ଓଡିଶା ତାଜା ନ୍ୟୁଜ୍ (୧୪ ଜୁଲାଇ ୨୦୨୦ ମଙ୍ଗଳବାର) ହିଞ୍ଜିଳିକାଟୁ :- ସାରା ରାଜ୍ୟରେ ମହାମାରୀ କରୋନା ତାର ଅସଲ ସ୍ୱରୂପ ଧାରଣ କରିଛି । ଅନ୍ୟାନ୍ୟ ଜିଲ୍ଲା ଅପେକ୍ଷା ଜନବହୁଳ ଗଞ୍ଜାମ ଜିଲ୍ଲାର ସ୍ଥିତି ଅସମ୍ଭାଳ ଆଡକୁ ଗତି କରୁଛି । ଜିଲ୍ଲାରେ କରୋନା ସଂକ୍ରମଣର ଗତି ପ୍ରଖର ହୋଇ ସାଧାରଣ ଲୋକଙ୍କ ଧନଜୀବନ ଅସ୍ତବ୍ୟସ୍ତ କରିସାରିଲାଣି । କରୋନାରେ ଆକ୍ରାନ୍ତଙ୍କ ମଧ୍ୟରେ କିଛି ସଂକ୍ରମିତଙ୍କ ମୁଣ୍ଡ ଗଡ଼ିଲାଣି।ସରକାରୀ ସୂଚନା ଅନୁସାରେ ବର୍ତ୍ତମାନ ସୁଦ୍ଧା ରାଜ୍ୟରେ ୭୬ବ୍ୟକ୍ତିଙ୍କ ମୃତ୍ୟୁ ଘଟିଛି।ସେଥି ମଧ୍ୟରୁ କେବଳ ଗଞ୍ଜାମ ଜିଲ୍ଲାରେ ୪୪ ଜଣଙ୍କ ପ୍ରାଣ ହରାଇଥିବା ଜଣାପଡିଛି । ଏଭଳି ସଂକଟମୟ ପରିସ୍ଥିତିର ମୁକାବିଲା ପାଇଁ ପ୍ରଶାସନ ପକ୍ଷରୁ ତୁହାକୁ ତୁହା ବୈଠକ ଅନୁଷ୍ଠିତ ହୋଇ ସମୀକ୍ଷା କରାଯାଇଛି । ପରିସ୍ଥିତି ଉପରେ ନିୟନ୍ତ୍ରଣ କରିବା ପାଇଁ ରଣନୀତି ପ୍ରସ୍ତୁତ କରିବା ସହ ସଂକ୍ରମଣ ରୋକିବା ଦିଗରେ ତ୍ୱରିତ ପଦକ୍ଷେପ ଗ୍ରହଣ କରାଯାଇଛି ।
ଗଞ୍ଜାମ ଜିଲ୍ଲାର ସ୍ଥିତି ଉଦବେଗ ଜନକ ରହିଥିବା ବେଳେ ଜିଲ୍ଲାପାଳ ଘନ ଘନ ଗସ୍ତ କରି ସ୍ଥିତି ଅନୁଧ୍ୟାନ କରିବା ସହ ଆବଶ୍ୟକ ପଦକ୍ଷେପ ଗ୍ରହଣ କରିଛନ୍ତି । ବିଶେଷ କରି ଗ୍ରାମାଞ୍ଚଳ ଗୁଡିକରେ ସଂକ୍ରମଣର ଆଶଙ୍କା ଅଧିକ ରହୁଥିବା ଜଣାପଡିଛି । ଏହି ପରିପ୍ରେକ୍ଷୀରେ ଜିଲ୍ଲା ପ୍ରଶାସନ ଠାରୁ ବ୍ଲକ ପ୍ରଶାସନ ପର୍ଯ୍ୟନ୍ତ କୋଭିଡ ପରିଚାଳନା ପାଇଁ ତତ୍ପର ଓ ପ୍ରଚେଷ୍ଟା ଚାଲିଛି । ସ୍ଥାନୀୟ ହିଞ୍ଜିଳିବ୍ଲକ ଓ ପୋୖରାଞ୍ଚକରେ କରୋନାର ପ୍ରକୋପ ବୃଦ୍ଧି ପାଇଛି।ଦିନକୁ ଦିନ ନୁଆଁ ନୁଆଁ ଆକ୍ରାନ୍ତ ଚିହ୍ନଟ ହେବା ସହ ସେମାନଙ୍କୁ ବିଭିନ୍ନ ହସ୍ପିଟାଲରେ ଭର୍ତ୍ତି କରାଯାଇଛି । ସ୍ୱାସ୍ଥ୍ୟ କର୍ମୀଙ୍କ ଦ୍ୱାରା ଘରକୁ ଘର ବୁଲି ଥର୍ମାଲ ସ୍କ୍ରିନିଙ୍ଗ ଜାରୀ ରହିଛି । ପ୍ରଶାସନ ପକ୍ଷରୁ ପ୍ରତି ପଞ୍ଚାୟତରେ କୋଭିଡ କେୟାର ହୋମ ପ୍ରସ୍ତୁତ କରାଯାଇ ପରିଚାଳନା କମିଟି ଗଠନ କରାଯାଇଛି । ଏଭଳି ବହୁ ଉଦ୍ୟମ ଆରମ୍ଭ କରାଯାଇ ଥିଲେ ମଧ୍ୟ ସେଭଳି କିଛି ପ୍ରଭାବ ପଡି ନ ଥିବା ଜଣାପଡିଛି । ଗ୍ରାମାଞ୍ଚଳରେ କରୋନା ମୁକାବିଲା ପାଇଁ କୋଭିଡ ମନିଟରିଂ କମିଟି ମୁଖ୍ୟତଃ ଗ୍ରାମ ଦୋକାନ ଛକ ରେ ଗହଳି, ,ପୋଖରୀ ଓ ଜଳାଶୟରେ ଗାଧୋଇବା ଏବଂ ତାସ ,କ୍ରିକେଟ, ଭଳିବଲ ଖେଳ,ଭୋଜି ଭାତ ଆୟୋଜନ ଆଦି ବନ୍ଦ କରିବାକୁ ସରପଞ୍ଚ ମାନଙ୍କୁ କୁହାଯାଇଛି ।
କେଉଁ ସ୍ଥାନରେ କିଛି ଅସୁବିଧା ହେଲେ ପୁଲିସର ସହାୟତା ନେବାକୁ ଜିଲ୍ଲାପାଳ କହିଛନ୍ତି । ହେଲେ ଏହି ନିର୍ଦ୍ଦେଶକୁ ମାନିବାକୁ ପ୍ରସ୍ତୁତ ନାହାଁନ୍ତି ଗାଁ ର ବିଶୃଙ୍ଖଳିତ ଯୁବଗୋଷ୍ଠୀ । ପ୍ରଶାସନ ପକ୍ଷରୁ ବାରଣ କରାଯାଇଥିବା ଏସବୁ ନିର୍ଦ୍ଦେଶନାମା ପ୍ରତି ସେମାନଙ୍କ ଖାତିର ନାହିଁ । କାଳେ କେତେବେଳେ ପ୍ରଶାସନ ପକ୍ଷରୁ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ସେଭଳି ଆଶଙ୍କାରେ ଏବେ କରୋନା ମୁକାବିଲା ପାଇଁ ମୁଖ୍ୟ ପ୍ରବେଶ ପଥରେ ବ୍ୟାରିକେଡ କରିବା ସେମାନଙ୍କ ଯୋଜନା ରହିଛି । ପରେ ଖୋଲା ଘର, ମଣ୍ଡପ, ମନ୍ଦିର ପରିସରରେ ଏସବୁ କାର୍ଯ୍ୟ କଳାପ ଚାଲିଲେ ପ୍ରଶାସନର ନଜର ହଟିଯିବ ବୋଲି ସେମାନେ ମସୁଧା କରୁଥିବା ସୂଚନା ମିଳିଛି । ଏହି ଉଦ୍ଧେଶ୍ୟରେ କିଛି ଅମାନିଆ ଯୁବକ ମନସ୍ଥ କରି କୁଆଡେ ସ୍ଥାନୀୟ ପ୍ରଶାସନିକ ଅଧିକାରୀଙ୍କ ନାଁ ନେଉଥିବା ଶୁଣିବାକୁ ମିଳୁଛି। ଏଥିପ୍ରତି ଦୃଷ୍ଟି ଦେବାକୁ ସାଧାରଣରେ ମତ ପ୍ରକାଶ ପାଇଛି । (ରିପୋର୍ଟ – ଲଳିତ ମୋହନ ପଲାଇ)
