଉଚ୍ଚଶିକ୍ଷା ଆହରଣ କରାଇବା ସହିତ ସମାଜରେ ପ୍ରତିଷ୍ଠିତ କରାଇବାରେ ସୁଯୋଗ ପ୍ରଦାନ କରିଥିଲେ । ଜଣେ ସରଳ, ଉଦାର ଓ ପରୋପକାରୀ ବ୍ୟକ୍ତି ଭାବରେ ତାଙ୍କର ସବୁମହଲରେ ଆଦର ରହିଥିଲା । ପନିୀ ସୁଲେଖିକା ପୁଣ୍ୟପ୍ରଭା ଦେବୀଙ୍କ ସୃଜନ ଆଗ୍ରହ ତାଙ୍କ ପରିବେଶକୁ ରୁଦ୍ଧିମନ୍ତ କରିଥିବାବେଳେ ସେ ଜଣେ ସାହିତ୍ୟାନୁରାଗୀ ଭାବେ ଏ ଦିଗରେ ତରୁଣମାନଙ୍କୁ ବିଶେଷ କରି ଉତ୍ସାହିତ କରିଆସୁଥିଲେ ।
ତାଙ୍କ ବିୟୋଗରେ ଅଞ୍ଚଳବାସୀ ଗଭୀର ମର୍ମାହତ ହୋଇଛନ୍ତି । ମୃତୁ୍ୟ ବେଳକୁ ତାଙ୍କୁ ୯୦ ବର୍ଷ ବୟସ ହୋଇଥିଲା । ତାଙ୍କ ପରଲୋକରେ ମୁଁ ଗଭୀର ଶୋକପ୍ରକାଶ କରିବା ସହିତ ଦିବଂଗତ ଆତ୍ମାର ସଦ୍ଗତି କାମନା କରୁଛି ଓ ଶୋକସନ୍ତପ୍ତ ପରିବାରବର୍ଗଙ୍କ ପ୍ରତି ଗଭୀର ସମବେଦନା ଜ୍ଞାପନ କରୁଛି । ତାଙ୍କର ସଫଳ ବ୍ୟବସାୟିକ ଆଦର୍ଶ, ବଦାନ୍ୟତା ଓ ସମାଜସେବା ଗୁଣ ସମସ୍ତଙ୍କୁ ଅନୁପ୍ରାଣିତ କରୁଥାଉ, ଏତିକି ମୋର କାମନା ।
