ଓଡିଶା ତାଜା ନ୍ୟୁଜ୍ (୦୫ ଅଗଷ୍ଟ ବୁଧବାର) ହିଞ୍ଜିଳିକାଟୁ :- ମହାମାରୀ କରୋନା ଭୁତାଣୁ ସଂକ୍ରମଣକୁ ପ୍ରତିହିତ କରିବା ପାଇଁ ସରକାର ଚଳିତ ମାସ ପହିଲାରୁ ଅନଲକ- ୩ କାର୍ଯ୍ୟକାରୀ କରିଛନ୍ତି । ଅଗଷ୍ଟ ମାସରେ କୋହଳ କରାଯାଇଛି କରୋନା କଟକଣା । ପ୍ରତ୍ୟହ ଭୋର ୫ଟାରୁ ଅପରାହ୍ନ ୪ ଟା ପର୍ଯ୍ୟନ୍ତ ବ୍ୟବସାୟ କରିବା ସକାଶେ ପ୍ରଶାସନ ପକ୍ଷରୁ ଅନୁମତି ପ୍ରଦାନ କରାଯିବା ପରେ ହିଞ୍ଜିଳିକାଟୁ ସହର ଚଳଚଂଚଳ ହୋଇପଡ଼ିଛି । ଏହାର ଫାଇଦା ନେବାରେ ଲାଗିଛନ୍ତି କିଛି ଅମାନିଆ । ପୂର୍ବରୁ ଯେଭଳି ଥିଲେ ବର୍ତମାନ ମଧ୍ୟ ଠିକ୍ ସେିମିତି । ପ୍ରଶାସନ ପକ୍ଷରୁ କଟକଣାକୁ କୋହଳ କରାଯିବା ପରେ ମଧ୍ୟ କିଛି ଅମାନିଆ ନିୟମକୁ ଗୁରୁତ୍ୱ ଦେଉନଥିବା ଲକ୍ଷ୍ୟ କରାଯାଉଛି । ଜରୁରୀ କାମ ନଥିଲେ ମଧ୍ୟ ବିନା କାରଣରେ ମୋଟର ସାଇକେଲ ଧରି ସହର ସାରା ଚକ୍କର କାଟୁଛନ୍ତି ।
ପାନ, ଚାହା ଦୋକାନକୁ ବାଦ୍ ଦେଇ ସମସ୍ତ ବ୍ୟବସାୟିକ ପ୍ରତିଷ୍ଠାନ ଖୋଲା ରହୁଥିବା ବେଳେ ବହୁ ବ୍ୟବସାୟିକ ପ୍ରତିଷ୍ଠାନରେ ସାମାଜିକ ଦୂରତା ରକ୍ଷା ରହୁନଥିବା ଦେଖିବାକୁ ମିଳିଛି । ବିଶେେ କରି ବୁଧବାର ପୌରାଂଚଳର ଆମିଷ ବଜାରରେ ଗ୍ରାହକଙ୍କ ଅସମ୍ଭବ ଭିଡ଼ ଦେଖିବାକୁ ମିଳିଥିଲା । ସେପଟେ ଯେଉଁ କେତେକ କାରବାରେ ଉପରେ କଟକଣା ଲାଗୁ କରାଯାଇଛି, ସେସବୁ କ୍ଷେତ୍ରରେ ଲୁଚାଛପାରେ କାମ କରାଯାଉଛି । ଦୀର୍ଘ ୪ ମାସର ବ୍ୟବଧାନ ପରେ ଦୈନିକ ୧୧ଘଂଟା ସକାଶେ ଦୋକାନ ବଜାର ଖୋଲା ରହୁଛି । ମଧ୍ୟାନ୍ନର କିଛି ସମୟକୁ ବାଦ ଦେଲେ ପ୍ରାୟତଃ ସକାଳ ଓ ଅପରାହ୍ନରେ ବ୍ୟବସାୟିକ ପ୍ରତିଷ୍ଠାନ ସମ୍ମୁଖରେ ଗ୍ରାହକଙ୍କ ଭିଡ଼ ଜମୁଛି । ପୌରାଂଚଳର ୧୫ଟି ୱାର୍ଡ଼ ରେଡ଼୍ ଜୋନ ଭାବେ ଘୋଷଣା କରାଯାଇଥିବା ବେଳେ ଲୋକଙ୍କ ଯାତାୟତ ଉପରେ କଟକଣା ଜାରି ସକାଶେ ବିଭିନ୍ନ ୱାର୍ଡ଼ର ପ୍ରବେଶ ପଥରେ ବ୍ୟାରିକେଡ଼ କରାଯାଇ ସିଲ୍ କରାଯାଇଛି । କିନ୍ତୁ ଲୋକେ ଗଳାବାଟ ଦେଇ ଯାତାୟତ କରୁଥିବାର ଦେଖିବାକୁ ମିଳୁଛି ।
ଶ୍ରାବଣ ମାସରେ ବହୁ ଶୈବ ଭକ୍ତ ଆମିଷ ବର୍ଜନ କରିଥିବା ବେଳେ ଗତ ଦୁଇ ଦିନ ଧରି ମଧ୍ୟାନ୍ନ ୧୨ଟା ପର୍ଯ୍ୟନ୍ତ ଆମିଷ ବଜାରରେ ଗ୍ରାହକଙ୍କ ଗହଳି ଜମି ଥିଲା । ପରିବା ଓ ତେଜରାତି ଦୋକାନ ସମ୍ମୁଖରେ ବ୍ୟାରିକେଡ଼ ନିର୍ମାଣ କରାଯାଇଥିବାରୁ ଗ୍ରାହକ ଓ ଦୋକାନୀଙ୍କ ମଧ୍ୟରେ ଦୂରତା ରହୁଥିବା ବେଳେ ମାଛ, ମାଂସ ଓ ଚିକେନ ଦୋକାନ ଗୁଡ଼ିକରେ ଏହାର ବ୍ୟତିକ୍ରମ ଦେଖା ଦେଇଥିଲା । ସହରରେ ଲୁଚାଛପାରେ ବିଭିନ୍ନ କାରବାର ହେଉଛି । ସନ୍ଧ୍ୟା ୫ଟା ପରେ ୧୩ ଘଂଟା କର୍ଫ୍ୟୁକୁ ଅବମାନନା କରି ବିଭିନ୍ନ ହୋଟେଲ ଓ ତେଜରାତି ଦୋକାନ ଗୁଡ଼ିକର ସମ୍ମୁଖ ଭାଗ ବନ୍ଦ କରାଯାଇଥିବା ବେଳେ ପଛପଟ ଦେଇ କାରବାର ଚାଲୁ ରହୁଛି । ଏପରିକି କିଛି ଚୋରା ବେପାରୀ ମଦ କାରବାରର ଆସର ଜମାଉଥିବାର ଦେଖିବାକୁ ମିଳୁଛି । (ହିଞ୍ଜିଳିକାଟୁ/ଶେଷଦେବ ସାହୁ)
