ନିର୍ମାଣଧିନ କୋଠାରେ ଯୁବକଙ୍କୁ ନିର୍ମମ ହତ୍ୟା – କାରଣ ଅସ୍ପଷ୍ଟ ସାଇଣ୍ଟଫିକ୍ ଟିମ୍ ଓ ପୁଲିସର ତନାଘନା

୩୦ ମାର୍ଚ୍ଚ ୨୦୨୪ (ଓଡ଼ିଆ ତାଜ଼ା ନ୍ୟୁଜ) ହିଞ୍ଜିଳିକାଟୁୂ :-> ଶନିବାର ଅପରାହ୍ନରେ ଗଞ୍ଜାମ ଜିଲ୍ଲା ବେଲଗାଁ ଥାନା ଡି. ପାଟପୁର ଗ୍ରାମର ଏକ ନିର୍ମାଣଧିନ କୋଠାରୁ ଜଣେ ଯୁବକଙ୍କ କ୍ଷତାକ୍ତ ମୃତଦେହକୁ ପୁଲିସ ଉଦ୍ଧାର କରିଛି । ମୃତକ ଜଣଙ୍କ ହେଲେ ବେଲଗାଁ ଥାନା ହନ୍ତୋଷ ଗ୍ରାମର ସଞ୍ଜୟ ନାୟକ(୩୦) । ସଞ୍ଜୟ ଘର ଭିତରେ ଖଟ ଉପରେ ଶୋଇଥିବା ଅବସ୍ଥାରେ କେହି ଦୁର୍ବୃତ୍ତ ତାଙ୍କୁ ମାରଣାସ୍ତ୍ରରେ ଆକ୍ରମଣ କରି ହତ୍ୟା କରିଥିବା ପରିବାର ଲୋକେ ଅଭିଯୋଗ କରିଛନ୍ତି ।

ଶୁକ୍ରବାର ବିଳମ୍ବିତ ରାତିରେ ଏଭଳି ଜଘନ୍ୟ ହତ୍ୟାକାଣ୍ଡ ଘଟିଥିବା ବେଳେ ଅପରାଧୀ ମାନଙ୍କ ସହ ମୃତ ସଞ୍ଜୟର ଧସ୍ତାଧସ୍ତି ହୋଇଥିବା ପାରିପାଶ୍ୱିକ ସ୍ଥିତିରୁ ପୁଲିସ ସନ୍ଦେହ କରୁଛି । ଘଟଣା ସ୍ଥଳରେ ଚଳନ୍ତା ପଙ୍ଖା, ମୋବାଇଲ ପଡିଥିବା ଦେଖିବାକୁ ମିଳିଥିବା ବେଳେ ଖଟ ଉପରେ ପ୍ରଚୁର ରକ୍ତସ୍ରାବ ହୋଇଥିବା ଜଣାପଡିଛି । ଅପରାଧୀ ଗୋଷ୍ଠୀ ପେଟକୁ ଛୁରାମାଡ କରିଥିବା ବେଳେ ମୃତ ସଞ୍ଜୟଙ୍କ ଡାହାଣ ହାତ ପାପୁଲି ଓ ଶରୀରର ବିଭିନ୍ନ ସ୍ଥାନରେ କ୍ଷତ ଚିହ୍ନ ରହିଥିବା ଦେଖିବାକୁ ମିଳିଛି ।

ଅପରାଧୀଙ୍କ ମାରଣାସ୍ତ୍ରରେ ସଞ୍ଜୟଙ୍କ ଅନ୍ତବୁଜୁଳା ପଦାକୁ ବାହାରି ଆସିଥିବା ବେଳେ ତାଙ୍କୁ ଘରଭିତରୁ ପଦାକୁ ଟାଣିଆଣି ଘର ବାରଣ୍ଡାରେ ଫୋପାଡି ଘଟଣା ସ୍ଥଳରୁ ଅପରାଧୀ ଗୋଷ୍ଠୀ ଫେରାର ହୋଇଯାଇଥିବା ଜଣାପଡିଛି । ସବୁଠାରୁ ଗୁରୁତ୍ୱପୁର୍ଣ୍ଣ ବିଷୟ ହେଲା ଘଟଣାସ୍ଥଳ ଠାରୁ ପ୍ରାୟ ୫୦ ମିଟର ଦୂରତାରେ ଏକ କ୍ରସର ଫେକ୍ଟ୍ରି ଓ ସଂପୃକ୍ତ ଗ୍ରାମର ବଜାର ଗହଳ ଚହଳ ଥିବା ବେଳେ ନିର୍ମାଣଧିନ କୋଠାଘରେ ସଞ୍ଜୟଙ୍କୁ ପ୍ରାଣନ୍ତକ ଆକ୍ରମଣ କରି ନିର୍ମମ ହତ୍ୟା କରାଯାଇଛି ।

ପ୍ରକାଶ ଯେ, ହିଞ୍ଜିଳିକାଟୁ ବ୍ଳକ ତଥା ବେଲଗାଁ ଥାନା ହନ୍ତୋଷ ଗ୍ରାମର ସଞ୍ଜୟ ସବୁଦିନ ଭଳି ଘରେ ଭୋଜନ କରି ଡି. ପାଟପୁର ଠାରେ ନିର୍ମାଣଧିନ କୋଠାରେ ରାତ୍ରି ବିଶ୍ରାମ କରୁଥିଲେ । ଶୁକ୍ରବାର ରାତି ପ୍ରାୟ୧୧ଟାରେ ଘରୁ ଖାଇପିଇ ଡି. ପାଟପୁରରେ ନିର୍ମାଣଧିନ କୋଠାକୁ ଫେରିଥିଲେ । ଶନିବାର ସକାଳେ ଘରକୁ ନଫେରିବାରୁ ମୃତକଙ୍କ ଭଉଣୀ ଫୋନ ଯୋଗେ ଯୋଗାଯୋଗ କରିଥିଲେ ମଧ୍ୟ କୌଣସି ଉତ୍ତର ମିଳିନଥିଲା । ଅପରାହ୍ନ ପ୍ରାୟ ସାଢେ ୩ଟାରେ ନିର୍ମାଣଧିନ କୋଠାକୁ ଆସି ଘର ବାରଣ୍ଡାରେ ସଞ୍ଜୟଙ୍କ ମୃତଦେହକୁ ଦେଖିଥିଲେ । ଘଟଣା ନେଇ ସଞ୍ଜୟଙ୍କ ଭଉଣୀ ପରିବାର ଓ ପୁଲିସକୁ ଖବର ଦେଇଥିଲେ ।

ଖବର ପାଇ ବେଲଗାଁ ଥାନା ଆଇଆଇସି ସ୍ମିତାଞ୍ଜଳି ପ୍ରଧାନ ଓ ତାଙ୍କ ଟିମ ଘଟଣା ଗସ୍ଥଳରେ ପହଞ୍ଚି ଘଟଣଶର ସରଜମିଦ ତଦନ୍ତ ଆରମ୍ଭ କରିଥିଲେ । ପରେ ଆସିକା ଏସଡିପିଓ ସଞ୍ଜୟ କୁମାର ମହାପାତ୍ର, ହିଞ୍ଜିଳି ଆଇଆଇସି ଶ୍ରୀନିବାସ ସେଠି, ସାଇଣ୍ଟଫିକ୍ ଟିମ୍ ଓ ପୁଲିସ ଫୋର୍ସ ପହଞ୍ଚି ଘଟଣାର ଛାନଭିନ କରିଥିଲେ । ମୃତକଙ୍କ ଭଉଣୀ ବବିତା ନାୟକଙ୍କ ଅଭିଯୋଗ କ୍ରମେ ବେଲଗାଁ ଥାନାରେ ୨୮/୨୪ରେ ଏକ ହତ୍ୟା ମାମଲା ରୁଜୁ ହୋଇଛି । ପୁଲିସ ମୃତଦେହକୁ ଜବତ କରି ବ୍ୟବଛେଦ ସକାଶେ ବ୍ରହ୍ମପୁର ବଡ ଡାକ୍ତରଖାନାକୁ ପଠାଇ ଘଟଣାର ତଦନ୍ତ ଚଳାଇଛି । ଗୃହ ନିର୍ମାଣ ନେଇ ଏଭଳି ବିଭତ୍ସ ହତ୍ୟାକାଣ୍ଡ ଘଟିଥାଇ ପାରେ ବୋଲି ଆଶଙ୍କା ପ୍ରକାଶ ପାଉଥିବା ବେଳେ ପ୍ରେମଜନିତ ସର୍ମ୍ପକକୁ ନେଇ ଏଭଳି ହତ୍ୟାକାଣ୍ଡ ଘଟିଥିବା ସ୍ଥାନୀୟ ଅଞ୍ଚଳରେ ଶୁଣିବାକୁ ମିଳିଛି । ବର୍ତ୍ତମାନ ସୁଦ୍ଧା ହତ୍ୟାକଣ୍ଡର କାରଣ ଅସ୍ୱଷ୍ଟ ରହିଛି । ବ୍ୟବଛେଦ ରିପୋର୍ଟ ଆସିବା ପରେ ହତ୍ୟାକଣ୍ଡର ରହସ୍ୟ ଉନ୍ମୋଚନ ହେବ ବୋଲି ପୁଲିସ କହିଛି ।