ଓଡିଶା ତାଜା ନ୍ୟୁଜ୍ (୦୬ ଅଗଷ୍ଟ ଗୁରୁବାର)ଢେଙ୍କାନାଳ :- କିଛି ଦିନ ତଳେ ଢେ଼ଙ୍କାନାଳ ଜିଲ୍ଲା ସଦର ଥାନା ଅନ୍ତର୍ଗତ ଭାପୁର ଫାଣ୍ଡି ଅଧିକାରୀଙ୍କ ଦାୟିତ୍ବହୀନତା ରୁ ଦୀନବନ୍ଧୁପୁର ଗ୍ରାମର ଜଣେ ୧୭ ବର୍ଷୀୟା ନାବାଳିକା ଆତ୍ମହତ୍ୟା ଘଟଣା ମନରୁ ନ ଲିଭୁଣୁ ପୁଣି ଏକ ଅଭାବନୀୟ ଘଟଣା ଦେଖିବାକୁ ମିଳିଛି ପୁଣି ସେହି ସଦର ଥାନା ଅନ୍ତର୍ଗତ ତାଳବରକୋଟ ଗ୍ରାମରେ।ରାତି ଅଧରେ ଫୁଟିଲା ସିରିଜ୍ ବୋମା । ଲୋକେ ଭୟଭୀତ। ଜଣେ ଗୁରୁତର।ଦୁଇ ଆହତ।
ସୂଚନା ମୁତାବକ, ଗତ କିଛିଦିନ ତଳେ ସରପଞ୍ଚଙ୍କ ଗୋଷ୍ଠୀର କିଛି ଯୁବକ ତାଳବରକୋଟ ହାଇସ୍କୁଲ ସାମ୍ନା ପାଚେରୀ କୁ ଲାଗି ସେଠାରେ ମାଟି ପକାଇ କିଛି ଦୋକାନ କରିବାକୁ ବ୍ୟବସ୍ଥା କରୁଥିବା ସ୍ଥାନୀୟ ଲୋକ ଜାଣିପାରି ଏହାକୁ ବିରୋଧ କରିବାରୁ ଗାଁରେ ଦଳୀୟ ଗୋଷ୍ଠୀ କନ୍ଦଳ ହୋ୍ଇଥିଲା । ଏହାକୁ ନେଇ ଗତକାଲି ରାତିରେ ସରପଞ୍ଚଙ୍କ ଗୋଷ୍ଠୀର କିଛି ଯୁବକ ଗାଁରେ ବିଭିନ୍ନ ସ୍ଥାନରେ ଗଣ୍ଡଗୋଳ କରି ଲୋକଙ୍କୁ ମାରଣାତ୍ମକ ଆକ୍ରମଣ କରିବା ସହ ତିନୋଟି ସିରିଜ୍ ବୋମା ଫୁଟାଇଛନ୍ତି । ଏହି ଆକ୍ରମଣରେ ଗାଁର ସବର ସାହିର ସୁମନ୍ତ ବେହେରା ମୁଣ୍ଡରେ ଗଭୀର ଆଘାତ ହେବାରୁ ତାଙ୍କୁ ତୁରନ୍ତ ଜିଲ୍ଲା ମୁଖ୍ୟ ଚିକିତ୍ସାଳୟ ଏବଂ ଗୁରୁତର ହେବାରୁ କଟକ ସ୍ଥାନାନ୍ତର କରାଯାଇଛି। ଆକ୍ରମଣରେ ଅନ୍ୟ ଦୁଇ ଜଣ ମଧ୍ୟ ଆହତ ହୋଇଛନ୍ତି ।
ଏହି ଘଟଣାକୁ ନେଇ ଗୋବିନ୍ଦପୁର ଫାଣ୍ଡିରେ ତିନୋଟି କେଶ୍ ରୁଜୁ ହୋଇଛି । ପୋଲିସ ଘଟଣା ସ୍ଥଳରୁ ବୋମା, OR05X4676 ନମ୍ବର ବିଶିଷ୍ଟ ଏକ ବାଇକ୍ ଜବତ କରିବା ସହ ଅଭିଯୁକ୍ତ ବିଶ୍ଵ ଭୁଷଣ ମହାନ୍ତି(ବିଭୁ) ନାମକ ଯୁବକକୁ ଗିରଫ କରି ତଦନ୍ତ ଜାରି ରଖିଛି ଏବଂ ଘଟଣାରେ ଅଭିଯୁକ୍ତ ସତ୍ୟପ୍ରିୟ ରାଉତ(ଟୁଟୁ) ଏପର୍ଯ୍ୟନ୍ତ ଫେରାର ଅଛନ୍ତି। ଆକ୍ରମଣ ପଛରେ ସରପଞ୍ଚଙ୍କ ପ୍ରଚ୍ଛନ୍ନ ହାତ ଥିବା ଅଭିଯୋଗ କରିଛନ୍ତି ଆହତ ବ୍ୟକ୍ତି।
ରିପୋର୍ଟ ( ଢେ଼ଙ୍କାନାଳ ଅମର ରଞ୍ଜନ ଦାସ)
