ଓଡିଶା ତାଜା ନ୍ୟୁଜ୍ (୨୫ ଜୁଲାଇ ଶନିବାର) ହିଞ୍ଜିଳିକାଟୁ :- ମହାମାରୀ କରୋନା ଭୁତାଣୁ ସଂକ୍ରମଣରେ ସାରା ଦେଶ କବଳିତ । ରାଜ୍ୟର ସର୍ବାଧିକ କରୋନା ସଂକ୍ରମିତ ଗଞ୍ଜାମ ଜିଲ୍ଲାରେ ଚିହ୍ନଟ ହୋଇଛନ୍ତି । ରାଜ୍ୟ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ସୂଚନା ପ୍ରକାରେ ଶୁକ୍ରବାର ସୁଦ୍ଧା ଜିଲ୍ଲାରେ ୮୧୯୪ ଚିହ୍ନଟ ହୋଇଥିବା ବେଳେ ୭୩ଜଣଙ୍କ ମୃତ୍ୟୁ ଘଟିଛି । ଶୁକ୍ରବାର ସୁଦ୍ଧା ସ୍ଥାନୀୟ ପୌରାଂଚଳରେ ୩୫ଟି ଏକ୍ଟିଭ କେଶ ରହିଥିବା ବେଳେ ବ୍ଳକରେ ୯୨ଟି ଏକ୍ଟିଭ କେଶ ରହିଛି । ସ୍ଥାନୀୟ ପୌରାଂଚଳ ସମେତ ବ୍ଳକର ବିଭିନ୍ନ ଗ୍ରାମାଂଚଳରେ ସଂକ୍ରମିତଙ୍କ ସଂଖ୍ୟା ଦିନକୁ ଦିନ ବୃଦ୍ଧି ପାଇବାରେ ଲାଗିଛି । ଏହାକୁ ପ୍ରତିହିତ କରିବା ଲାଗି ପ୍ରଶାସନ ପକ୍ଷରୁ ବହୁ କଟକଣା ଜାରି କରାଯାଇଥିବା ବେଳେ ପ୍ରତ୍ୟେକ ଗ୍ରାମ ପଂଚାୟତରେ କୋଭିଡ଼ ମନିଟରିଂ କମିଟି ଗଠନ କରାଯିବା ଜନସଚେତନତା କାର୍ଯ୍ୟକ୍ରମ ଜାରି ରହିଛି ।ତଥାପି ସଂକ୍ରମିତଙ୍କ ସଂଖ୍ୟା କମିବାର ନା’ ଧରୁନି । ମୌସୁମୀ ଓ ବର୍ଷଋତୁର ଆଗମନ ଫଳରେ ସ୍ଥାନୀୟ ଅଂଚଳରେ ଥଣ୍ଡା, କାଶ ଓ ଜ୍ୱର ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ପାଇବାରେ ଲାଗିଛି । ସ୍ଥାନୀୟ ଉପଖଣ୍ଡ ଚିକିତ୍ସାଳୟ ଉପରେ ସ୍ଥାନୀୟ ପୌରାଂଚଳ ସମେତ ନିକଟବର୍ତି ପ୍ରାୟ ୪୦ଖଣ୍ଡ ଗ୍ରାମର ଜନସାଧାରଣ ଚିକିତ୍ସା ସକାଶେ ନିର୍ଭର କରିଥାନ୍ତି ।
ଥଣ୍ଡା, କାଶ ଓ ଜ୍ୱରରେ ଆକ୍ରାନ୍ତ ରେଗୀଙ୍କ ସଂଖ୍ୟା ବୃଦ୍ଧି ପାଇବା ସହ କରୋନା ଭୟରେ ବହୁ ରୋଗୀ ଚିକିତ୍ସାଳୟକୁ ଚିକିତ୍ସା ସକାଶେ ଆସିବାକୁ ଭୟ କରୁଥିବାର ଦେଖିବାକୁ ମିଳିଛି । ତଥାପି ଦୈନିକ ୨ଶହରୁ ୨୫୦ ରୋଗୀ ଓପିଡ଼ି ଚିକିତ୍ସା ସକାଶେ ଆସୁଥିବା ଜଣାପଡ଼ିଛି । ସ୍ଥାନୀୟ ଉପଖଣ୍ଡ ଚିକିତ୍ସାଳୟରେ କାର୍ଯ୍ୟରତ ୨ ଡ଼ାକ୍ତରଙ୍କ ସମେତ ୨ଷ୍ଟାପ ନର୍ସ ଓ ୪ ସ୍ୱାସ୍ଥ୍ୟ କର୍ମୀଙ୍କ ପଜିଟିଭ ଚିହ୍ନଟ ପରେ କିଛି କର୍ମଚାରୀ ସ୍ଥାନୀୟ କୋଭିଡ଼-୧୯ ହସପିଟାଲରେ ଚିକିତ୍ସ୍ଖଚ୍ଛ ହେଉଥିବା ବେଳେ କିଛି କର୍ମଚାରୀ ମାନେ ଏବେ ଘରେ ପୃଥକବାସରେ ରହୁଥିବା ଜଣାପଡ଼ିଛି । ଯାହା ଫଳରେ ସ୍ଥାନୀୟ ଉପଖଣ୍ଡ ଚିକିତ୍ସାଳୟରେ ରୋଗୀସେବା ବାଧାପ୍ରାପ୍ତ ହୋଇଛି । ଡ଼ାକ୍ତରଖାନାରେ ବର୍ହିଚିକିତ୍ସାରେ ଅଚଳାବସ୍ଥା ଦେଖାଦେଇଛି । ଅଣକୋଭିଡ଼ ରୋଗୀଙ୍କ ସେବା ବ୍ୟାହାତ ହୋଇଥିବା ବେଳେ ମେଡ଼ିକାଲରେ ଜରୁରୀକାଳୀନ ସେବା ଜାରି ରହିଛି । ହିଞ୍ଜିଳିକାଟୁ ବ୍ଳକ ଅଧିନସ୍ଥ ୨୧ଟି ପଂଚାୟତରେ କରୋନା ପଜିଟିଭଙ୍କ ସଂଖ୍ୟା ପ୍ରାୟ ୩ଶହ ରହିଥିବା ବେଳେ ପୌରାଂଚଳରେ ସଂକ୍ରମିତଙ୍କ ସଂଖ୍ୟା ସେଂଚୁରୀ ନିକଟତର ରହିଛି ।
ପ୍ରତିଦିନ ପୌରାଂଚଳରେ ଆରୋଗ୍ୟ ହାର ବୃଦ୍ଧି ପାଉଥିବା ବେଳେ ଆବଶ୍ୟକ ଟ୍ରାକିଂ ଓ ଟେଷ୍ଟିଂ ଅଭାବରୁ ସଂକ୍ରମିତ ଚିହ୍ନଟ ହୋଇପାରୁନଥିବା ଅଭିଯୋଗ ହୋଇଛି । ସ୍ଥାନୀୟ ଅଂଚଳରେ ଥଣ୍ଡା, କାଶ ଓ ଜ୍ୱର ସମସ୍ୟା ଲାଗି ରହିଥିବା ବେଳେ ସ୍ୱାସ୍ଥ୍ୟ କର୍ମୀ ମାନେ ଘର ଘର ବୁଲି ଔଷଧ ବଂଟନ କରିବା ସକାଶେ ଦାବି ହେଉଛି । ହିଞ୍ଜିଳିକାଟୁ ବ୍ଳକ ଓ ପୌରାଂଚଳକୁ ପାଖ୍ାପାଖି ୧୦ ହଜାର ୫ଶହ ପ୍ରବାସୀ ଓଡ଼ିଆ ଫେରିଥିବାରୁ ପ୍ରଥମେ ସଙ୍ଗରୋଧ କେନ୍ଦ୍ରରୁ ସଂକ୍ରମିତ ଚିହ୍ନଟ ହେଉଥିବା ବେଳେ ବର୍ତମାନ ଗୋଷ୍ଠୀ ସଂକ୍ରମଣ ଦେଖାଦେଇଛି । ତଥାପି ପ୍ରଶାସନ ପକ୍ଷରୁ ଗୋଷ୍ଠୀ ସଂକ୍ରମଣ ହେଉନଥିବା ନେଇ ସ୍ପଷ୍ଟ କରାଯାଇଛି । ଏ ଦିଗରେ ବିଭାଗୀୟ ଉଚ୍ଚ କର୍ତୁପକ୍ଷ ଦୃଷ୍ଟି ପ୍ରଦାନ କରି ଆବଶ୍ୟକ ପଦକ୍ଷେପ ଗ୍ରହଣ କରିବାକୁ ଅଂଚଳବାସୀ ଦାବି ଜଣାଇଛନ୍ତି । (ହିଞ୍ଜିଳିକାଟୁ ରିପୋର୍ଟ / ଶେଷଦେବ ସାହୁ)
