ଓଡିଶା ତାଜା ନ୍ୟୁଜ୍ ( ୦୪ ଅଗଷ୍ଟ ମଙ୍ଗଳବାର ) ହିଞ୍ଜିଳିକାଟୁ :- ଦୀର୍ଘ ଦିନ ପରେ ଗଞ୍ଜାମ ଜିଲ୍ଲା ହିଞ୍ଜିଳିକାଟୁ ଅଂଚଳରେ ଲଘୁଚାପ ପ୍ରଭାବରେ ବର୍ଷା ହୋଇଛି । ଗତ ୨ଦିନ ଧରି ସାମାନ୍ୟ ବର୍ଷା ହୋଇଥିଲେ ମଧ୍ୟ ତଳି ପୋଡ଼ି ଯିବାର ଆଶଙ୍କା କରି ଦୁଃଖରେ ଥିବା ଚାଷୀଙ୍କ ମନରେ ହସ ଫୁଟିଛି । ବର୍ଷାଭାବରୁ ପଡ଼ିଆ ପଡ଼ିଥିବା ଜମିରେ ବର୍ତମାନ ସାମାନ୍ୟ ବର୍ଷା ହେବାରୁ ଧାନତଳି ରୂଆ କାର୍ଯ୍ୟ ଆରମ୍ଭ ହୋଇଛି । ଚଳିତ ଜୁନ ମାସରେ ଆବଶ୍ୟକତା ଠାରୁ ୩୦% ବର୍ଷା ଅଧିକ ହୋଇଥିଲା । ତେବେ ଜୁଲାଇ ମାସରେ ଆବଶ୍ୟକତା ଠାରୁ ୧୮% ବର୍ଷା କମ୍ ହୋଇଥିଲା । ଧାରା ଶ୍ରାବଣରେ ବର୍ଷାର ଦେଖା ମିଳିନଥିଲା । ହିଞ୍ଜିଳିକାଟୁ ବ୍ଳକର ୯୬୯୦ ହେକ୍ଟର ଜମିରେ ଧାନଚାଷ କରିବା ସକାଶେ ଲକ୍ଷ୍ୟ ରଖାଯାଇଥିବା ବେଳେ ଜୁଲାଇ ମାସ ଦ୍ୱିତୀୟ ସପ୍ତାହ ସୁଦ୍ଧା ୩୧୦ ହେକ୍ଟର ଜମିରେ ଧାନ ବୁଣା ଯାଇଥିବା ବେଳେ ୯୩୮ହେକ୍ଟ ଜମିରେ ତଳି ଓ ୨୦୧ ହେକ୍ଟର ଜମିରେ ଧାନ ରୂଆ ଯାଇଥିଲା । ଫଳରେ ସ୍ଥାନୀୟ ବ୍ଳକର ପ୍ରାୟ ୩୦% ଜମିରେ ଧାନ ରୂଆ ଯାଇଥିବା ବେଳେ ପ୍ରାୟ ୭୦% ଜମି ଧାନତଳି ରୂଆ ବାଧାପ୍ରାପ୍ତ ହେବା ସହ ପଡ଼ିଆ ପଡ଼ିଥିଲା ।
ଅନ୍ୟପକ୍ଷରେ ରୂଆ ସରିଥିବା ଜମିରେ ପାଣି ନଥିବାରୁ ତଳି ପୋଡ଼ିଯିବାର ଯଥେଷ୍ଟ ସମ୍ଭାବନା ଦେଖା ଦେଇଥିଲା । ଶ୍ରାବଣ ମାସରେ ଜମି ଫାଟି ରହିଥିଲା । ଏହାକୁ ନେଇ ସ୍ଥାନୀୟ ଅଂଚଳର ଚାଷୀଙ୍କ ମଧ୍ୟରେ ଭାଳେଣି ପଡ଼ିଥିଲା । ତେବେ ବଙ୍ଗୋପ ସାଗରରେ ସୃଷ୍ଟି ହୋଇଥିବା ଲଘୁଚାପ ଯୋଗୁଁ ଗତ ୨ ଦିନ ଧରି ସାମାନ୍ୟ ଧରଣର ବର୍ଷା ଲାଗି ରହିଛି । ଲଘୁଚାପ ବର୍ଷା ଆସନ୍ତା ୬ ତାରିଖ ଯାଏଁ ଲାଗି ରହିବ ବୋଲି ପାଣିପାଗ ବିଭାଗ ପକ୍ଷରୁ ସୂଚନା ମିଳିଛି । ତେଣୁ ବଳକା ରହିଥିବା ଜମିରେ ଧାନତଳି ରୂଆ ହୋଇପାରିବ ବୋଲି ଚାଷୀ ମାନେ ଆଶା କରି କାମ ଆରମ୍ଭ କରିଛନ୍ତି । ତେବେ ମହାମାରୀ କରୋନା ଭୁତାଣୁ ସଂକ୍ରମଣକୁ ପ୍ରତିହିତ କରିବା ଲାଗି ସ୍ଥାନୀୟ ବ୍ଳକ ପ୍ରଶାସନ ପକ୍ଷରୁ ୨୧ଟି ପଂଚାୟତ ମଧ୍ୟରୁ ୧୦ଟି ପଂଚାୟତକୁ କଂଟେନମେଂଟ ଜୋନ ଘୋଷଣା କରାଯାଇଥିବାରୁ ତଳି ରୂଆ ସକାଶେ ଶ୍ରମିକ ମାନେ ଯାଇ ପାରୁନାହାନ୍ତି । ଯଦ୍ୱାରା ଚାଷୀ ମାନେ ନାନା ଅସୁବିଧାର ସମ୍ମୁଖୀନ ହେଉଛନ୍ତି । ଚାଷୀଙ୍କ ହିତ ସକାଣେ କଂଟେନମେଂଟ ଜୋନ ଗୁଡ଼ିକରେ କଟକଣାକୁ କିଛିଟା କୋହଳ କରିବାକୁ ଚାଷୀକୂଳ ପ୍ରଶାସନକୁ ନିବେଦନ କରିଛନ୍ତି । (ରିପୋର୍ଟ -ଶେଷଦେବ ସାହୁ )
