ହୋମ ଯଜ୍ଞ ସହ ହରିଶଙ୍କର ନୃସିଂହ ଚତୁର୍ଦ୍ଦଶୀ ବୈଶାଖ ମେଳା ଉଦଘାଟିତ, ପ୍ରଶାସନ ର ଅବହେଳା ଯୋଗୁଁ ମେଳା ଫିକା ପଡ଼ିଲା

୨୨ ମେ , ୨୦୨୪ (ଓଡ଼ିଶା ତାଜା ନ୍ୟୁଜ୍ ) ଖପ୍ରାଖୋଲ :-> ବଲାଙ୍ଗିର ଜିଲ୍ଲା ଖପ୍ରାଖୋଲ ବ୍ଲକ୍ ର ପ୍ରମୁଖ ପୁଣ୍ୟ କ୍ଷେତ୍ର ହରିଶଙ୍କର ଠାରେ ନୃସିଂହ ଚତୁର୍ଦ୍ଦଶୀ ବୈଶାଖ ମେଳା ମଙ୍ଗଳବାର ଉଦଘାଟିତ ହୋଇଯାଇଛି । ଏହି ଅବସରରେ ପ୍ରଥମେ ପାପନାଶିନୀ ଝରଣା କଳସ ଶୋଭାଯାତ୍ରା ରେ ପାଣି ଆଣି ବିଶ୍ଵଶାନ୍ତି ମହାଯଜ୍ଞ ଆରମ୍ଭ ହୋଇଥିଲା । ପରେ ସନ୍ଧ୍ୟାରେ ହରିଶଙ୍କର ମହୋତ୍ସବ ଉଦଘାଟିତ ହୋଇଥିଲା । ଉଦଘାଟନୀ ଉତ୍ସବ ରେ ମୁଖ୍ୟ ଅତିଥି ରୂପେ ବଲାଙ୍ଗିର ଅତିରିକ୍ତ ଆରକ୍ଷୀ ଅଧିକ୍ଷକ ହେମନ୍ତ କୁମାର ପାଢ଼ୀ, ସମ୍ମାନିତ ଅତିଥି ରୂପେ ଖପ୍ରାଖୋଲ ତହସିଲଦାର ଆଦିତ୍ୟ ପ୍ରସାଦ ମିଶ୍ର ପ୍ରମୁଖ ଯୋଗଦେଇ ପ୍ରଦୀପ ପ୍ରଜ୍ବଳନ କରି ଉଦଘାଟନ କରିଥିଲେ । ଏହି ଅବସରରେ ଦେବୋତ୍ତର କମିଟି ସଦସ୍ୟ ଇନ୍ଦୁଭୁଷଣ ଠାକୁର, ରାଣା ପ୍ରଧାନ, ବିପ୍ର ବିଶି, ସୁଶିଲ ଗୁରୁ ପ୍ରମୁଖ ଉପସ୍ଥିତ ଥିଲେ ।

ଏହି ଅବସରରେ ପ୍ରଥମ ମଞ୍ଚରେ ସାତ କୁଆଁରି ସାଂସ୍କୃତିକ ଅନୁଷ୍ଠାନ ର ସାଂସ୍କୃତିକ କାର୍ଯ୍ୟକ୍ରମ ଓ ରାମ ଲୀଳା ମଞ୍ଚସ୍ଥ ହୋଇଥିଲା । ସେହିପରି ଦ୍ୱିତୀୟ ମଞ୍ଚରେ ଯଦୁ ସୁନା ଓ ଗ୍ରୁପ ର ମେଲୋଡି ଓ ଦଣ୍ଡ ନୃତ୍ୟ ପରିବେଷଣ ହେବାରଥିଲା ହେଲେ ଉଜାଡି ଦେଲା କାଳବୈଶାଖୀ ଝଡ଼ ବର୍ଷା । ମେଳାରେ ପ୍ରବଳ ଜନ ସମାଗମ ହୋଇଥିଲେ ମଧ୍ୟ ପ୍ରଶାସନ ଠିକ୍ ଭାବରେ ପ୍ରସ୍ତୁତି କରି ନଥିବାରୁ ପର୍ଯ୍ୟଟକ ତଥା ଶ୍ରଦ୍ଧାଳୁ ମାନେ ନାହିଁ ନ ଥିବାର ଅସୁବିଧା ର ସମ୍ମୁଖୀନ ହେଉଥିବା ଅଭିଯୋଗ ହୋଇଛି । ବିଭିନ୍ନ ବିଭାଗ ସହିତ ଯୋଗାଯୋଗ ଅଭାବ ରୁ ପାନୀୟ ଜଳ ଯୋଗାଣ, ସଫେଇ, ବିଜୁଳି ଆଲୁଅ ଆଦି ପ୍ରଭାବିତ ହୋଇଥିବା ଦେଖାଦେଇଛି । ଏହାକୁ ନେଇ ସ୍ଥାନୀୟ କମିଟି କର୍ମକର୍ତ୍ତା ତଥା ଜନସାଧାରଣ ଅସନ୍ତୋଷ ପ୍ରକାଶ କରିଛନ୍ତି। ପୂର୍ବ ବର୍ଷ ପାଞ୍ଚ ଦିନ ମହୋତ୍ସବ ହୋଇଥିବା ବେଳେ ଚଳିତ ବର୍ଷ ନିର୍ବାଚନ ଥିବାରୁ ତିନି ଦିନ ମହୋତ୍ସବ ଆୟୋଜିତ ହେଉଥିବା ଜଣାଯାଇଛି ।