୧୫ ମାର୍ଚ୍ଚ,୨୦୨୪ (ଓଡିଶା ତାଜ଼ା ନ୍ୟୁଜ) ଭାପୁର :-> ନୟାଗଡ ଜିଲ୍ଲା ଭାପୁର ବ୍ଲକ ଗଣମାଧ୍ୟମର ପ୍ରତିନିଧି ମାନେ ଆଜି ଠାରୁ କଳାବ୍ୟାଚ୍ ପରିଧାନ କରି ରାଜ୍ୟ ସରକାରଙ୍କ ବିରୁଦ୍ଧରେ ବିକ୍ଷୋଭ ପ୍ରଦର୍ଶନ କରିଛନ୍ତି।ରାଜ୍ୟ ସରକାର ସାମ୍ବାଦିକ ମାନଙ୍କ ନ୍ୟାର୍ଯ୍ୟ ଦାବି ପ୍ରତି ବାରମ୍ବାର ଅଣଦେଖା କରି ଆସୁଛନ୍ତି। ରାଜ୍ୟ ସାମ୍ବାଦିକ ସଂଘ ଗୁଡିକ ପକ୍ଷରୁ ବିଭିନ୍ନ ଦାବି ନେଇ ରାଜ୍ୟ ସରକାରଙ୍କ ଦୃଷ୍ଟି ଆକର୍ଷଣ କରାଯାଇଥିଲେ ହେଁ କେବଳ ପ୍ରତିଶ୍ରୁତି ମିଳିଥିବା ଓ ପରବର୍ତ୍ତୀ ସମୟରେ ପ୍ରତିଶ୍ରୁତି ପାଣିର ଗାର ପାଲଟିଥିବା ଜଣାପଡିଛି ।
ଆସନ୍ତା ସାଧାରଣ ନିର୍ବାଚନକୁ ଦୃଷ୍ଟିରେ ରଖି ରାଜ୍ୟ ସରକାର ପଞ୍ଚାୟତ ପ୍ରତିନିଧିଙ୍କ ଠାରୁ ଆରମ୍ଭ କରି ସମସ୍ତ ବର୍ଗର ଜନସାଧାରଣଙ୍କ ନିମନ୍ତେ ବିଭିନ୍ନ ପ୍ୟାକେଜର ଵ୍ୟଵସ୍ଥା କରିଥିବା ବେଳେ ଗଣମାଧ୍ୟମର ପ୍ରତିନିଧି ମାନଙ୍କୁ ରାଜ୍ୟ ସରକାର ଅଣଦେଖା କରିଛନ୍ତି। ରାଜ୍ୟ ଉତ୍କଳ ସାମ୍ବାଦିକ ସଂଘର ନିଷ୍ପତ୍ତିକ୍ରମେ ଜିଲ୍ଲା, ଵ୍ଲକ ଓ ରାଜ୍ୟସ୍ତରରେ କର୍ତ୍ତବ୍ୟରତ ଗଣମାଧ୍ୟମର ପ୍ରତିନିଧିମାନେ ଗୁରୁବାରଠାରୁ କଳାବ୍ୟାଚ ପରିଧାନ କରି ଅଭିନବ ପ୍ରତିବାଦର ସ୍ବର ଉଠାଇଛନ୍ତି।
ଏହି କ୍ରମରେ ଭାପୁର ପ୍ରେସ କ୍ଲବ ପକ୍ଷରୁ ସ୍ଥାନୀୟ ଡାକ ବଙ୍ଗଳା ପରିସରରେ ଏକ ବୈଠକ ଅନୁଷ୍ଠିତ କରାଯାଇଥିଲା । ଉକ୍ତ ବୈଠକରେ ସାମ୍ୱାଦିକ ମାନଙ୍କ ପ୍ରତି ରାଜ୍ୟ ସରକାରଙ୍କ ବୈମାତୃକ ମନୋଭାବକୁ ଦୃଢ଼ ନିନ୍ଦା କରାଯାଇଥିଲା । ସାମ୍ୱାଦିକ ମାନଙ୍କ ପ୍ରତି ଯଦି ଆଗାମୀ ଦିନରେ ଏତାଦୃଶ ଅଣଦେଖା ଲାଗି ରହେ ତେବେ ସାମ୍ବାଦିକମାନେ ବାଧ୍ୟ ହୋଇ ରାଜ ରାସ୍ତାକୁ ଓହ୍ଲାଇବେ ବୋଲି ସଂକଳ୍ପ ନେଇଥିଲେ ।
ଏହି ଅବସରରେ ଭାପୁର ବ୍ଲକ ଗଣମାଧ୍ୟମର ପ୍ରତିନିଧି ସନାତନ ଷଡ଼ଙ୍ଗୀ, ଜ୍ଞାନ ରଞ୍ଜନ ଷଡ଼ଙ୍ଗୀ, ଶିଶିର ସାହୁ, ରଞ୍ଜନ କୁମାର ମହାପାତ୍ର, ସୁଶାନ୍ତ କୁମାର ପଟ୍ଟନାୟକ, ଜ୍ୟୋତି ରଞ୍ଜନ ମହାରଣା, ବିଭୂତି ମହାପାତ୍ର, କୁଳମଣି ଦାସ, ଶ୍ରୀକାନ୍ତ କୁମାର ରାଉତ, କନକ ଲତା ପ୍ରଧାନ ପ୍ରମୁଖ ସାମ୍ୱାଦିକମାନେ କଳାବ୍ୟାଚ ପିନ୍ଧି ପ୍ରତିବାଦ କରିଥିଲେ।
