୨୯ଜୁନ୍ ,୨୦୨୩ ( ଓଡ଼ିଶା ତାଜା ନ୍ୟୁଜ୍ ) ଢେଙ୍କାନାଳ :– ଓଡ଼ିଶା ସାହିତ୍ୟ ଏକାଡେମୀ, ଭୁବନେଶ୍ୱରର ରାଜ୍ୟସ୍ତରୀୟ ସ୍ୱନକ୍ଷତ୍ର ଦିବସ ପାଳନ ଉପଲକ୍ଷେ ଆୟୋଜକ ଜିଲ୍ଲା ସଂସ୍କୃତି କାର୍ଯ୍ୟାଳୟ, ଢେଙ୍କାନାଳ ସହଯୋଗରେ ଜିଲ୍ଲା ସଂସ୍କୃତି ଭବନ ପରିସରରେ ଓଡ଼ିଶା ସାହିତ୍ୟ ଏକାଡେମୀ ,ଢେଙ୍କାନାଳ ଜିଲ୍ଲା ସ୍ତରୀୟ ବିଭିନ୍ନ ପ୍ରତିଯୋଗିତା -୨୦୨୩ ସଫଳ ଭାବରେ ଆୟୋଜିତ ହୋଇଯାଇଛି । 
ଏଥିରେ ସାଧାରଣ ଜ୍ଞାନ ଓ ଇଂରାଜୀରୁ ଓଡ଼ିଆ ଅନୁବାଦ ବରିଷ୍ଠ ବର୍ଗରେ ଶତାୟୁ, ବ୍ରଜନାଥ ବଡ଼ଜେନା ସରକାରୀ ଉଚ୍ଚ ବିଦ୍ୟାଳୟ, ଢେଙ୍କାନାଳର ଛାତ୍ର ମନୋରଞ୍ଜନ ସାମଲ ଓ କନିଷ୍ଠ ବର୍ଗରେ ସେହି ବିଦ୍ୟାଳୟର ଛାତ୍ର ପ୍ରୟାସ ବେହେରା ଉଭୟ ପ୍ରଥମ ସ୍ଥାନ, ପ୍ରବନ୍ଧ ବରିଷ୍ଠ ବର୍ଗରେ ସରକାରୀ ବାଳିକା ଉଚ୍ଚ ବିଦ୍ୟାଳୟ, କାମାକ୍ଷାନଗରର ଛାତ୍ରୀ ପାୟଲ ଦାସ ଓ କନିଷ୍ଠ ବର୍ଗରେ ସୋଗର ସରକାରୀ ଉ. ପ୍ରା. ବିଦ୍ୟାଳୟ,
କାମାକ୍ଷାନଗରର ବିଶ୍ୱଭ୍ରାନ୍ତି ବେହେରା ଉଭୟ ପ୍ରଥମ ସ୍ଥାନ, କବିତା ଆବୃତ୍ତି ବରିଷ୍ଠ ବର୍ଗରେ ସେଣ୍ଟ୍ ଜାଭିୟର ହାଇସ୍କୁଲ, ଢେଙ୍କାନାଳର ଛାତ୍ର ସାଇ ଚନ୍ଦନ ଦାଶ ଓ କନିଷ୍ଠ ବର୍ଗରେ ଦିଲ୍ଲୀ ପବ୍ଲିକ୍ ସ୍କୁଲ୍,ଢେଙ୍କାନାଳର ଛାତ୍ରୀ ନାନସୀ ମହାନ୍ତି ଉଭୟ ପ୍ରଥମ ସ୍ଥାନ, ବକ୍ତୃତା ପ୍ରତିଯୋଗିତା ବରିଷ୍ଠ ବର୍ଗ ରେ ବଡସୁଆଁଳ ସରକାରୀ ଉଚ୍ଚ ବିଦ୍ୟାଳୟର ଛାତ୍ର ପ୍ରିୟବ୍ରତ ସେନାପତି ଓ କନିଷ୍ଠ ବିଭାଗରେ ସୁଲକ୍ଷଣା ଦେବୀ ସରକାରୀ ଉଚ୍ଚ ବିଦ୍ୟାଳୟ 
ଢେଙ୍କାନାଳର ଛାତ୍ରୀ ଶୁଭଶ୍ରୀ ରାଉତ ଉଭୟ ପ୍ରଥମ ସ୍ଥାନ ଅଧିକାର କରି ଉତ୍କଳ ସଙ୍ଗୀତ ମହାବିଦ୍ୟାଳୟ, ଭୁବନେଶ୍ଵରରେ ଓଡିଶା ସାହିତ୍ୟ ଏକାଡେମୀ, ଭୁବନେଶ୍ୱରର ରାଜ୍ୟସ୍ତରୀୟ ସ୍ୱନକ୍ଷତ୍ର ଦିବସ ପାଳନ ଉପଲକ୍ଷେ ଆଗାମୀ ଜୁଲାଇ ୯ ତାରିଖରେ କନିଷ୍ଠବର୍ଗ ସବୁର ଓ ଜୁଲାଇ ୧୬ ତାରିଖରେ ବରିଷ୍ଠବର୍ଗ ସବୁର ଆୟୋଜିତ ହେବାକୁ ଥିବା ରାଜ୍ୟସ୍ତରୀୟ ପ୍ରତିଯୋଗିତାରେ ଅଂଶଗ୍ରହଣ କରିବାକୁ ଯୋଗ୍ୟ ବିବେଚିତ ହେବାର ଗୌରବ ଅର୍ଜ୍ଜନ କରିଛନ୍ତି।
ଏହି ପ୍ରତିଯୋଗିତାରେ ପ୍ରବନ୍ଧରେ ଶିକ୍ଷାବିତ୍ ତଥା ବରିଷ୍ଠ ସାମ୍ବାଦିକ ପ୍ରଦ୍ୟୁମ୍ନ ରଥ, ବରିଷ୍ଠ ଓଡ଼ିଆ ଅଧ୍ୟାପିକା ଡ଼ଃ ପୁଷ୍ପଲତା ରଥ, ବକ୍ତୃତାରେ ସୁସାହିତ୍ୟିକ ଆର୍ଯ୍ୟରତ୍ନ ଚକ୍ରଧର ଓ କବି ଅବନୀ ମିଶ୍ର,କବିତା ଆବୃତ୍ତିରେ ଶିଳ୍ପୀ ପରେଶ ଚନ୍ଦ୍ର ପଟ୍ଟନାୟକ, ଗୁରୁ ଯାମିନୀ ରଞ୍ଜନ ଦାଶ ଓ ସାଧାରଣ ଜ୍ଞାନରେ ସୁସାହିତ୍ୟିକ ଶତୃଘ୍ନ ମାଟି ଓ ବରିଷ୍ଠ ସାମ୍ବାଦିକ ରତନ ନାୟାର ପ୍ରମୁଖ ବିଚାରକ ଭାବରେ ଯୋଗଦାନ କରି ବିଭିନ୍ନ ବର୍ଗରେ ସମସ୍ତ ଉପସ୍ଥିତ ପ୍ରତିଯୋଗୀ ମାନଙ୍କର ଦକ୍ଷତାର ଉଚିତ୍ ମୂଲ୍ୟାୟନ କରି ଉପଯୁକ୍ତ ପୁରସ୍କାର ପ୍ରଦାନ ପାଇଁ ଶ୍ରେଷ୍ଠ ପ୍ରତିଯୋଗୀ ମାନଙ୍କର ସଫଳ ଚୟନ କରିଥିଲେ।
ପରିଶେଷରେ ଢେଙ୍କାନାଳ ଜିଲ୍ଲା ସଂସ୍କୃତି ଅଧିକାରୀ ଶୁକ୍ରୁ ସ୍ୱାଇଁ ଓ ସମସ୍ତ ବିଚାରକ ମାନଙ୍କ ଉପସ୍ଥିତିରେ ଅନୁଷ୍ଠିତ ପୁରସ୍କାର ବିତରଣ ଉତ୍ସବରେ ପ୍ରତିଯୋଗିତାରେ ବିଭିନ୍ନ ବର୍ଗରେ ସମସ୍ତ ପ୍ରଥମ, ଦ୍ଵିତୀୟ ଓ ତୃତୀୟ ସ୍ଥାନ ଅଧିକାର କରିଥିବା ସଫଳ ଛାତ୍ରୀ ଛାତ୍ର ମାନେ ମଞ୍ଚାସିନ ଅତିଥିମାନଙ୍କ ଠାରୁ ପର୍ଯ୍ୟାୟ କ୍ରମେ ପ୍ରଶଂସା ପତ୍ର ଓ ଉଦ୍ଦିଷ୍ଟ ନିର୍ଦ୍ଧାରିତ ଅର୍ଥରାଶି ପୁରସ୍କାର ସ୍ୱରୂପ ଗ୍ରହଣ କରିଥିଲେ।
ସୁସାହିତ୍ୟିକ ଅବନୀ ମିଶ୍ର ଏହି ସଭା କାର୍ଯ୍ୟକ୍ରମକୁ ସଞ୍ଚାଳନ କରିଥିବାବେଳେ ଢେଙ୍କାନାଳ ଜିଲ୍ଲାର ଓଡ଼ିଶା ସାହିତ୍ୟ ଏକାଡେମୀ ସଦସ୍ୟା ଡ଼ଃ. ପୁଷ୍ପଲତା ରଥ ସମସ୍ତ କାର୍ଯ୍ୟକ୍ରମର ସଫଳ ସଂଯୋଜନା କରିବା ସଙ୍ଗେ ସଙ୍ଗେ ଧନ୍ୟବାଦ ଅର୍ପଣ କରିଥିଲେ । ପ୍ରାୟୋଜକ ଢେଙ୍କାନାଳ ଜିଲ୍ଲା ସଂସ୍କୃତି ଅଧିକାରୀ ଶୁକ୍ରୁ ସ୍ୱାଇଁଙ୍କ ନେତୃତ୍ୱରେ କାର୍ଯ୍ୟାଳୟର ସମସ୍ତ କର୍ମଚାରୀ ବୃନ୍ଦ,
ବରିଷ୍ଠ ଶିକ୍ଷକ ଡ଼ା. ଦେବୀ ପ୍ରସାଦ ମିଶ୍ରଙ୍କ ସମେତ ଢେଙ୍କାନାଳ ଜିଲ୍ଲାର ବିଭିନ୍ନ ବିଦ୍ୟାଳୟ ଗୁଡ଼ିକରୁ ଆସିଥିବା ସମସ୍ତ ଶିକ୍ଷୟିତ୍ରୀ, ଶିକ୍ଷକ ଓ ଅଭିଭାବିକା, ଅଭିଭାବକ ବୃନ୍ଦ ଆରମ୍ଭରୁ ଶେଷ ପର୍ଯ୍ୟନ୍ତ ଉପସ୍ଥିତ ରହି ଏହି କାର୍ଯ୍ୟକ୍ରମର ସଫଳତାରେ ପ୍ରମୁଖ ଭୂମିକା ଗ୍ରହଣ କରିଥିଲେ ।
