ପଞ୍ଜିକରଣ କେନ୍ଦ୍ର ଓ ଟୋକେନ୍ ବ୍ୟବସ୍ଥା କାର୍ଯ୍ୟକ୍ଷମ

୫ ଏପ୍ରିଲ, ୨୦୨୪ ( ଓଡିଶା ତାଜା ନ୍ୟୁଜ ) ହିଞ୍ଜିଳିକାଟୁ :-> ହିଞ୍ଜିଳିକାଟୁ ସହରରେ ଅବସ୍ଥିତ ଥିବା ଉପଖଣ୍ଡ ଚିକିତ୍ସାଳୟକୁ ଦୈନିକ ୭ଶହରୁ ଅଧିକ ରୋଗୀ ଉନ୍ନତମାନର ସ୍ୱାସ୍ଥ୍ୟସେବା ପାଇବା ସକାଶେ ଆସୁଥିବା ଦେଖାଯାଇଛି । ସ୍ଥାନୀୟ ସହର ସମେତ ଆଖପାଖ ଅଞ୍ଚଳରୁ ଶହ ଶହ ରୋଗୀଙ୍କ ଆଗମନକୁ ଆଖି ଆଗରେ ରଖି ସ୍ୱାସ୍ଥ୍ୟ ବିଭାଗ ପକ୍ଷରୁ ପର୍ଯ୍ୟାୟ କ୍ରମେ ବିଭିନ୍ନ ପ୍ରକାରର ସ୍ବାସ୍ଥ୍ୟ ସେବା ଯୋଗାଇ ଦିଆ ଯାଇଛି। ଅଧିକାଂଶ ସମୟରେ ବିଭିନ୍ନ ବିଭାଗରେ ନିୟୋଜିତ ଡ଼ାକ୍ତରଙ୍କ ପରାମର୍ଶ ଓ ଚିକିତ୍ସା ସୁବିଧା ପାଇବା ସକାଶେ ସାଧାରଣତଃ ରୋଗୀ ମାନେ ଲମ୍ବା ଧାଡ଼ିରେ ଠିଆ ହୋଇ ରହିଥିବା ଦେଖିବାକୁ ମିଳୁଛି।

ଏହାକୁ ଅଧିକ ଗୁରୁତ୍ବ ଦିଆଯିବା ସହ ସରଳୀକରଣ କରାଯାଇ ଉପଖଣ୍ଡ ଚିକିତ୍ସାଳୟର ବହିର୍ବିଭାଗ କୋଠାରେ ପବିତ୍ର ଉତ୍କଳ ଦିବସରେ ପଞ୍ଜିକରଣ କେନ୍ଦ୍ର ଓ ଟୋକେନ ବ୍ୟବସ୍ଥା କରାଯାଇଛି। ପ୍ରଥମ ପର୍ଯ୍ୟାୟରେ ଅସ୍ଥିଶୈଲ୍ୟ ଓ ଅସ୍ତ୍ରୋପଚାର ବିଭାଗରେ ଏହାକୁ କାର୍ଯ୍ୟକ୍ଷମ କରାଯାଇଛି। ସମ୍ପୃକ୍ତ ରୋଗୀ ନିଜ ନାମ ପଞ୍ଜିକୃତ କରିବା ପରେ ଆଉ ପୂର୍ବ ପରି ଧାଡ଼ିରେ ଠିଆ ନ ହୋଇ ଡ଼ାକ୍ତରଙ୍କ ପ୍ରକୋଷ୍ଠ ସମ୍ମୁଖରେ ଉପଲବ୍ଧ ଥିବା ଆସନରେ ବସିବେ।

ପ୍ରକୋଷ୍ଠ ସମ୍ମୁଖରେ ଲାଗିଥିବା ପରଦାରେ ସେମାନଙ୍କ ନମ୍ବର ପ୍ରଦର୍ଶିତ ହେବା ପରେ ଚିକିତ୍ସା ଓ ଅନ୍ୟାନ୍ୟ ବିଷୟରେ ପରାମର୍ଶ ପାଇବାରେ ଅଧିକ ସହଜସାଧ୍ୟ ହେବ। ନୂତନ ଅଧିକ୍ଷକ ତଥା ପ୍ରସୂତି ଓ ସ୍ତ୍ରୀ ରୋଗ ବିଶେଷଜ୍ଞ ଡ଼ାକ୍ତର ଶ୍ରୀକାନ୍ତ ସାହୁ, ଅସ୍ଥିଶଲ୍ୟ ବିଶେଷଜ୍ଞ ଡାକ୍ତର ଆଦିତ୍ୟ ମହାପାତ୍ର ଓ ଅସ୍ତ୍ରୋପଚାର ବିଭାଗର ସହକାରୀ ଡାକ୍ତର ତପନ ମଲ୍ଲ, ସହକାରୀ ଡାକ୍ତର ସୋନାଲି ଗୁପ୍ତା,ଫାର୍ମାସିଷ୍ଟ କାର୍ତ୍ତିକେଶ୍ୱର ସାହୁ, ସାଗର ସାହୁ ଓ ହିସାବ ରକ୍ଷକ ସତ୍ୟ ପଟ୍ଟନାୟଙ୍କ ସମେତ ଅନ୍ୟାନ୍ୟ ସ୍ୱାସ୍ଥ୍ୟ କର୍ମଚାରୀ ଉପସ୍ଥିତ ଥିଲେ।