ଖରିଡା ବାଲି ଶଯ୍ୟାରୁ : ବେଧଡକ ଚୋରା ବାଲି ଚାଲାଣ – ୪ଟ୍ରାକ୍ଟର ଜବତ

୨୦ ଜାନୁଆରୀ,୨୦୨୪ (ଓଡ଼ିଶା ତାଜା ନ୍ୟୁଜ୍ ) ହିଞ୍ଜିଳିକାଟୁ :->  ହିଞ୍ଜିଳିକାଟୁ ତହସିଲ ପରିମିତ ଅଞ୍ଚଳରେ ଏବେ ବାଲି ମାଫିଆଙ୍କ ରାଜୁତି ଚାଲିଛି। ଗତ ଦୀର୍ଘ ଦିନ ଧରି ହିଞ୍ଜିଳି ଥାନା ଅନ୍ତର୍ଗତ ଖରିଡା ଗ୍ରାମ ନିକଟସ୍ଥ ବାଲି ଶଯ୍ୟାରୁ ବେଧଡକ ଭାବେ ବାଲି ଚୋରା ଚାଲାଣ ଏକ ନିୟମିତ ପ୍ରକ୍ରିୟା ପାଲଟିଛି। ବିଭିନ୍ନ ଛକ ତଥା ଗୁରୁତ୍ୱପୂର୍ଣ୍ଣ ସ୍ଥାନ ଗୁଡିକରେ ସତର୍କ ସୂଚନା ହାସଲ କରିବା ପାଇଁ ଗୁପ୍ତଚରଙ୍କ ସହାୟତାରେ ଏଭଳି ବେଆଇନ ଚୋରା ଚାଲାଣ ଏବେ ମୁଣ୍ଡ ଟେକିଛି। ଫଳରେ ସୁନସାନ୍ ରାତିରୁ ଆରମ୍ଭ ହୁଏ ବାଲି ଚୋରା ଚାଲାଣର ନିୟମିତ ପ୍ରକ୍ରିୟା।

ହିଞ୍ଜିଳିକାଟୁ ସହରର ଗଳି କନ୍ଦି ଠାରୁ ଗ୍ରାମାଞ୍ଚଳରେ ଛାଇ ହୋଇଯାଏ ଚୋରା ବାଲିର ପାହାଡ଼। ରାତିରେ ମନମୁତାବକ ଚାଲାଣ କରି କୁଢ଼ କୁଢ଼ ମହଜୁଦ ଥିବା ଚୋରା ବାଲି ଟ୍ରାକ୍ଟର ପିଛା ଚଢ଼ା ଦରରେ ବିକ୍ରୀ ହୁଏ । ଏଭଳି ବେଧଡକ ଚୋରା ବାଲି ଚାଲାଣ ଉପରେ ଆଖି ଦୃଶିଆ ଚଢାଉ ନ ହେବା କାରଣରୁ ମାଫିଆଙ୍କ ପ୍ରତିପତ୍ତି ବୃଦ୍ଧି ପାଇଛି। ସରକାରଙ୍କ ରାଜସ୍ବ କ୍ଷତି ବିପୁଳ ପରିମାଣରେ ହ୍ରାସ ପାଉଥିବା ବେଳେ ମାଫିଆଙ୍କ ବିତ୍ତିୟ ପରିମାଣ ଦୃତ ଗତିରେ ବୃଦ୍ଧି ପାଇଛି। ଗତ କିଛି ମାସ ଧରି ହିଞ୍ଜିଳି ଥାନା ଅଞ୍ଚଳରେ ବିଳମ୍ବିତ ରାତିରୁ ଭୋର୍ ଯାଏଁ ଶହ ଶହ ସଂଖ୍ୟକ ଟ୍ରାକ୍ଟର ଚୋରା ବାଲି ଚାଲାଣରେ ନିୟୋଜିତ ହେଉଥିବା ଜଣା ପଡ଼ିଛି।

ଦୀର୍ଘ ଦିନ ଧରି ନିର୍ଭୟ ତଥା ଅତି ସୁରକ୍ଷା ବଳୟ ମଧ୍ୟରେ ଖରିଡ଼ା କୁରେଇସୁଣୀ ଦେବସ୍ଥାନର ଉଭୟ ପାର୍ଶ୍ଵରେ ଥିବା ଚୋରା ରାସ୍ତାରେ ଅଧିକ ମାତ୍ରାରେ ବାଲି ଚୋରା ଚାଲାଣ ନିୟମିତ ପ୍ରକ୍ରିୟା ପାଲଟିଛି। ମଙ୍ଗଳବାର ବିଳମ୍ବିତ ରାତ୍ର ସମୟରେ ହିଞ୍ଜିଳି ପୁଲିସ ପକ୍ଷରୁ ପାଟ୍ରୋଲିଂ କରାଯାଉଥିବା ବେଳେ ପୋଲିସ ଟିମ୍ ଚୋରା ବାଲି ଚାଲାଣ ହବ୍ ଉପରେ ଅତର୍କିତ ଚଢ଼ାଉ କରି ୪ ବାଲି ବୋଝେଇ ଟ୍ରାକ୍ଟରକୁ ଜବତ କରି ଥାନାରେ ଅଟକ ରଖିଛି।

ଏନେଇ ହିଞ୍ଜିଳି ଥାନାରେ କେସ ନଂ – ୫୧/୨୪ରେ ଏକ ମାମଲା ରୁଜୁ ହୋଇଥିବା ଜଣାପଡିଛି। ଚଢ଼ାଉରେ ଏଏସ୍ଆଇ ଉପେନ୍ଦ୍ର କାର୍ସ୍କା, ହାବିଲଦାର ପ୍ରମୋଦ କୁମାର ଗନ୍ତାୟତ, ସରୋଜ ରଣସିଂହ, ଜିତେନ୍ଦ୍ର କୁମାର ଗୌଡ଼, ଦଣ୍ଡପାଣି ମଲ୍ଲିକ ପ୍ରମୁଖ ଚଢ଼ାଉରେ ଅଂଶ ଗ୍ରହଣ କରିଥିଲେ। ସ୍ଥାନୀୟ ଅଞ୍ଚଳର କିଛି ଆତ୍ମଘୋଷିତ ନେତା ଓ କର୍ମୀ,ସହଯୋଗୀ ଏପରିକି କିଛି ଜନ ପ୍ରତିନିଧିଙ୍କ ସ୍ଵାମୀ ଖରିଡ଼ା ବାଲି ଚୋରା ଚାଲାଣରେ ଲିପ୍ତ ଥିବା ଅଭିଯୋଗ ହୋଇଛି। ପ୍ରଶାସନ ଏ ଦିଗରେ ତୁରନ୍ତ ଆବଶ୍ୟକ ପଦକ୍ଷେପ ନେବା ପାଇଁ ବିଭିନ୍ନ ମହଲରେ ଦାବି ହୋଇଛି।