‘ବ୍ୟକ୍ତି ଓ ସମାଜର ଦୁସ୍ଥିତି ସମୟରେ ସାହିତ୍ୟ ଆଶ୍ବାସନାର ମାର୍ଗଦର୍ଶନ ଦେଇଥାଏ’ ଯାଜପୁର ଜିଲା ଲେଖକ ସମ୍ମଳନର ବାର୍ଷିକୋତ୍ସବ; ୬ପ୍ରତିଭାଙ୍କୁ ସମ୍ବର୍ଦ୍ଧନା

୧୧ ଫେବୃଆରୀ ୨୦୨୪ (ଓଡିଶା ତାଜା ନିୟୁଜ) ଯାଜପୁର :- ବ୍ୟକ୍ତି ଓ ସମାଜର ଦୁସ୍ଥିତି ତଥା ବିପଦ ସମୟରେ ସାହିତ୍ୟ ଆଶା ଆଶ୍ବାସନାର ମାର୍ଗଦର୍ଶନ ଦେଇଥାଏ ବୋଲି ଆଜି ଅନୁଷ୍ଠିତ ଜିଲା ଲେଖକ ସମ୍ମଳନର ବାର୍ଷିକ ଉତ୍ସବରେ ଅତିଥିମାନେ ମତବ୍ୟକ୍ତ କରିଥିଲେ । ମଧ୍ୟାହ୍ନରେ ସମ୍ମୋଳନର ୩୦ ତମ ବାର୍ଷିକୋତ୍ସବ ଓ ସମ୍ବର୍ଦ୍ଧନା ସଭା କୋରାଇ ବ୍ଲକ ଅନ୍ତର୍ଗତ ଧନେଶ୍ବର ପଂଚାୟତର ପଣ୍ଡୁଳା (ମୃତ୍ୟୁଞ୍ଜୟପୁର) ସ୍ଥିତ ହିଙ୍ଗୁଳା କଲ୍ୟାଣ ମଣ୍ଡପ ଠାରେ ଅନୁଷ୍ଠିତ ହୋଇଥିଲା । ସମ୍ମଳନର ସଭାପତି ଡ.ରୁଦ୍ରନାରାୟଣ ପୃଷ୍ଟିଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ସଭାରେ ମୁଖ୍ୟଅତିଥିଭାବେ ବିଶିଷ୍ଟ ସାହିତ୍ୟିକ ପ୍ରଫେସର ଡକ୍ଟର ବାବଜୀଚରଣ ପଟ୍ଟନାୟକ ଯୋଗଦେଇ ଯାଜପୁର ଜିଲାର ସାହିତ୍ୟିକମାନଙ୍କ ସୃଷ୍ଟି କେବଳ ଏ ଜିଲାରେ ସୀମିତ ନୁହେଁ; ରାଜ୍ୟ ତଥା ଜାତୀୟ ସ୍ତରରେ ସ୍ବୀକୃତି ଆଣିଛି ବୋଲି ମତବ୍ୟକ୍ତ କରିଥିଲେ । ମୁଖ୍ୟବକ୍ତଭାବେ କଟକ ସ୍ଥିତ ହରେକୃଷ୍ଣ ସଂସ୍କୃତ ମହାବିଦ୍ୟାଳୟର ଅଧ୍ୟାପକ ଲକ୍ଷ୍ମୀନାରାୟଣ ଦାଶ ଯୋଗଦେଇ ଓଡ଼ିଆ ଭାଷା ସାହିତ୍ୟକୁ ସମୃଦ୍ଧ କରିବା ପାଇଁ ଲେଖକମାନେ ସର୍ବଦା ଲେଖନୀ ଚାଳନା ଜାରିରଖୁବା ଉଚିତ ବୋଲି କହିଥିଲେ । ସମ୍ମାନିତ ଅତିଥିଭାବେ ବରିଷ୍ଠ ଗୀତିକବି ନନ୍ଦକିଶୋର ସିଂହ, କେନ୍ଦ୍ର ସାହିତ୍ୟ ଏକାଡେମୀ ପୁରସ୍କାର ପ୍ରାପ୍ତ ସାହିତ୍ୟିକ ଡକ୍ଟର ସୂର୍ଯ୍ୟମଣି ଖୁଣ୍ଟିଆ, ଗୋକର୍ଣ୍ଣିକାର ସଂପାଦକ ରମାକାନ୍ତ ଜେନା ପ୍ରମୁଖ ଯୋଗଦେଇ ଜିଲାର ଲେଖକମାନଙ୍କ ନିମନ୍ତେ ଏକ ପରିଚୟ ପୁସ୍ତିକା ପ୍ରକାଶନ ନିମନ୍ତେ ମତବ୍ୟକ୍ତ କରିଥିଲେ । ସମ୍ମେଳନର ଉପସଭାପତି ଦୟାନିଧୂ ନାୟକ ଅତିଥୁ ପରିଚୟ ଓ ସ୍ବାଗତ ଭାଷଣ ଦେଇଥିଲା ବେଳେ ସଂପାଦକ ପ୍ରାଧ୍ୟାପକ ଅକ୍ଷୟ କୁମାର ମହାନ୍ତି ବିବରଣି ପ୍ରଦାନ କରିଥିଲେ । ଏହି ଅବସରରେ ଚଳିତବର୍ଷ ଲାଗି ସୁ-ସାହିତ୍ୟିକ ଡକ୍ଟର ରବୀନ୍ଦ୍ର କୁମାର ବିହାରୀ, ‘ଚାହାଣୀ’ର ସଂପାଦକ ଡକ୍ଟର ଚନ୍ଦ୍ରକାନ୍ତ ମହାନ୍ତି, ଶିକ୍ଷାବିତ ପଣ୍ଡିତ ଅକ୍ଷୟକୁମାର ଦାଶ, ଶିଶୁ ସାହିତ୍ୟିକ ଅଧ୍ୟାପକ ମଳୟକୁମାର ମଲ୍ଲିକ, ବ୍ୟଙ୍ଗକବି ବାଇଧର ମାଝୀ ଓ ସାହିତ୍ୟିକା କମଳିନୀ ପାଗଡ ପ୍ରମୁଖ ୬ଜଣ ପ୍ରତିଭାଧରଙ୍କୁ ପୁଷ୍ପଗୁଚ୍ଛ, ଅଙ୍ଗବସ୍ତ୍ର ଓ ଉପଢୌକନ ଦିଆଯାଇ ସମ୍ବର୍ଦ୍ଧିତ କରାଯାଇଥିଲା । ପ୍ରାରମ୍ଭରେ ଦିବଂଗତ ସାହିତ୍ୟିକ ପଣ୍ଡିତ ଯୁଗଳ କିଶୋର ମିଶ୍ର ଓ ସାତକୋଡି ହୋତାଙ୍କ ବିୟୋଗ ଜନିତ ୧ମିନିଟ ନିରବ ପ୍ରାର୍ଥନା କରାଯାଇଥିଲା । ସତ୍ତେଳନର ବାର୍ଷିକ ସ୍ମରଣିକା ଅତିଥିଙ୍କ ଦ୍ବାରା ଉନ୍ମୋଚିତ ହୋଇଥିଲା ବେଳେ ଶେଷରେ କାର୍ଯ୍ୟକାରୀ କମିଟି ସଦସ୍ୟ ପ୍ରାଧ୍ୟାପକ ଶିବରଚର ମାଝୀ ଧନ୍ୟବାଦ ଅର୍ପଣ କରିଥିଲେ । ପୂର୍ବାହ୍ନରେ ପ୍ରଥମ ଅଧବେଶନ କବିତା ପାଠୋତ୍ସବ ଡ଼. ନୃସିଂହ ଚରଣ ବେହେରାଙ୍କ ଅଧ୍ୟକ୍ଷତାରେ ହୋଇଥିଲା ବେଳେ ମୁଖ୍ୟଅତିଥ୍ କବି ଡ଼ ଗୌତମ ଜେନା ଯୋଗଦେଇଥିଲେ। କବି ଅଶୋକ କୁମାର ପତି ଓ ଜିତେନ୍ଦ୍ର ବେହେରାଙ୍କ ସଂଯୋଜନାରେ ମାଙ୍ଗଳିକା ଦାସ, ନାରାୟଣ ମହାଳିକ, ନବଘନ ସ୍ୱାଇଁ, ବୃନ୍ଦାବନ ସାହୁ,ମଧୁସୂଦନ ମହାପାତ୍ର, ସୁବ୍ରତ ଦାଶ, ପ୍ରଭାତ ମଲ୍ଲିକ, ପ୍ରଶାନ୍ତ ସ୍ୱାଇଁ, କାର୍ତିକଚନ୍ଦ୍ର ଦ୍ବିବେଦୀ, ରାମଚନ୍ଦ୍ର ଦାସ ପ୍ରମୁଖ ଜିଲାର ଶତାଧୂକ କବି ସ୍ୱରଚିତ କବିତା ପାଠ କରିଥିଲେ । କାର୍ଯ୍ୟକ୍ରମକୁ ପରିଚାଳନାରେ ଅକ୍ଷୟକୁମାର ବାରିକ, ମମତାଜ ଅଲ୍ଲୀ, ବ୍ରଜେଶ୍ଵରୀ ସିଂ, ଭୁବନମୋହନ ମହାନ୍ତି, ପ୍ରଭାତ ସିହ୍ନା, ପ୍ରମୋଦ ମହାନ୍ତି, ପ୍ରତାପରୁଦ୍ର ପଣ୍ଡା, ନିର୍ମଳଚନ୍ଦ୍ର ରାଉତ, ଯୋଗେନ୍ଦ୍ର ନାଥ ସାହୁ, ନୀଳମଣି ଓଝା ଓ ସ୍ଥାନୀୟ ସରପଂଚ ଶ୍ୟାମସୁନ୍ଦର ମାଝୀଙ୍କ ସମେତ ସେମ୍ମଳନର ସମସ୍ତ କର୍ମକର୍ତା ଓ ସଦସ୍ୟମାନେ ସହଯୋଗ କରିଥିଲେ।