ଓଡିଶା ତାଜା ନ୍ୟୁଜ୍ (୨୭ ଜୁଲାଇ ସୋମବାର ) ହିଞ୍ଜିଳିକାଟୂ :- ଦୀର୍ଘ ଦିନ ପରେ ହିଞ୍ଜିଳି ପୁଲିସକୁ ମିଳିଛି ଏକ ବିରାଟ ସଫଳତା । ହିଞ୍ଜିଳି ଥାନାର ବିଭିନ୍ନ ଅଂଚଳରୁ ଲୁଟ ଘଟଣାରେ ସଂପୃକ୍ତ ଥିବା ୫ ଜଣ ଅଭିଯୁକ୍ତଙ୍କ ଗିରଫ କରିବା ସହ ସେମାନଙ୍କ ନିକଟରୁ ୨ଟି ମୋଟର ସାଇକେଲ, ୨ଟି ମୋବାଇଲ ସମେତ ଗୋଟିଏ ଛୁରୀ ଜବତ କରିବାରେ ହିଞ୍ଜିଳି ପୁଲିସ ସକ୍ଷମ ହୋଇଛି । ଗିରଫ ଅଭିଯୁକ୍ତଙ୍କୁ ରବିବାର ବିଳମ୍ବିତ ରାତିରେ ହିଞ୍ଜିଳି ଥାନା ଆଇଆଇସି ଦାସଙ୍କ ତତ୍ୱାବଧାନରେ ଥାନା ଏସଆଇ ବାସୁଦେବ ଭୋଇଙ୍କ ନେତୃତ୍ୱରେ ଏକ ସ୍ୱତନ୍ତ୍ର ଟିମ୍ ଗଠନ କରାଯାଇ ଶେରଗଡ଼, ଦିଗପହଣ୍ଡି, ଧରାକୋଟ ଥାନା ଅଂଚଳରୁ ଗିରଫ କରିବାରେ ସକ୍ଷମ ହୋଇଥିଲା । ଗିରଫ ପରେ ଅଭିଯୁକ୍ତ ମାନେ ସଂପୃକ୍ତ ୩ଟି ଲୁଟ ଘଟଣାରେ ସଂପୃକ୍ତ ଥିବା ନେଇ ପୁଲିସ ନିକଟରେ ସ୍ୱୀକାର କରିଛନ୍ତି ।
ସୋମବାର ଗିରଫ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଛି । କୋର୍ଟରେ ଜାମିନ ନାମଞ୍ଜୁର ହେବାରୁ ସେମାନଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଥିବା ଥାନା ଭାରପ୍ରାପ୍ତ ଅଧିକାରୀ ଅଭିମନ୍ୟୁ ଦାସ କହିଛନ୍ତି । ପ୍ରକାଶ ଯେ, ଗତ ୨୦୧୯ ମସିହା ନଭେମ୍ବର ୨୮ ତାରିଖରେ ଧରାକୋଟ ଥାନା ମୁଣ୍ଡମରାଇ ଗ୍ରାମର ବାଲାଜି ସୁବୁଦ୍ଧି ଓ ତାଙ୍କ ସ୍ତ୍ରୀ ସସ୍ମିତା ସୁବୁଦ୍ଧି ସ୍ଥାନୀୟ ପୌରାଂଚଳ ପଦ୍ମାବତି ନଗର ଜଣେ ସମ୍ପର୍କୀୟଙ୍କ ବିବାହ ଭୋଜି ଖାଇ ଫେରୁଥିବା ସମୟରେ ମାଣିକନଗର ୫ମ ଲାଇନ ନିକଟରେ ଏକ ମୋଟର ସାଇକେଲ ଯୋଗେ ୨ ଦୁବୃର୍ତ ଆସି ମହିଳାଙ୍କ ବେକରୁ ୫ଭରି ଓଜନର ୨ଟି ସୁନାଚେନ ଝାମ୍ପି ନେଇ ଘଟଣା ସ୍ଥଳରୁ ଚମ୍ପଟ ମାରେ ଏକ ମାରିଥିଲେ । ଏ ନେଇ ମହିଳା ଜଣକ ହିଞ୍ଜିଳି ଥାନାରେ ଅଭିଯୋଗ କରିଥିଲେ । ହିଞ୍ଜିଳି ଥାନାରେ ନଂ- ୩୪୪/୧୯ରେ ଏକ ମାମଲା ରୁଜୁ କରି ପୁଲିସ ଘଟଣାର ତଦନ୍ତ ଚଳାଇଥିଲା ।
ସେହପରି ଚଳିତ ଜୁନ ୧୧ତାରିଖ ଅପରାହ୍ନରେ ସ୍ଥାନୀୟ ଥାନା ସାରୁ- ଶାସନ ଆମ୍ବଗାଁ ମଧ୍ୟବର୍ତି କାଳୁଆଘାଇ ନିକଟରେ ୩ଟି ମୋଟର ସାଇକେଲ ଯୋଗେ ୫ ଜଣ ଦୁବୃର୍ତ ଆସି ମାଛ ବେପାରୀ ସୁବାଷ ବେହେରାଙ୍କୁ ମାଡ଼ ମରିବା ସହ ବେକରେ ଛୁରୀ ଲଗାଇ ଜୋର ଜବରଦସ୍ତ ୪ହଜାର ୫ଶହ ଟଙ୍କା ଓ ମୋବାଇଲକୁ ଲୁଟି ନେଇ ଚମ୍ପଟ ମାରିଥିଲେ । ଏ ନେଇ ସୁବାଷଙ୍କ ଅଭିଯୋଗ କ୍ରମେ ହିଞ୍ଜିଳି ଥାନାରେ ନଂ-୧୯୪/୨୦ରେ ଏକ ମାମଲା ରୁଜୁ କରି ପୁଲିସ ଘଟଣାର ତଦନ୍ତ ଚଳାଇଥିଲା । ସେହିପରି ଗତ ଜୁନ ୧୭ ତାରିଖରେ ସ୍ଥାନୀୟ ଥାନା ଠୁରୁବୁରାଇ ଗ୍ରାମ ଉତ୍କଳ ଗ୍ରାମୀଣ ବ୍ୟାଙ୍କରେ ଦୁବୃର୍ତ ମାନେ ବ୍ୟାଙ୍କ କବାଟର ତାଲା ଭାଙ୍ଗି ଲକର ଚାବି ଭାଙ୍ଗି ଲୁଟ କରିବାରେ ବିଫଳ ହୋଇ ଫେରିଥିଲେ । ବ୍ୟାଙ୍କ ଶାଖା ପରିଚାଳକଙ୍କ ଅଭିଯୋଗ କ୍ରମେ ହିଞ୍ଜିଳି ଥାନାରେ ନଂ-୨୦୫/୨୦ରେ ଏକ ମାମଲା ରୁଜୁ କରି ପୁଲିସ ଘଟଣାର ତଦନ୍ତ ଜାରି ରଖିଥିଲା ।
ରବିବାର ରାତିରେ ଥାନା ଆଇଆଇସି ଦାସଙ୍କ ତତ୍ୱାବଧାନରେ ଥାନା ଏସଆଇ ବାସୁଦେବ ଭୋଇଙ୍କ ନେତୃତ୍ୱରେ ଏକ ସ୍ୱତନ୍ତ୍ର ଟିମ୍ ଗଠନ କରାଯାଇ ଶେରଗଡ଼, ଦିଗପହଣ୍ଡି, ଧରାକୋଟ ଥାନା ଅଂଚଳରେ ଚଢାଉ କରାଯାଇଥିଲା । ଚଢାଉ ସମୟରେ ପୁଲିସ ୫ ଜଣଙ୍କୁ ଗିରଫ କରିବାରେ ସକ୍ଷମ ହୋଇଥିଲା । ଗିରଫ ମାନେ ହେଲେ ଶେରଗଡ଼ ଥାନା କୁରୁଳା ଗ୍ରାମର ଧବଳେଶ୍ୱର ଦାସ ଓରଫ ଧୋବା(୨୦), ଢିଙ୍କିଶାଳ ଗ୍ରାମର ଜଗନ୍ନାଥ ସ୍ୱାଇଁ (୨୧), ଧରାକୋଟ ଥାନା ଜି. ଦାମଦୋରପଲ୍ଲୀ ଗ୍ରାମର ଏସ. ବଳିଆ ରେଡ୍ଡି (୨୧), କୁଲାଗଡ଼ ଗ୍ରାମର ଲକ୍ଷ୍ମଣ ପାଢି (୨୧) ଓ ଦିଗପହଣ୍ଡି ଥାନା ରାଜପୁର ଗ୍ରାମର ସିଲୁ ସ୍ୱାଇଁ ଓରଫ ସମିର (୨୪) । ଗିରଫ ଅଭିଯୁକ୍ତଙ୍କ ଠାରୁ ୨ଟି ମୋଟର ସାଇକେଲ ୟାମାହା ଏଫଜେଡ଼(ଓଡ଼ି୦୭ଏବି ୮୭୯୮) ଓ ଟିଭିଏସ ଆପାଚି (ଓଡ଼ି୩୨ଏଫ୍ ୩୩୧୦), ୨ଟି ମୋବାଇଲ ଫୋନ୍ ଓ ଗୋଟିଏ ଛୁରୀ ଜବତ କରିଛି । ( ହିଞ୍ଜିଳିକାଟୁ ରିପୋର୍ଟ –ଶେଷଦେବ ସାହୁ)
