ବିଜେଡି ବୈଠକ : ପ୍ରଥମଥର ପାଇଁ ନବୀନ ପଟ୍ଟନାୟକ ବିରୋଧୀ ଦଳ ନେତା ନିର୍ବାଚିତ

– ପ୍ରସନ୍ନ ଆଚାର୍ଯ୍ୟ ହେଲେ ବିରୋଧୀ ଦଳ ଉପନେତା

– ପ୍ରମିଳା ମଲ୍ଲିକ ବିରୋଧୀ ଦଳ ମୁଖ୍ୟ ସଚେତକ

– ପ୍ରତାପ ଦେବ ବିରୋଧୀ ଦଳ ଉପମୁଖ୍ୟ ସଚେତକ

– ବିଜେଡି ବିଧାୟକ ଦଳ ବୈଠକରେ ନିଆଗଲା ନିଷ୍ପତ୍ତି

୧୯ ଜୁନ୍,୨୦୨୪ (ଓଡ଼ିଶା ତାଜା ନ୍ୟୁଜ୍ ) ଭୁବନେଶ୍ୱର :-> ବିଧାନସଭାର ରୁଲସ୍ ଅଫ ପ୍ରୋସିଜିଓରରେ ବିରୋଧୀ ଦଳର ‘ଉପନେତା’ କିମ୍ବା ‘ଉପମୁଖ୍ୟ ସଚେତକ’ ଭଳି ପଦବୀ ନଥିଲେ ମଧ୍ୟ ବିଜେଡି ଆଜି ଏହି ଅଣସାମ୍ବିଧାନିକ ପଦବୀରେ ଦଳର ଦୁଇଜଣ ନେତାଙ୍କୁ ରଖିଛି । ଆଜି ଅପରାହ୍ନରେ ଶଙ୍ଖ ଭବନରେ ବିଜେଡି ବିଧାୟକ ଦଳ ବୈଠକ ବସି ଦଳର ସୁପ୍ରିମୋ ନବୀନ ପଟ୍ଟନାୟକଙ୍କୁ ବିଧାୟକ ଦଳ ନେତା ଭାବେ ମନୋନୀତ କରାଯାଇଛି ।

ବରିଷ୍ଠ ନେତା ପ୍ରସନ୍ନ ଆଚାର୍ଯ୍ୟଙ୍କୁ ବିଧାୟକ ଦଳ ଉପନେତା, ପ୍ରମିଳା ମଲ୍ଲିକଙ୍କୁ ବିରୋଧୀ ଦଳ ମୁଖ୍ୟ ସଚେତକ ଓ ପ୍ରତାପ କେଶରୀ ଦେବଙ୍କୁ ବିରୋଧୀ ଦଳ ଉପମୁଖ୍ୟ ସଚେତକ ଭାବେ ଚୟନ କରାଯାଇଛି । ବିଧାନସଭାରେ ବିରୋଧୀ ଦଳ ଉପନେତା କି ଉପମୁଖ୍ୟ ସଚେତକ ଭଳି କୌଣସି ବୈଧ ପଦବୀ ନାହିଁ ।

ବାଚସ୍ପତି ଗୃହ କାର୍ଯ୍ୟସମ୍ପାଦନ କଲାବେଳେ ସମ୍ପୃକ୍ତ ପଦବୀକୁ ସମ୍ବୋଧନ ମଧ୍ୟ କରିପାରିବେ ନାହିଁ । ବିରୋଧୀ ଦଳ ଚାହିଁଲେ ମନଇଚ୍ଛା ଅନେକ ପଦ ସୃଷ୍ଟି କରିପାରିବ, କିନ୍ତୁ ସେମାନଙ୍କର ସବୁ ପଦବୀ ବିଧାନସଭା ବାଚସ୍ପତିଙ୍କ ଦ୍ୱାରା ଗ୍ରହଣୀୟ ହୋଇନଥାଏ । ବାଚସ୍ପତି ଗୃହରେ ସେମାନଙ୍କୁ ଅନ୍ୟ ସାଧାରଣ ବିଧାୟକଙ୍କ ଭଳି ସମ୍ବୋଧନ କରିଥାନ୍ତି ।