ଓଡିଶା ତାଜା ନ୍ୟୁଜ୍ (୦୨ ଅଗଷ୍ଟ ରବିବାର) ହିଞ୍ଜିଳିକାଟୁ :- ମହାମାରୀ କରୋନା ଭୁତାଣୁ ସଂକ୍ରମଣ ବ୍ୟାପିବା ପର ଠାରୁ ବୁଲା ଗାଇଗୋରୁ ମାନଙ୍କ ଅବସ୍ଥା ସଙ୍ଗୀନ ହୋଇ ପଡ଼ିଲାଣି । ସେମାନଙ୍କୁ ଆଉ ଖାଇବାକୁ ଖାଦ୍ୟ ମିଳୁନାହିଁ । ରାସ୍ତା କଡ଼ରେ ଭୋକ ଉପାସରେ ଏଣେତେଣେ ବୁଲୁଛନ୍ତି । ଦିନ ସାରା ଯେଉଁଠି ଯାହା ପାଇଲେ ତାହା ଖାଇଲେ ନଚେତ ଭୋକ ଉପାସରେ ଏଣେତେଣେ ବୁଲି ରାତିରେ ରାସ୍ତାକଡ଼ରେ ଶୋଇଲେ । ଏଭଳି ଦୃଶ୍ୟ ଦେଖିବାକୁ ମିଳିଛି ହିଞ୍ଜିଳିକାଟୁ ପୌରାଂଚଳରେ । ମହାମାରୀ କରୋନା ଭୁତାଣୁ ସଂକ୍ରମଣକୁ ପ୍ରତିହିତ କରିବା ଲକ୍ଷ୍ୟରେ ସରକାରଙ୍କ ପକ୍ଷରୁ ପ୍ରଥମ ପର୍ଯ୍ୟାୟ ଲକଡ଼ାଉନ ସମୟରେ ସରକାରୀ ଓ ବେସରକାରୀ ସ୍ତରରେ ବୁଲା ଗାଇଗୋରୁଙ୍କ ପ୍ରତି ବେଶ ମାନବିକତାର ପରିଚୟ ଦେଖିବାକୁ ମିଳିଥିଲା । ସ୍ଥାନୀୟ ପୌର ପରିଷଦ କାର୍ଯ୍ୟାଳୟ ପକ୍ଷରୁ କ୍ରମାଗତ ଭାବେ ଦୈନିକ ୨ଥର ଲେଖାଏଁ ଲଗାତାର ୨ ମାସ ଧରି ସହରରେ ବୁଲୁଥିବା ଗାଇଗୋରୁ ଓ କୁକୁର ମାନଙ୍କୁ ଖାଦ୍ୟ ଯୋଗାଇ ଦିଆଯାଉଥିଲା ।
ସେହିପରି ସ୍ଥାନୀୟ ଅଂଚଳର ବିଭିନ୍ନ ସ୍ୱେଛାସେବୀ ସଂଗଠନ ପକ୍ଷରୁ ପନିପରିବା ସଂଗ୍ରହ କରି ସହରର ବିଭିନ୍ନ ସାହି ବସ୍ତି ଓ ରାଜପଥ ଉପରେ ବୁଲୁଥିବା ଗାଇଗୋରୁଙ୍କୁ ଖାଦ୍ୟ ଯୋଗାଇ ଦିଆଯାଉଥିବାର ଦେଖିବାକୁ ମିଳିଥିଲା । ମେ ମାସ ଶେଷ ସପ୍ତାହରେ ପୌର ପରିଷଦ ପକ୍ଷରୁ ଗାଇଗୋରୁ ଓ କୁକୁର ମାନଙ୍କୁ ପ୍ରଦାନ କରାଯାଉଥିବା ଖାଦ୍ୟ ଯୋଗାଣ ବନ୍ଦ କରି ଦିଆଯାଇଥିଲା । ଏପରିକି କିଛି ଦିନ ପରେ ମଧ୍ୟ ବହୁ ସ୍ୱେଛାସେବୀ ସଂଗଠନ ପକ୍ଷରୁ ମଧ୍ୟ ବୁଲା ଗାଇଗୋରୁ ଓ କୁକୁର ମାନଙ୍କୁ ଖାଦ୍ୟ ଦିଆଯାଉନଥିବା ଦେଖିବାକୁ ମିଳିଛି । ପ୍ରକାଶ ଥାଉକି, ଗଞ୍ଜାମ ଜିଲ୍ଲାର ୨ୟ ବୃହତମ ସହର ଭାବେ ପରିଗଣିତ ହିଞ୍ଜିଳିକାଟୁ ପୌରାଂଚଳରେ କରୋନା ସଂକ୍ରମଣ କାୟା ବସ୍ତାର କରି ପରିସ୍ଥିତି ଜଟିଳ ଦିଗକୁ ଗତି କରିଛି । ପ୍ରଶାସନ ପକ୍ଷରୁ ବାରମ୍ବାର ଲକଡ଼ାଉନ, ସଟଡ଼ାଉନ ସମେତ ବିଭିନ୍ନ ଅଂଚଳକୁ କଂଟେନମେଂଟ ଓ ବଫରଜୋନ ଭାବେ ଘୋଷଣା କରାଯାଇଛି ।
ବିଭିନ୍ନ ପ୍ରବେଶ ପଥକୁ ସିଲ୍ କରାଯାଇ ପୌରାଂଚଳର ବଜାର, ବ୍ୟବସାୟିକ ପ୍ରତିଷ୍ଠାନ ବନ୍ଦ କରାଯିବା ସହ ଅତ୍ୟାବଶ୍ୟକ ନହେଲେ ଲୋକଙ୍କୁ ଘରୁ ବାହାରକୁ ନବାହାରିବାକୁ ପରାମର୍ଶ ଦିଆଯାଇଥିଲା । ଇତି ମଧ୍ୟରେ ପୌରାଂଚଳର ବିଭିନ୍ନ ସାହି ବସ୍ତିରେ ସଂକ୍ରମିତଙ୍କ ସଂଖ୍ୟା ବୃଦ୍ଧି ପାଇ ଏବେ ନିଜ ନିଜ ପରିବାରର ସୁରକ୍ଷା ଚିନ୍ତା ବଢିଯାଇଛି । ପୌରାଂଚଳର ଅଧିକାଂଶ ଲୋକେ କରୋନା ସଂକ୍ରମଣ ଭୟରେ ଘରୁ ବାହାରକୁ ବାହାରୁନଥିବା ଦେଖିବାକୁ ମିଳିଛି । କିଛି ଅମାନିଆ ବିନା କାରଣରେ ବାଇକ ଧରି ଚକ୍କର କାଟୁଥିବା ବେଳେ ସେମାନେ ସଂକ୍ରମିତ ହେବା ସହ ସେମରାନଙ୍କ ସଂପ୍ସର୍ଶରେ ଆସିଥିବା କିଛି ଲୋକ ଓ ପରିବାର ସଦସ୍ୟ କରେନାରେ ସଂକ୍ରମିତ ହେଉଥିବାର ନଜିର ରହିଛି । ଏପରି ବିପଦ ଜନକ ସ୍ଥିତିରେ ଜନଜୀବନର ସୁରକ୍ଷା ସକାଶେ ପ୍ରଶାସନ ଅଧିକ ତତ୍ପର ହୋଇ ଉଠିଛି । କରୋନା ଭୁତାଣୁ କବଳରୁ ଜନସାଧାରଣଭ୍କ ସୁରକ୍ଷା ପାଇଁ ବିଭିନ୍ନ ସରକାରୀ କର୍ମଚାରୀ ତଥା କରେନା ଯୋଦ୍ଧା ଦିନରାତି ଏକ କରିକମାରେ ଲାଗି ପଡ଼ିଥିବା ବେଳେ ସେମାନଙ୍କ ମଧ୍ୟରୁ ଅଧିକାଂଶ କରୋନାରେ ଆକ୍ରାନ୍ତ ହୋଇଛନ୍ତି ।
ଏପରି ଘଡ଼ିସନ୍ଧି ମୂହୁର୍ତରେ ସାଧାରଣ ଜନତାଙ୍କ ସୁରକ୍ଷା ବଡ଼ ପ୍ରଶ୍ନ ହୋଇଥିବା ବେଳେ ଅନ୍ୟ କୌଣସି ପ୍ରସଙ୍ଗ ଆଲୋଚନାର ପରିସରଭୁକ୍ତ ହେଉନାହିଁ । ତେବେ ରାସ୍ତା କଡ଼ରେ ବୁଲୁଥିବା ଗାଇଗୋରୁ ଓ କୁକୁରଙ୍କ କଥା ବୁଝିବ କିଏ, ଏ ନେଇ ବୁଦ୍ଧିଜୀବି ମହଲରେ ପ୍ରଶ୍ନବାଚି ସୃଷ୍ଟି ହୋଇଛି । ଅନ୍ୟପକ୍ଷରେ ଗୋଧନ ପାଳିଥିବା ଗହକର୍ତା ମାନେ ଗୁହାଳରୁ ଗାଇ ଗୋରୁଙ୍କୁ ଫିଟାଇ ରାସ୍ତାକୁ ଛାଡ଼ି ଦେଉଥିବାର ଦେଖିବାକୁ ମିଳିଛି । ଜାତୀୟ ରାଜପଥ ଉପରେ ଗାଇଗୋରୁ ଅବାଧରେ ଚଳପ୍ରଚଳ ଓ ଶୋଇ ରହୁଥିବାରୁ ବହୁ ସମୟରେ ଦୂର୍ଘଟଣା ଘଟି ବହୁ ଗାଇଗୋରୁଙ୍କ ମୃତ୍ୟୁ ହେଉଥିବାର ଦେଖିବାକୁ ମିଳିଛି । ବର୍ତମାନ ପରିସ୍ଥିତିରେ ପରିବା ବଜାର ସମ୍ପୁର୍ଣ୍ଣ ବନ୍ଦ ରହିଥିିବା ବେଳେ ଗାଇଗୋରୁ ମାନଙ୍କୁ ପଚା ପରିବା ମଧ୍ୟ ଖାଇବାକୁ ମିଳୁନାହିଁ । ଏଭଳି ସ୍ଥିତିରେ ବିଶ୍ୱ ମହାମାରୀ କରୋନା ପଶୁ ଠାରୁ ଆରମ୍ଭ କରି ମଣିଷ ପର୍ଯ୍ୟନ୍ତ ସମସ୍ତଙ୍କ ପାଇଁ ଅଧିକ ଦାଉ ସାଧୁଛି । (ହିଞ୍ଜିଳିକାଟୁ/ଶେଷଦେବ ସାହୁ)
