ଆମ ରଣପୁର ଆମ ଐତିହ୍ୟ

୧ ଜୁଲାଇ ,୨୦୨୩  ( ଓଡ଼ିଶା ତାଜା ନ୍ୟୁଜ୍ ) ରଣପୁର :- ହେରା ପଞ୍ଚମୀ ରେ ମାଆ ଲକ୍ଷ୍ମୀ ଠାକୁରାଣୀ ପ୍ରଭୁଙ୍କୁ ଦର୍ଶନ କରିବା ପାଇଁ ଗୁଣ୍ଡିଚା ମାଉସୀ ଙ୍କ ମନ୍ଦିର କୁ ଯାଇଥିଲେ । ଫେରିବା ବେଳକୁ ରାଗ ତମ ତମ ହୋଇ ନନ୍ଦିଘୋଷ ରଥର ସାମାନ୍ୟ ଭଙ୍ଗା ରୁଜା କରି ଫେରିଲେ । ପ୍ରଭୁ ପ୍ରତିଶ୍ରୁତି ବଦ୍ଧ ଯେ ବାହୁଡ଼ା ଦଶମୀରେ ଫେରିବେ । ଅଭିମାନିନୀ ମାଆ ଲକ୍ଷ୍ମୀ ଫେରି ଆସି ଛନ୍ତି । ସ୍ଵାମୀ ସ୍ତ୍ରୀ ମଧ୍ୟରେ ଝଗଡା । ସତେ ଯେପରି ଆମରି ପରି, ଆମ ମଣିଷ ଙ୍କ ଭଳି । ସେ ଝଗଡା ପୁଣି ବେଶୀ ଦିନ ରହେ ନାହିଁ  ।  ଆମରି ଦେବତା, ଆମରି ଦେବୀ, ତାଙ୍କଠୁ ତ ଆମେ ସବୁ ଶିଖିଛୁ । ଏଇ ଦେଖୁ ନାହାଁନ୍ତି ଆମ ଦେବତା ଓ ଦେବୀ ଙ୍କ ମଧ୍ୟରେ ମତଭେଦ ଉପୁଜି ଆମକୁ ବଡ ଖୋରାକ ଯୋଗାଇ ଦେଇ ଅଛି । ଆଜି କଳି କାଲିକି ନ ଥିବ । ବୋଧହୁଏ ଆମେ ଓଡ଼ିଆ ମାନେ ପଣ୍ଡିତ ଗୋପବନ୍ଧୁ ଙ୍କ ଦର୍ଶନ ରେ ମାନି ନେଇଛୁ, ଉତ୍କଳେ ନେତାଙ୍କ ନାହିଁ ପ୍ରୟୋଜନ, ଉତ୍କଳର ନେତା ସ୍ଵୟଂ ନାରାୟଣ । ଆମ ରଣପୁର ରଥଯାତ୍ରା ର ଇତିହାସ ଅତି ପ୍ରାଚୀନ । ରାଜା ଉଦ୍ଧବ ନରେନ୍ଦ୍ର ଙ୍କ ପୁଣ୍ୟ କୀର୍ତ୍ତି । ରାଜା ନାହାଁନ୍ତି, କିନ୍ତୁ ଶ୍ରୀ ଜଗନ୍ନାଥ ମନ୍ଦିର ଆମ ସହରର ବକ୍ଷ ସ୍ଥଳରେ ଏବେ ବି ବିରାଜମାନ । ପରମ୍ପରା ଅନୁଯାୟୀ ପ୍ରତି ବର୍ଷ ରଥଯାତ୍ରା ଅନୁଷ୍ଠିତ ହୁଏ । ତିନୋଟି ସୁସଜ୍ଜିତ ରଥ, ତାଳଧ୍ଵଜ, ଦର୍ପଦଳନ ଓ ନନ୍ଦିଘୋଷ ଅପେକ୍ଷା ରେ ଅଛନ୍ତି । ପ୍ରଭୁ ବାହୁଡ଼ିବେ ନିଜର ଆସ୍ଥାନ କୁ, ମାଉସୀ ମାର ସ୍ନେହ ପ୍ରୀତି ପଛରେ ଛାଡ଼ି ଦେଇ ଆସିବେ । ରଥ ଦେବତା ଙ୍କ ଦକ୍ଷିଣମୋଡ଼ ସରିଛି ।ଯେଉଁଠି ପ୍ରଭୁ ସେଇଠି ଆମେ, ଭକ୍ତ ମଣ୍ଡଳୀ, ଆବାଳ ବୃଦ୍ଧ ବନିତା ସମସ୍ତେ ପ୍ରଭୁଙ୍କୁ ଦର୍ଶନ ରେ ଆମ ରଣପୁର ବଡ ଦାଣ୍ଡରେ ଅପେକ୍ଷାରତ । ଆମ ସହରକୁ ଦେଖି ପ୍ରାୟ ୫୦ ହଜାରରୁ ଊର୍ଦ୍ଧ୍ବ ଜନ ସମାବେଶ ହୁଏ । ଆମ ବଡ ଦାଣ୍ଡ ଲୋକାରଣ୍ୟ ହୁଏ । ରାଜାଙ୍କ ଠାରୁ ସାଧାରଣ ଜନତା, ପ୍ରଶାସକ, ଆରକ୍ଷୀ ବାହିନୀ, ମନ୍ଦିର ପ୍ରଶାସନ, ସେବକ ଓ ସେବାୟତ, ବିଦ୍ୟାଳୟ, ମହାବିଦ୍ୟାଳୟ ଛାତ୍ର ଛାତ୍ରୀ, ସବୁ ସରକାରୀ ଦପ୍ତର, ଥାନା, କଚେରି, ସବୁ ବର୍ଗର ଲୋକଙ୍କ ମନରେ ବଡ ଆଗ୍ରହ ଓ ଉତ୍କଣ୍ଠା ପରିଲକ୍ଷିତ ହୁଏ । କାହିଁକି ନା ଆମ ରଣପୁର ର ଏକ କଳା ରହିଛି । ପୁରୀ ଶ୍ରୀକ୍ଷେତ୍ର ଭଳିଆ । ବଧି ପୁଷ୍କରିଣୀ ଆମର ନରେନ୍ଦ୍ର ଶୌଚ । ପ୍ରଶସ୍ତ ଦାଣ୍ଡ ଆମ ବଡ଼ଦାଣ୍ଡ । ମଠ, ମନ୍ଦିର ମାଳିନୀ ଆମ ରଣପୁର । ଭାଇ ଚାରାର ସହର ଆମ ରଣପୁର । କେଡେ ସୁନ୍ଦର ତାହାର ପ୍ରକୃତି । କେଡେ ଶୁଭ୍ର ଓ ନିର୍ମଳ ତାହାର ଆକାଶ । ମାଆ ମଣିନାଗ ଙ୍କ ଅପାର କରୁଣା ଆମ ପ୍ରତି । ଏହାର ଆଖ ପାଖ ଅଞ୍ଚଳ କେଡେ ସୁନ୍ଦର । ଦେବୀ ସୁଭଦ୍ରା ଙ୍କ ରଥ ଦର୍ପଦଳନ କୁ ମହିଳା ମାନେ ଟାଣି ଟାଣି ନିଅନ୍ତି । ରଥରେ ସାରଥୀ, ରଥରେ ଆସୀନା ମାଆ ସୁଭଦ୍ରା ରଥ ଦଉଡି଼ ରେ ଆମ ମହିଳା ମାନେ । ପ୍ରଭୁ ଜଗନ୍ନାଥଙ୍କ ପ୍ରୀତି ଉଦ୍ଦେଶ୍ୱରେ ଭଜନ ସମାରୋହ ବି ହୁଏ । ପ୍ରଭୁ ଆମର ସଙ୍ଗୀତ ପ୍ରିୟ ।ବେଳେ ବେଳେ ମଧ୍ୟ ରଥ ଦୁର୍ଘଟଣା ର ସମ୍ମୁଖୀନ ହୁଏ । ତାହା ପୁଣି ତାଙ୍କ ଇଚ୍ଛାରେ ସୁଧାର ହୁଏ । ପରିବେଶ ବଡ ମଧୁମୟ ହୁଏ । ଆମ ଦାଣ୍ଡରେ ରାଜନେତା ଙ୍କ ଠାରୁ ଆରମ୍ଭ କରି ସାମ୍ବାଦିକ ମାନଙ୍କ ପର୍ଯ୍ୟନ୍ତ ଭିଡ଼ ହୁଏ । ଆମ ରଥଯାତ୍ରାର ବହୁଳ ଓ ବ୍ୟାପକ ପ୍ରସାର ହେବା ଆବଶ୍ୟକ । ଆମେ ଦ୍ଵିତୀୟ ଶ୍ରୀକ୍ଷେତ୍ର ବୋଲି ପ୍ରଚାର ଓ ପ୍ରସାର ହେବା ଆବଶ୍ୟକ । ଆମ ଠାକୁର ସୁନାବେଶ ହୁଅନ୍ତି, ଅଧର ପଣା ସାରନ୍ତି, ପାର୍ଶ୍ଵ ଦେବତା ଓ ଦେବୀ ସନ୍ତୁଷ୍ଟ ହୁଅନ୍ତି । ପରମ୍ପରା କାହିଁ କେତେ କାଳରୁ ଗଡି ଆସୁଛି । ଆସନ୍ତୁ ଆମ ଗୁଣ୍ଡିଚା ଓ ବାହୁଡା଼ ଯାତ୍ରା ର ସକାରାତ୍ମକ ଦୃଷ୍ଟିକୋଣ ରଖି ଦ୍ଵିତୀୟ ଶ୍ରୀକ୍ଷେତ୍ର ର ଦାବିକୁ ଜୋରଦାର କରିବା ।

ବିଜୟ କୁମାର ଜେନା : ଶାମୁକା ସାହି ରଣପୁର ନୟାଗଡ଼ .