ଓଡିଶା ତାଜା ନ୍ୟୁଜ୍ (୨୦ ଜୁଲାଇ ସୋମବାର) ହିଞ୍ଜିଳିକାଟୁ :- କରୋନା ମହାମାରୀର ମୁକାବିଲା ପାଇଁ ସରକାରଙ୍କ ପକ୍ଷରୁ ଗତ ୪ ମାସ ଧରି ଲକଡ଼ାଉନ, ସଟଡ଼ାଉନ ଭଳି କଟକଣା ଜରି କରାଯାଇଛି । ଏହି କଟକଣା ଭିତରେ ବହୁ ଲୋକ ନିଜ ଜୀବିକା ହରାଇବାକୁ ବସିଲେଣି । କହିବାକୁ ଗଲେ ସହରାଂଚଳରେ ବସବାସ କରୁଥିବା ଠେଲାଗାଡ଼ିରେ ବ୍ୟବସାୟୀ କରି ପରିବାର ପ୍ରତିପୋଷଣ କରୁଥିବା ବହୁ ବ୍ୟବସାୟୀ ନିଜ ନିଜ ଜୀବିକା ହରାଇ ଜୀବନ ବଂଚାଇବା ପାଇଁ ସଂଗ୍ରାମ ଚଳାଇଛନ୍ତି । ରାଜ୍ୟ ସରକାରଙ୍କ ପ୍ରଥମ ଥର ଲକଡ଼ାଉନ ଘୋଷଣା ପରେ ଠେଲାଗାଡ଼ି ବ୍ୟବସାୟୀଙ୍କୁ ୩ ହଜାର ଟଙ୍କା ଲେଖାଏଁ ଆର୍ଥୀକ ସହାୟତା ପ୍ରଦାନ କରିଥିଲେ । ଯାହାକି ଗୋଟିଏ ପରିବାର ମାସକ ପାଇଁ ପରିବାର ଚଳାଇବା କଷ୍ଟକର ବ୍ୟାପାର । ଗଞ୍ଜାମ ଜିଲ୍ଲାର ୨ୟ ବୃହତମ ସହର ଭାବେ ପରିଗଣିତ ହିଞ୍ଜିଳିକାଟୁ ପୌରାଂଚଳରେ ଠେଲାଗାଡ଼ି ଓ ଫୁଟପାଥ୍ରେ ଶତାଧିକ କ୍ଷୁଦ୍ର ଓ ଗରିବ ବ୍ୟବସାୟୀ ବେପାର କରୁଥିବା ବେଳେ ବହୁ ବ୍ୟବସାୟୀଙ୍କୁ ସରକାରଙ୍କ ପକ୍ଷରୁ ଆର୍ଥୀକ ସହାୟତା ପ୍ରଦାନ କରାଯାଇନଥିବା ଅଭିଯୋଗ ହୋଇଛି ।
ଗତ ୪ ମାସ ହେଲା ଅଭାବ ଅନଟନରେ ନିଜ ନିଜ ପରିବାର ଚଲାଉଥିବା ବେଳେ ଏହି ଠେଲାଗାଡ଼ିରେ ଫାଷ୍ଟଫୁଡ଼ ଓ ଚଟାପଟି ଖାଦ୍ୟ ବିକ୍ରି କରୁଥିବା ସମସ୍ତ ବେପାରୀଙ୍କ ବେପାର ସମ୍ପୁର୍ଣ୍ଣ ବନ୍ଦ ରହିଛି । ପୂର୍ବରୁ ବେପାର ବଣିଜ କରି ଯାହା କିଛି ସଂଚୟୂଳ କରି ରଖିଥିଲେ ଗତ ୪ ମାସ ମଧ୍ୟରେ ସବୁକିଛି ସରି ଯିବା ପରେ ଧାର ଉଧାର କରି କିଛି ଦିନ ପରିବାର ପ୍ରତିପୋଷଣ କରି ଆସୁଥିଲେ । ବର୍ତମାନ ପରିସ୍ଥିତିରେ କେହି ମଧ୍ୟ ହାତ ଉଧାର ଦେବାକୁ ପ୍ରସ୍ତୁତ ନଥିବା ବେଳେ ଓଳିଏ ଖାଇ ଓଳିଏ ଊପବାସରେ ରହିବା ଭଳି ପରିସ୍ଥିତି ଦେଖାଦେଇଛି । ଏଭଳି ପରୀସ୍ଥିତିରେ ଠେଲାଗାଡ଼ିରେ ବ୍ୟବସାୟ କରି ପରିବାର ପ୍ରତିପୋଷଣ କରୁଥିବା ବହୁ କ୍ଷୁଦ୍ର ଗରିବ ବେପାରୀ ଦୁର୍ଦ୍ଦଶାର ସମ୍ମୁଖୀନ ହୋଇଛନ୍ତି । ଜୀବିକା ହରାଇ ଜୀବନ ବଂଚାଇବାର ରାହା ଖୋଜୁଛନ୍ତି । ଏ ଦିଗରେ ରାଜ୍ୟ ସରକାର ଠେଲାଗାଡ଼ାରେ ବ୍ୟବସାୟ କରି ଆସୁଥିବା ବ୍ୟବସାୟୀଙ୍କ ସମସ୍ୟାକୁ ହୃଦୟଙ୍ଗମ କରି ସାହାର୍ଯ୍ୟର ହାତ ବଢାଇବାକୁ ସ୍ଥାନୀୟ ଅଂଚଳର ବହୁ ଠେଲାଗାଡ଼ି ବ୍ୟବସାୟୀ ନିବେଦନ କରିଛନ୍ତି । (ହିଞ୍ଜିଳିକାଟୁ/ଋିପୋର୍ଟ –ଶେଷଦେବ ସାହୁ)
